Madhya Pradesh:✒️মধ্যপ্ৰদেশৰ ইনদওৰ চহৰৰ ভগীৰথপুৰা অঞ্চলত বিষাক্ত পানী পান কৰাৰ ফলত ভয়ংকৰ পৰিস্থিতিৰ সৃষ্টি হৈছে। চৰকাৰী তথ্য অনুসৰি এই ঘটনাত এতিয়ালৈকে ১০ জন লোকৰ মৃত্যু হৈছে যদিও স্থানীয় বাসিন্দাসকলে মৃতৰ সংখ্যা ১৪ জনলৈ বৃদ্ধি পোৱাৰ দাবী কৰিছে। একেদৰে, অঞ্চলটোত প্ৰায় ১৪০০ ৰো অধিক লোক অসুস্থ হৈ পৰিছে।
তথ্য অনুসৰি ইনদওৰৰ মুখ্য স্বাস্থ্য আধিকাৰিক তথা চিকিৎসক মাধৱ প্ৰসাদে জনোৱা মতে, এটা চিকিৎসা মহাবিদ্যালয়ৰ গৱেষণাগাৰত কৰা পৰীক্ষাত পানী দূষিত হোৱা বুলি নিশ্চিত হৈছে। তদন্তত প্ৰকাশ পাইছে যে পানীৰ পাইপলাইন ফাটি যোৱাৰ ফলতেই শৌচাগাৰৰ নিষ্কাশন পানী খোৱা পানীৰ লগত মিহলি হয় আৰু সেই দূষিত পানী পান কৰাৰ বাবেই ডায়েৰিয়াৰ প্ৰাদুৰ্ভাৱ ঘটে।
স্থানীয় প্ৰশাসনৰ সূত্ৰে জনোৱা মতে, ভগীৰথপুৰাৰ এটা থানাৰ সমীপত পানীৰ পাইপলাইনৰ ফাট চিনাক্ত কৰা হৈছে। উল্লেখযোগ্য যে, ফটা পাইপলাইনৰ ওপৰতেই এটা শৌচাগাৰ নিৰ্মাণ কৰা হৈছিল। পাইপ ফটাৰ ফলত শৌচাগাৰৰ পানী গৈ খোৱা পানী দূষিত কৰে আৰু তাৰ ফলতেই এই বিপৰ্যয় সংঘটিত হয়।
ইনদওৰৰ মেয়ৰ পুষ্যমিত্ৰ ভার্গৱে জনাইছে যে চৰকাৰী তথ্য অনুসৰি এতিয়ালৈকে ১০ জনৰ মৃত্যু হৈছে। আনফালে, স্থানীয় বাসিন্দাসকলে অভিযোগ কৰিছে যে মৃত্যুৰ সংখ্যা ইয়াতকৈ অধিক।
পৰিস্থিতি নিয়ন্ত্ৰণৰ বাবে প্ৰশাসনে তৎপৰতাৰে ব্যৱস্থা গ্ৰহণ কৰিছে। অতিৰিক্ত মুখ্য সচিব সঞ্জয় দুবেই জনাইছে যে ক্ষতিগ্ৰস্ত পাইপলাইন মেৰামতি কৰি অঞ্চলটোত পুনৰ পৰিষ্কাৰ পানীৰ যোগান আৰম্ভ কৰা হৈছে।
লগতে সুৰক্ষাৰ স্বাৰ্থত আন ঠাইত পাইপলাইনৰ ফাটি আছে নেকি সেয়াও পৰীক্ষা কৰা হৈছে।
এই ঘটনাক লৈ ৰাষ্ট্ৰীয় মানৱাধিকাৰ আয়োগে ৰাজ্য চৰকাৰলৈ নোটিছ জাৰি কৰিছে। বহুদিন ধৰি দূষিত পানীৰ অভিযোগ উত্থাপন হোৱাৰ পাছতো কিয় সময়মতে ব্যৱস্থা গ্ৰহণ কৰা নহ’ল, সেই সন্দৰ্ভত ব্যাখ্যা বিচাৰিছে আয়োগে।
বৃহস্পতিবাৰে মুখ্যমন্ত্ৰী মোহন যাদৱে ইনদওৰৰ বিভিন্ন চিকিৎসালয় পৰিদৰ্শন কৰি অসুস্থসকলৰ স’তে সাক্ষাৎ কৰে আৰু পৰিস্থিতি সন্দৰ্ভত এক উচ্চ পৰ্যায়ৰ বৈঠকো কৰে।
স্বাস্থ্য বিভাগৰ মতে, ভগীৰথপুৰাৰ ১৭১৪টা ঘৰত সমীক্ষা চলোৱা হৈছে আৰু ৮৫৭১ জন লোকৰ স্বাস্থ্য পৰীক্ষা কৰা হৈছে। ইয়াৰে ৩৩৮ জনৰ মাজত ডায়েৰিয়াৰ মৃদু লক্ষণ ধৰা পৰিছে।
উল্লেখযোগ্য যে, যি ভগীৰথপুৰা অঞ্চলত এই ডায়েৰিয়াৰ প্ৰাদুৰ্ভাৱ হৈছে, সেই এলেকাটো ৰাজ্যৰ আবাসন আৰু নগৰোন্নয়ন মন্ত্ৰী কৈলাস বিজয়বৰ্গীয়ৰ বিধানসভা সমষ্টিৰ অন্তৰ্গত। এই ঘটনাক কেন্দ্ৰ কৰি সৃষ্টি হোৱা ৰাজনৈতিক বিতৰ্কই ইতিমধ্যে ব্যাপক চৰ্চা লাভ কৰিছে।