আপুনি ম’বাইল ফোন আসক্ত হোৱা বুলি নিজে অনুভৱ কৰে নেকি? অর্থাৎ হাতত ইণ্টাৰনেট সংযুক্ত ম’বাইল ফোনটো নাথাকিলে সময় অতিবাহিত কৰোতে অত্যন্ত বিৰক্তি অনুভৱ কৰে নেকি? পৰিয়াল বা বন্ধু-বান্ধৱৰ মাজত থকাৰ সময়তো ম’বাইলটো অবিহনে এনে অনুভব হয় নেকি?
যদিহে এনে পৰিস্থিতিৰ আপুনি অথবা আপোনাৰ চিনা-পৰিচিতজন সম্মুখীন হৈছে তেন্তে আপোনাৰ বা পৰিচিতজনৰ ম’বাইল ফোনৰ প্ৰতি আসক্তি আছে বুলি আখ্যা দিব পাৰি। একাংশ বিশেষজ্ঞৰ মতে ম’বাইল ফোনৰ আসক্তি দূৰ কৰাটো অসম্ভৱৰ নিচিনা। যদি আপুনি বা আপোনাৰ প্রিয়জনে ম’বাইলটোক লৈ ব্যস্ত থাকোতে পুৱা-গধূলিৰ আহাৰো গ্ৰহণ কৰিবলৈ পাহৰি যায় বা আহাৰ গ্রহণ কৰিবলৈ মাতিলে বিৰক্তি অনুভৱ কৰে তেন্তে তেনে লক্ষণো ম’বাইল আসক্তিৰ চিন।
এই আসক্তি দূৰ কৰাটো সহজ নহ’লেও শেহতীয়াভাবে এজন স্নায়ুৰোগ বিশেষজ্ঞই এক সমাধান সূত্র আগবঢ়াইছে। ডাঃ কল্লোল কুমাৰ দেৰ মতে ম’বাইল ফোনৰ প্ৰতি আসক্তি সৃষ্টিৰ কাৰণ হৈছে ফোনটোৰ স্ক্ৰীণত দেখা পোৱা বিভিন্ন ৰঙীণ বস্তু চকুত পৰাৰ লগে লগে মস্তিষ্কৰ ড’পামিন বা সুখৰ হর্মন প্রভাবিত হয়।
এই হর্মন নির্গত হ’লে এজন মানুহে সুখী অনুভৱ কৰে। ম’বাইল ফোনৰ ৰঙীণ কায়সমূহে ড’পামিনৰ ক্ষৰণ ঘটায়। ফলত চকুৰ সন্মুখত ম’বাইল ফোনটো লৈ থাকিলে ভাল লাগি থাকে। এনেদৰে এজন ব্যক্তি ম’বাইল আসক্ত হৈ পৰে। বিশেষজ্ঞসকলৰ মতে ম’বাইল ফোনৰ আসক্তি দূৰ কৰাৰ উপায় আছে।
ম’বাইল ফোনৰ স্ক্ৰীণৰ উজ্জ্বল আৰু ৰঙীণ পৰিচ্ছদ সলনি কৰি পাতল ক’লা কৰিব লাগে।তাকে কৰিলে পূৰ্বৰ দৰে ফোনটোৰ স্ক্রীণখন আৰু ভাল নলগা হ’ব। ফোনটোৰ এই অৱস্থাই ডপামিনৰ ক্ষৰণো ঘটাব নোৱাৰে। অর্থাৎ ফোনটো চালে পূৰ্বৰ দৰে মনত সুখানুভূতিৰ সৃষ্টি নহয়।
ফলত ম’বাইল আসক্তি লাহে লাহে দূৰ হ’বলৈ ধৰিব। এই সম্পর্কত ডাঃ দেই কয়, ‘ম’বাইল ফোনৰ পৰ্দাৰ স্ক্রীণ ৰঙীণৰ পৰা মটিয়া বা পাতল ক’লা তথা ধূসৰলৈ সলনি কৰিব লাগে। এনে অৱস্থাতো ম’বাইল ফোনটোত প্রয়োজনীয় কাম-কাজ কৰাত অসুবিধাৰ সৃষ্টি নহয়। ফোনটোৰ অৱস্থা এনে কৰি ল’লে ম’বাইলতে ঘণ্টাৰ পাছত ঘণ্টা চকু দি থাকিলেও আসক্তিৰ সৃষ্টি নহয়।’