পদূলিমুখত অসমীয়াৰ ভোগৰ উৎসৱ ভোগালী। ৰাজ্যজুৰি আজি উৰুকাৰ ভোজৰ ব্যাপক প্রস্তুতি চলিছে। চহা জীৱনৰ পৰা মহানগৰীয়া জীৱনলৈ ব্যাপ্ত মাঘ বিহুৰ ভোগালীৰ আনন্দৰ অংশৰূপে আজি উদৰ পূৰাই এসাঁজ খাব প্রতিজন অসমীয়াই। ক্ষণিকৰ বাবে হ’লেও জীৱন সংগ্ৰামৰ দুখ ভাগৰ পাহৰি সাধাৰণ লোকজনেও উৰুকাৰ বাবে সাজু হৈছে।
গ্রামাঞ্চলৰ পৰা নগৰাঞ্চললৈ একেবাৰে নিঃকিনজনৰ পৰিয়ালতো সামর্থ্য অনুযায়ী কৰা হৈছে ভোগৰ আয়োজন। ইয়াক কেন্দ্ৰ কৰি ভোগৰ সামগ্ৰীৰে ভৰি পৰিছে ৰাজ্যৰ বজাৰ-পোহাৰসমূহ। ৰাজ্যৰ বিভিন্ন প্ৰান্তৰ লগতে ৰাজধানী গুৱাহাটী মহানগৰীতো ভোগালীৰ সামগ্ৰীৰে ভৰি পৰিছে চৌপাশ। বিধে বিধে বিশাল আকাৰৰ মাছৰ লগতে লাডু-পিঠা, দৈ-ক্ৰীমৰ পৰা আদি কৰি মেজিটোলৈকে ভোগালী বিহুৰ প্ৰতিবিধ সামগ্রী উভৈনদী হৈ পৰিছে বজাৰসমূহৰ লগতে পথসমূহৰ দুয়োকাষ।
উল্লেখ্য যে উৰুকাৰ দিনটোত ৰাজ্যখনত ব্যাপক হাৰত মাছৰ চাহিদা আছে। কোনে কিমান ডাঙৰ মাছ মাৰিলে তাৰো এক অঘোষিত প্রতিযোগিতাও চলে। মাছৰ এই চাহিদা ঘৰুৱা উৎপাদনে পূৰণ কৰিব নোৱৰাৰ ফলত উৰুকাৰ মাছৰ বজাৰৰ চাহিদা পূৰাবলৈ বিগত বর্ষসমূহৰ দৰেই বাংলাদেশৰ লগতে অন্ধ্রপ্রদেশ, পশ্চিমবংগৰ পৰা আহিছে কুইণ্টলে কুইণ্টলে মাছ। একেদৰে নাৰিকলৰ চাহিদা পূৰ কৰিবলৈ কেৰালাৰ পৰা আহিছে বস্তাই বস্তাই নাৰিকল।
সমান্তৰালভাৱে সৰভোগ, ৰামদিয়াৰ পৰা দৈ-ক্রীম, বৰপেটা-তিতাবৰ আদিৰ পৰা অহা চাউল-চিৰা, গুড়ৰে ভৰি পৰিছে মহানগৰীৰ বজাৰসমূহ; কিন্তু বিগত বৰ্ষৰ তুলনাত খাদ্য সামগ্ৰীসমূহৰ অত্যধিক মূল্যবৃদ্ধি হোৱাৰ অভিযোগ তুলিছে ক্রেতাসকলে।
উল্লেখ্য যে বিগত বৰ্ষসমূহৰ দৰে এইবাৰো ভোগালীৰ সামগ্ৰীৰে ভৰি পৰিছে গণেশগুৰিৰ বজাৰসমূহৰ লগতে পথৰ দুয়োকাষ। পিঠা-পনাৰ পৰা আৰম্ভ কৰি দৈ, ক্ৰীম, চিৰা, কোমল চাউল, তিল, গুড়, চুঙা, বৰা চাউল, সান্দহ, মাটিমাহ, নাৰিকল, কৃত্রিম মেজি আদি সামগ্ৰীৰে ভৰি আছে প্ৰতিখন বিপণী। বিগত প্রায় ২০-২২ বছৰ ধৰি বিহুৰ সময়ত গণেশগুৰিত বিভিন্ন সামগ্রী বিক্রী কৰি অহা নলবাৰীৰ বৰভাগৰ কৰুণা কলিতাই ‘দৈনিক অগ্রদূত’ৰ আগত কয় যে বিগত বৰ্ষৰ তুলনাত এইবাৰ সামগ্ৰীসমূহৰ দাম ২০-৩০ টকা বৃদ্ধি পাইছে। এইবাৰ প্ৰতি কিলোগ্রাম তুলসী জহা চিৰা ১৫০ টকা, বৰা ধানৰ চিৰা ১৪০ টকা, মালভোগ চিৰা ১২০ টকা, জহা বৰা চাউল ১২০ টকা, ৰঙা বৰা চাউল ১০০ টকাত বিক্ৰী কৰা হৈছে।
একেদৰে প্ৰতি কিলোগ্রাম বালিয়া গুড় ১২০ টকাত, খেজুৰ গুড় ১২০ টকাত, গুড় ১০০ টকাত, ৰামদিয়াৰ ক্ৰীম আঠশ টকাত, ম’হৰ দৈ দুশ টকাত, গৰুৰ দৈ ২২০ টকাত, মাটিমাহ ১৪০ টকাত, জুলীয়া গুড় ১০০ টকাত বিক্ৰী কৰিছে। সমান্তৰালভাৱে প্ৰতিখন তিল আৰু নাৰিকল দিয়া পিঠা ১০ৰ পৰা ১২ টকা, নাৰিকলৰ লাড্ডু ১২-১৪ টকা দৰত বিক্ৰী কৰিছে।
আনহাতে, বিগত প্রায় ২০ বছৰ ধৰি ব্যৱসায় কৰি অহা হাজোৰ দিনেশ ডেকাই ভোগালীৰ বজাৰলৈ বুলি এইবাৰো ৰামদিয়াৰ পৰা প্ৰায় দুই কুইণ্টল দৈ-ক্রীম লৈ আনিছে। প্রায় বিক্রী কৰিবলৈ সক্ষম হৈছে বুলি তেওঁ সদৰী কৰে। একেদৰে সংশ্লিষ্ট স্থানত বজাৰ কৰিবলৈ অহা বশিষ্ঠৰ বৈশালী দত্ত নামৰ মহিলাগৰাকীয়ে পূৰ্বৰ তুলনাত সামগ্ৰীসমূহৰ মূল্যবৃদ্ধি হৈছে বুলি মন্তব্য কৰে।
গণেশগুৰিত সৰু সৰু খেৰৰে প্ৰস্তুত কৰা একোটা মেজিৰ ছশৰ পৰা ১২শ টকা পর্যন্ত দৰ উঠিছে। একেদৰে স্থানীয় একোটা নাৰিকল ১২০ টকা, কেৰালাৰ পৰা অহা একোটা নাৰিকলৰ দৰ ৭০ টকা পর্যন্ত উঠিছে।
উৰুকাৰ বজাৰৰ মাছৰ চাহিদা পূৰণ কৰিবলৈ বিগত বৰ্ষসমূহৰ দৰে এইবাৰো ট্রাক-ৰেলযোগে বাংলাদেশ, অন্ধ্রপ্রদেশ, পশ্চিমবংগ আদিৰ পৰা অসমলৈ আহিছে কুইণ্টলে কুইন্টলে মাছ। একোখন ট্রাকে ১২ হেজাৰ কিলোগ্রামকৈ অর্থাৎ ১২০ কুইণ্টলকৈ মাছ কঢ়িয়াই গুৱাহাটীত উপস্থিত হৈছে। বেতকুছিস্থিত মাছৰ পাইকাৰী বজাৰ সমিতি তথা বৃহত্তৰ গুৱাহাটী পাইকাৰী মাছ বেচা-কিনা সমবায় সমিতিয়ে সদৰী কৰা তথ্য অনুসৰি, এইবাৰ উৰুকাত অন্ধ্রপ্রদেশৰ পৰা আমদানি কৰা হৈছে ৰৌ, মিৰিকা, ভকুৱা আদি মাছ।
অন্ধ্রপ্রদেশৰ পৰা ৪৪খন ট্রাকেৰে মাছ আমদানি কৰা হৈছে। এই মাছসমূহ সমগ্ৰ গুৱাহাটীৰ লগতে চুবুৰীয়া কামৰূপ, নলবাৰী, মঙলদৈ, বৰপেটা আদিলৈ প্ৰেৰণ কৰা হ’ব। একেদৰে বাংলাদেশৰ পৰা আহিছে ইলিছ আৰু পাভ মাছ। ইয়াৰ উপৰি পশ্চিমবংগৰ পৰা ৰেল আৰু ট্রাকযোগে আহিছে আৰি, বৰালি, চিতল আদি মাছ।
উল্লেখ্য যে উৰুকাৰ দিনটোত আটাইতকৈ ডাঙৰ আকাৰৰ মাছটো বজাৰত উলিয়াই দিবলৈ ব্যৱসায়ীসকলৰ মাজত অঘোষিত প্রতিযোগিতা চলে। এই বিশেষ দিনটোত বজাৰৰ ডাঙৰ মাছটোৰ ওপৰতহে ক্ৰেতাৰ চকু পৰে। ৰাজ্যৰ বিভিন্ন প্ৰান্তৰ মাছ বজাৰসমূহৰ দৰেই আজিৰ দিনটোত মহানগৰীৰ উজান বজাৰস্থিত মাছ বজাৰ লোকাৰণ্য হৈ পৰে। উজান বজাৰৰ মাছৰ বজাৰত উৰুকাৰ দিনটোত কেৱল স্থানীয়ভাবে উৎপাদিত মাছহে বিক্ৰী কৰা হয় বুলি দাবী কৰা হয় যদিও ইয়াক লৈ বিভিন্নজনৰ মনত প্রশ্ন আছে।
উজান বজাৰৰ মাছৰ বজাৰলৈ এই দিনটোত প্রকাণ্ড প্রকাণ্ড বিধে বিধে মাছ লৈ মৰিগাঁও, দৰং, হাজো আদিৰ পৰা বৃহৎ সংখ্যক ব্যৱসায়ী আহে। এইবাৰো তাৰ কোনো ব্যতিক্রম ঘটা নাই। পুৱতি নিশাৰ মাছ বিক্ৰী আৰম্ভ হোৱা বজাৰখনত এইবাৰ এশ টন মাছ বিক্ৰীৰ লক্ষ্য নির্ধাৰণ কৰা হৈছে।
আজিৰ দিনত কেৱল ধনিক শ্ৰেণীৰ বাবেই উৰুকা!
ইফালে, ভোগৰ উৎসৱত সকলোৱে লগে-ভাগে উদৰ পূৰাই এসাঁজ খাবলৈ বিচাৰে যদিও ব্যাপক মূল্যবৃদ্ধিৰ বাবে বহুজনৰ বাবে হয়তো এয়া সম্ভৱ হৈ উঠা নাই। দৰিদ্ৰ শ্ৰেণীৰ পৰা মধ্যবিত্তলৈ আজি অত্যধিক মূল্যবৃদ্ধিত কোঙা হৈ পৰিছে। কে’বাজনো ব্যৱসায়ীয়ে স্বীকাৰ কৰিছে যে এইবাৰ কম কম ওজনত সামগ্রী বিক্রী হৈছে।
ফলত গণেশগুৰিৰ কে’বাজনো ব্যৱসায়ীয়ে এক কিলোগ্রাম ওজনৰ সামগ্রী খুলি ২৫০ গ্রামকৈ টোপোলা কৰি বিক্ৰী কৰা বুলিও মন্তব্য কৰে। ইয়াৰ সত্যতা স্বীকাৰ কৰি পথ ব্যৱসায়ী সন্থাৰ সভাপতি চন্দন গোস্বামীয়ে কয় যে আজিৰ দিনত কেৱল ধনিক শ্ৰেণীৰ বাবেহে যেন ভোগালী হৈ পৰিছে। সাধাৰণ জনতাই বজাৰৰ কাষ চাপিবলৈ এশবাৰ চিন্তা কৰিবলগীয়া হৈছে।
যি হাৰত মূল্যবৃদ্ধি পাইছে, সৰু সৰু দোকান দি, দৈনিক শ্ৰম কৰি পৰিয়াল পোহপাল কৰাসকলে ভাবিবলগীয়া হৈছে কিদৰে পৰিয়াল চলাব। আজিৰ দিনত সৰু সৰু কর্ম কৰি খোৱা মানুহৰ আয়ৰ বিপৰীতে ব্যয় দুই-তিনি গুণ বৃদ্ধি পাইছে। এই দিশত কাৰো চিন্তা নাই বুলি তেওঁ ক্ষোভ প্রকাশ কৰে।