Nagaon:
সাত বছৰ জোৰা প্ৰতীক্ষাৰ অন্ত পেলাই অৱশেষত আদালতত আৰম্ভ হ’ল দেশ কঁপোৱা অভি-নীল হত্যাকাণ্ডৰ গোচৰৰ তিনিদিনীয়া চূড়ান্ত শুনানি ৷
উল্লেখ্য যে সভ্য সমাজক লজ্জানত কৰি আৰু দেশৰ প্ৰচলিত আইন ব্যৱস্থাক উপহাস কৰি ২০১৮ৰ আঠ জুনত কাৰ্বি আংলং জিলাৰ ডকমকা আৰক্ষী থানাৰ অন্তৰ্গত পাণজুৰি গাঁৱত এদল উন্মত্ত লোকে দুই প্রকৃতিপ্রেমী যুৱক গুৱাহাটীৰ অভিজিৎ নাথ আৰু নীলোৎপল দাসক মৰিয়াই হত্যা কৰে। তেতিয়াৰে পৰা যুৱকদ্বয়ৰ ভুক্তভোগী পৰিয়াল ন্যায়ৰ প্রতীক্ষাত আছে। ভুক্তভোগীৰ এই প্ৰতীক্ষাৰ মাজত আজিৰ পৰা নগাঁৱৰ সত্ৰ ন্যায়াধীশৰ আদালতত আৰম্ভ হৈছে গোচৰটোৰ চূড়ান্ত যুক্তিতর্ক শুনানি প্রক্রিয়া। এই শুনানি প্রক্রিয়া অহা সাত ফেব্ৰুৱাৰীলৈকে চলিব। গতিকে গোচৰীয়া পক্ষই সাময়িক সকাহ লাভ কৰিছে। উল্লেখ্য যে অভি-নীল হত্যাকাণ্ডৰ মুঠ অভিযুক্তৰ সংখ্যা হৈছে ৪৫জন। ঘটনাটো চাক্ষুষ সাক্ষী আছিল ১২জন। ইয়াৰে পাঁচজনে সত্যতা স্বীকাৰ কৰাৰ বিপৰীতে সাতজনে সত্যতা স্বীকাৰ নকৰি গোচৰ প্ৰক্ৰিয়া লেহেমীয়া কৰি তোলে। ফলত আদালতে দুয়োপক্ষৰ যুক্তি শুনাৰ ব্যৱস্থা গ্রহণ কৰে। এক দীঘলীয়া পৰিক্ৰমাৰ অন্তত আজিৰ পৰা সাত ফেব্ৰুৱাৰীলৈকে গুচৰীয়া অভিযুক্ত পক্ষৰ যুক্তি শুনানির দিন ধার্য কৰিছে। এই শুনানি গ্রহণৰ পাছতে অভিযুক্ত পক্ষৰ যুক্তিতর্ক আৰম্ভ হ’ব। দুয়োপক্ষৰ যুক্তিতর্ক শুনাৰ পাছত গোচৰটোৰ আদালতে ৰায়দান কৰাৰ সম্ভাৱনা আছে। অৱশ্যে গুচৰীয়া পক্ষৰ ‘প্ৰতিৰক্ষা’ আবেদনৰ ভিত্তিত এই শুনানি গ্ৰহণৰ দিনৰ সংখ্যা বৃদ্ধি হোৱাৰো সম্ভাৱনা আছে। আজি আদালতত গুচৰীয়া পক্ষৰ হৈ যুক্তি আগবঢ়ায় জ্যেষ্ঠ অধিবক্তা জিয়াউৰ কামাৰে।
শুনানিৰ সময়ত আদালত চৌহদত উপস্থিত থাকে প্রয়াত অভিজিৎ নাথৰ পিতৃ অজিত নাথ আৰু নীলোৎপল দাসৰ পিতৃ গোপাল চন্দ্ৰ দাসৰ লগতে অভি-নীল স্মৃতিৰক্ষা সমিতিৰ একাংশ সদস্য।
আনহাতে, আ আদালতত যুক্তিতর্ক আগবঢ়োৱাৰ পাছত জ্যেষ্ঠ অধিবক্তা কামাৰে সাংবাদিকৰ আগত কয়, ‘গোচৰটোৰ চূড়ান্ত যুক্তিতর্ক গ্ৰহণ আজিৰ পৰা আৰম্ভ হৈছে। আদালতে তিনিদিনৰ এক সময়সূচী দিছে। সাত ফেব্ৰুৱাৰীলৈকে আমাৰ যুক্তিতর্ক প্রদর্শন হ’ব। এই তিনিদিনত আমাৰ যুক্তিতর্ক অন্ত পেলাব লাগিব। চাক্ষুষ সাক্ষীৰ ভাষ্যৰ লগতে এই ঘটনা কেনেকৈ, কাৰ পৰিকল্পনাত, কাৰ প্ৰৰোচনাত সংঘটিত হ’ল, সেই গোটেইখিনি আদালতত দাঙি ধৰা হ’ব। ‘ এই সম্পর্কত অধিবক্তাজনে আৰু কয়, ‘যিসমূহ অস্ত্র-শস্ত্ৰৰে আঘাত কৰা হৈছিল সেইসমূহৰ লগতে চিকিৎসালয়ৰ প্রতিবেদন আদি আদালতত দেখুওৱা হ’ব। সাত তাৰিখলৈকে যুক্তি-তৰ্কৰ তাৰিখ আমাক দিয়া হৈছে। তাৰ পাছত হয়তো অভিযুক্ত পক্ষৰ যুক্তিতৰ্কৰ শুনানি আৰম্ভ হ’ব। শুনানি সমাপ্ত হ’লে ৰায়দান হ’ব। তাৰ পাছতো শাস্তিৰ ৰায়দানৰ বাবে এটা তাৰিখ দিব।’ এই লোমহর্ষক হত্যাকাণ্ডৰ গোচৰ সম্পৰ্কত তেওঁ আৰু কয়, ‘আমি যদি ৩০২ (ভাৰতীয় দণ্ড বিধিৰ)ত দোষী সাব্যস্ত কৰিব পাৰো তেতিয়া দোষীৰ হয় মৃত্যুদণ্ড বা যাবজ্জীবন কাৰাদণ্ড হ’ব। ইয়াৰ কোনো বিকল্প নাই।’
ইপিনে,আদালত চৌহদত দুর্ভগীয়া নিলো ৎপলৰ পিতৃ গোপাল চন্দ্র দাসে কয়, ‘যুক্তিতৰ্কৰ প্ৰক্ৰিয়াটো আজিৰ পৰা আৰম্ভ হৈছে। অহা তিনিদিনলৈ নিয়মীয়াকৈ চলিব। আমি ন্যায়ৰ বাবে বহু বাট চাবলগীয়া হৈছে। আমি যথেষ্ট হতাশ হৈছো। এটা সময়ত আমাৰ বিশ্বাস প্রায় ভাগি গৈছিল। সঁচাকৈ ন্যায় পাম নে নাপাম তাক লৈ দ্বিধাগ্রস্ত আছিলো। আজিৰ পৰা গোচৰটোৰ চূড়ান্ত যুক্তিতর্ক আৰম্ভ হোৱাত এতিয়া কিছু সকাহ পাইছো। নিশ্চয় কিবা এটা ফল পাম। ন্যায়ৰ বাবে আশা কৰিছো। জ্যেষ্ঠ অধিবক্তা কামাৰে যুক্তিতর্ক প্রক্রিয়াটো সুন্দৰভাৱে আগুৱাই নিছে।’
ইপিনে, নৃশংসতাৰ বলি আনজন যুৱক অভিজিতৰ পিতৃ অজিত নাথে কয়, ‘ন্যায়ৰ আশাতে জীয়াই আছো। ন্যায়পালিকাৰ ওপৰত বিশ্বাস আছে। আজি যুক্তিতৰ্কৰ প্ৰক্ৰিয়াটো সুন্দৰকৈ আগুৱাই নিছে। আমি বহু সুখী। এইটোৱে হয়তো মোকদমাটোৰ শেষ পর্যায়। ইয়াৰ পাছত ৰায়দান প্রক্রিয়া আৰম্ভ হ’ব। আমি আশাবাদী দোষীসকলে, যিসকলে আমাৰ ল’ৰা দুটাক মাৰি পেলালে, সেইসকল কোনোপধ্যে সাৰি যাব নোৱাৰে। দোষীয়ে চৰম পৰ্যায়ৰ শাস্তি পাব বুলি আমি আশাবাদী।’
উল্লেখ্য যে অভি-নীল হত্যা সম্পর্কত ডকমকা আৰক্ষী থানাত ৩৩/২০১৮ নম্বৰত ৰুজু হোৱা গোচৰৰ ৪৭জন অভিযুক্ত গ্ৰেপ্তাৰ হয়। এই অভিযুক্তসকল নগাঁও কাৰাগাৰত ন্যায়িক জিম্মাত আছে। প্রথম অৱস্থাত ডিফু আদালতত গোচৰটোৰ বিচাৰ চলে যদিও অভি-নীলৰ পৰিয়ালৰ লেখ আবেদনৰ ভিত্তিত গোচৰটোৰ বিচাৰ নগাঁৱৰ জিলা আৰু সত্ৰ ন্যায়াধীশৰ আদালতলৈ স্থানান্তৰ হয়।
