সৰুপথাৰ বিধানসভা সমষ্টিৰ বিৰোধী মিত্ৰজোঁটৰ প্ৰাৰ্থী জীৱন চুতীয়াৰ হৈ নিৰ্বাচনী প্ৰচাৰৰ বাবে সৰুপথাৰত শুকুৰবাৰে উপস্থিত হয় অসম প্ৰদেশ কংগ্ৰেছৰ সভাপতি গৌৰৱ গগৈ আৰু অসম জাতীয় পৰিষদৰ সভাপতি লুৰীণজ্যোতি গগৈ।
সৰুপথাৰ সমজিলাৰ নলনীপথাৰ গীৰ্জা খেলপথাৰত প্ৰায় পাঁচ সহস্ৰাধিক লোকৰ উপস্থিতিত অনুষ্ঠিত এক নিৰ্বাচনী প্ৰচাৰ সভাত অংশগ্ৰহণ কৰি দুয়ো গগৈয়ে সৰুপথাৰৰ বৰ্তমানৰ বিধায়ক বিশ্বজিৎ ফুকন আৰু মুখ্যমন্ত্ৰী হিমন্ত বিশ্ব শৰ্মাক তীব্ৰ ভাষাৰে সমালোচনা কৰে।
গৌৰৱ গগৈয়ে উপস্থিত ৰাইজক উদ্দেশ্যি কয়, ”জুবিন গাৰ্গৰ প্ৰতি ভাল ভাব নাই বিজেপিৰ৷ জুবিন গাৰ্গৰ আদৰ্শৰ বিৰোধী মুখ্যমন্ত্ৰীগৰাকী৷ সেইবাবেই মৃত্যুৰ পাছতো জুবিন গাৰ্গক অসন্মান কৰি গৈছে বিজেপিয়ে৷’’ জুবিন গাৰ্গক ন্যায় প্ৰদান কৰিব নোৱাৰা বিজেপি চৰকাৰক তীব্ৰ আক্ৰমণ কৰি গগৈয়ে কয় যে জুবিন গাৰ্গৰ হত্যাকাৰীৰ স’তে ঘনিষ্ঠ সম্পৰ্ক আছে মুখ্যমন্ত্ৰী হিমন্ত বিশ্ব শৰ্মাৰ৷ সেয়েহে তদন্তত গাফিলতি কৰিছে আৰক্ষীয়ে৷ চৰকাৰ গঠনৰ এশ দিনৰ ভিতৰত মিত্ৰজোঁটৰ চৰকাৰে জুবিন গাৰ্গক ন্যায় প্ৰদান কৰিব৷ হিমন্ত বিশ্ব শৰ্মাই জুবিন গাৰ্গৰ ঘটনাক লৈ বাস্তৱ তদন্ত কৰা নাই৷ হিমন্ত বিশ্ব শৰ্মা আৰু শ্যামকানু মহন্তৰ মাজৰ সম্পৰ্ক কি সেয়া তদন্ত কৰা হ’ব বুলিও কয় গৌৰৱ গগৈয়ে৷
গৌৰৱ গগৈয়ে বৰ্তমানৰ চৰকাৰ চলাই থকা লোকসকলে চিণ্ডিকেট চলাই থকাৰ অভিযোগ উত্থাপন কৰি কয় যে আজি শাসন চলাই থকাসকলৰ সম্পৰ্ক আছে চিণ্ডিকেট মাফিয়াৰ সৈতে৷ হিমন্ত বাহিনীয়ে গৰু, কয়লা, বালি-শিলৰ চিণ্ডিকেট চলাই আছে৷ এই চিণ্ডিকেটৰ কাণ্ডাৰীসকল অসমৰ শাসনত আছে৷ আজি চিন্তা কৰাৰ সময় হ’ল যে গৰু-কয়লাৰ চিণ্ডিকেট চলোৱা মানুহে ৰাইজৰ চিন্তা কৰিব নে? আপোনালোকৰ ল’ৰা-ছোৱালী, স্বাস্থ্যখণ্ডৰ কথা চিন্তা কৰিব নে? আপোনালোকে হাজিৰা লাভ কৰিছে নে নাই সেই কথা চিন্তা কৰিব নে? মাটিৰ পট্টা পাইছে নে নাই সেই কথা চিন্তা কৰিব নে বুলিও প্ৰশ্ন কৰে।
গগৈয়ে আৰু কয়, ”কোনোৱে যদি কোনো ধৰ্মৰ বিৰুদ্ধে সাম্প্ৰদায়িক মন্তব্য প্ৰদান কৰে তেন্তে কঠোৰ ব্যৱস্থা গ্ৰহণ কৰা হ’ব৷ হিন্দু, মুছলমান, খ্ৰীষ্টান, শিখ, জৈন, বৌদ্ধ যিয়ে নহওক কোনোৱে যদি ধৰ্মৰ বিৰুদ্ধে মন্তব্য প্ৰদান কৰে তেন্তে ৫ বছৰৰ জেল দিয়াৰ ব্যৱস্থা কৰা হ’ব৷ মই আজি কও যে এইখন অসম শংকৰ-আজানৰ অসম হৈ আছে আৰু সদায়েই থাকিব৷ আমি কেতিয়াও সাম্প্ৰদায়িক ৰাজনীতিত বিশ্বাস নকৰো৷ আমি অসমৰ সকলো জাতি, ধৰ্ম, বৰ্ণৰ সকলো লোকে নিজৰ সমাজৰ কথা কোৱাৰ অধিকাৰ আছে৷ কিন্তু নিজৰ সমাজৰ কথা ক’বলৈ গৈ বেলেগক গালি দিয়া বা অপমান কৰাটো আমাৰ সংস্কৃতি নহয়৷’’
গগৈয়ে কয় যে এয়া আমাৰ পৰম্পৰা নহয়৷ আমি পৰৱৰ্তী দিনত কঠোৰ আইন আনিম৷ কিয়নো আমি শান্তি-সম্প্ৰীতিৰে থাকিব বিচাৰো৷ যেনেকৈ প্ৰয়াত তৰুণ গগৈয়ে সমাজৰ প্ৰতিটো বৰ্গক সন্মান কৰিছিল, মৰম কৰিছিল তেনেকৈ আমি সকলোৰে আকাংক্ষা পূৰণ কৰিম৷ মানুহৰ মনৰ পৰা বেয়া চিন্তাবোৰ দূৰ কৰিব বিচাৰো৷ ৰাজনীতিক আমি নতুন দিশলৈ লৈ যাব খোজো৷ এইকেইদিন অসমত বহু লেতেৰা ৰাজনীতি কৰা হ’ল৷ এতিয়া আমি ৰাজনীতি সলনি কৰিবৰ সময় হ’ল বুলিও কয় গগৈয়ে।
জেন-জিৰ প্ৰাৰ্থী কুংকি চৌধুৰী আৰু তেওঁৰ পৰিয়ালক লৈ জঘন্য আৰু নিকৃষ্টভাবে মুখ্যমন্ত্ৰীয়ে অপমান কৰা সন্দৰ্ভত গৌৰৱ গগৈয়ে তীব্ৰ প্ৰতিক্ৰিয়া প্ৰকাশ কৰি কয় যে এগৰাকী মহিলাক আক্ৰমণ কৰি মুখ্যমন্ত্ৰীয়ে নিজৰ চৰিত্ৰ উদঙাই দিছে৷ নিজৰে চৰিত্ৰ কিমান নিম্ন তাৰ প্ৰমাণ দিছে মুখ্যমন্ত্ৰীয়ে৷ মুখ্যমন্ত্ৰীয়ে বজাৰ, তিনিআলিৰ আড্ডাত যিধৰণৰ কথা কয় সেইধৰণৰ কথা কৈ মুখ্যমন্ত্ৰী পদটোকে অপমানিত কৰিছে৷ মুখ্যমন্ত্ৰীয়ে অসমীয়া সমাজক অপমানিত কৰিছে বুলিও কয় গগৈয়ে৷ তেওঁ কয় যে আমি যিমান সোনকালে পাৰো সিমান সোনকালে এইজন মুখ্যমন্ত্ৰীক বিদায় দিব লাগিব৷ অসমীয়া সমাজে এইবাৰ মুখ্যমন্ত্ৰীৰ আসনৰ মৰ্যাদা ৰক্ষা কৰিব লাগিব বুলিও কয় গগৈয়ে৷ গৌৰৱ গগৈয়ে হিমন্ত বিশ্ব শৰ্মাক প্ৰকৃত সনাতনী নহয় বুলিও মন্তব্য কৰে।
আনহাতে, সভাত ভাষণ প্ৰদান কৰি অসম জাতীয় পৰিষদৰ সভাপতি লুৰীণজ্যোতি গগৈয়ে উপস্থিত ৰাইজক সমাজ ভাঙি থান-বান কৰা, মুখ্যমন্ত্ৰীৰ বাগান চোৱা-চিতা কৰা বিধায়কক সৰুপথাৰৰ পৰা উৎখাত কৰাৰ আহ্বান জনায়। তেওঁ মিত্ৰজোঁটৰ স’তে হাতে হাত ধৰি বিজেপিক উৎখাত কৰাৰ সংকল্প লোৱাৰ কথা দোহাৰিলে। অসম জাতীয় পৰিষদৰ সভাপতিগৰাকীয়ে মুখ্যমন্ত্ৰী হিমন্ত বিশ্ব শৰ্মাকো ক্ষুৰধাৰ সমালোচনা কৰে।
ভাষণ প্ৰসংগত তেওঁ অসম-নগালেণ্ড সীমা সমস্যা, এপেক্স বেংক কেলেংকাৰী, উচ্ছেদৰ পিছৰ পৰিস্থিতি, ভূমি পট্টা প্ৰদান আদি বিষয়সমূহ উপস্থাপন কৰে। তেওঁ অত্যাধিক মূল্য বৃদ্ধিৰ প্ৰসংগটো টানি আনি বিজেপি চৰকাৰে চামুচেৰে দি বেলচা নহয় জেচিবি মেচিনেৰে নিয়া বুলি কটাক্ষ কৰে। বৰ্তমান চৰকাৰে দিয়া আঁচনিৰ টকা বিধায়ক বা আন কাৰোবাৰ পকেটৰ পৰা প্ৰদান কৰা নাই। আঁচনি পোৱা মানেই কোনো বিজেপিৰ দাস নহয় বুলি তেওঁ তাৎপৰ্যপূৰ্ণ মন্তব্য কৰে। কংগ্ৰেছ মিত্ৰজোঁটৰ চৰকাৰ হ’লে কোনো মহিলাক আঁচনিৰ নামত অত্যাচাৰ নকৰে আৰু সকলোকে সমানে আঁচনি প্ৰদান কৰিব বুলি প্ৰতিশ্ৰুতি দিয়ে।