Lanslide in shillong -Dawaki Road:
দৈনিক অগ্ৰদূত ডিজিটেল ডেক্স:- চুবুৰীয়া মেঘালয়ৰ শ্বিলং-ডাউকী ঘাইপথত ভয়ংকৰ অঘটন ৷ সোমবাৰে প্ৰায় সন্ধিয়া ভাগত শ্বিলং-ডাউকি সংযোগী ৬নং ৰাষ্ট্ৰীয় পথত সংঘটিত হোৱা এক ভয়ংকৰ ভূমিস্খলনত বিধ্বস্ত হয় এখন বলেৰ’ পিকআপ ভান। পিকআপ ভান খনৰ ওপৰত পাহাৰৰ পৰা হোহোৱাই বাগৰি অহা প্রকাণ্ড শিল-মাটিয়ে পুতি পেলাই ৷ ভান খনৰ চালক সহ যাত্ৰীৰ মৃত্যুৰ আশংকা স্থানীয় লোকৰ।
আনহাতে ভূমিস্খলনৰ বাবে লেইটলিংকট-লিংকিৰ্ডেম অংশৰ পথটোৰ দুয়োফালে বন্ধ হৈ পৰে ৷পথৰ দুয়ো দিশত আবদ্ধ হৈ পৰে বহু যানবাহন। ইতিমধ্যে ঘটনাস্থলীত উদ্ধাৰকাৰী দল উপস্থিত হৈ ধ্বংসাৱশেষ আঁতৰোৱাৰ কাম কৰি আছে যদিও কিনকিনিয়া বৰষুণে বাধাৰ সৃষ্টি কৰিছে।
উল্লেখ্য যে ধাৰাবাহিক বৰষুণ আৰু পথ নিৰ্মাণৰ কামৰ বাবে এই অঞ্চলটো ভূমিস্খলনৰ উচ্চ বিপদজনক অঞ্চল হিচাপে পৰিগণিত হৈ আহিছে ৷আনহাতে কে’বাদিন ধৰি মেঘালয়ৰ অধিকাংশ অঞ্চলত অব্যাহত আছে কিনকিনীয়া বৰষুণ।