দৈনিক অগ্ৰদূত ডিজিটেল ডেস্ক : এজন নহয় দুজন নহয়, এক লক্ষ কৰ্মচাৰীক ছাটাই কৰাৰ সিদ্ধান্ত লৈছে জার্মান গাড়ী নির্মাতা প্রতিষ্ঠান ফক্সৱাগনে। সম্প্রতি বজাৰত তিষ্ঠি থকাৰ ক্ষেত্ৰত প্রতিষ্ঠানটো তীব্র প্রত্যাহ্বানৰ সম্মুখীন হৈছে।
এনে প্রত্যাহ্বান সৃষ্টি কৰিছে ট্রাম্পৰ শুল্ক আৰোপ, বজাৰত বৈদ্যুতিক বাহনৰ চাহিদাৰ হাস বৃদ্ধি আদিয়ে। এই ক্ষেত্ৰত প্রতিষ্ঠানটোৰ সন্মুখত সৰ্ববৃহৎ প্রত্যাহ্বানৰ সৃষ্টি কৰিছে চীনৰ গাড়ী নির্মাতা প্রতিষ্ঠানসমূহে ঘৰুৱা আৰু আন্তর্জাতিক বজাৰক গ্রাস কৰি আনিছে।
এনে পৰিস্থিতিত ফক্সৱাগনে অচিৰে এক লক্ষ কৰ্মচাৰীক চাকৰিৰ পৰা অব্যাহতি দিয়াৰ সিদ্ধান্ত লৈছে। অর্থনৈতিক বাস্তৱতাৰ স’তে কৰ্মচাৰীৰ সংখ্যা সামঞ্জস্যপূৰ্ণ কৰি ৰখাৰ উদ্দেশ্যে এই সিদ্ধান্ত লোৱা হৈছে বুলি প্রতিষ্ঠানটোৱে প্ৰকাশ কৰিছে।
প্রতিষ্ঠানটোৱে সদৰী কৰা মতে পূৰ্বে ৫০ হেজাৰ কৰ্মচাৰীক ছাটাইৰ সিদ্ধান্ত লোৱা হৈছিল। ইয়াকে লৈ প্রতিষ্ঠানটোৰ অভ্যন্তৰত আলোচনাও চলি আছিল। কিন্তু মূৰকত প্রতিষ্ঠানটোৱে আৰু ৫০ হেজাৰ অৰ্থাৎ মুঠ এক লাখ কৰ্মচাৰীক ছাটাইৰ সিদ্ধান্ত গ্রহণ কৰে। এই সিদ্ধান্ত প্রতিষ্ঠানটোৰ আটাইকেইটা ব্ৰেণ্ডৰে সন্মতিত গৃহীত হৈছে।
উল্লেখ্য যে ফক্সৱাগন ১০ টা ব্ৰেণ্ডৰ সমন্বয়ৰে গঠিত। এই বৃহৎ কৰ্মচাৰীক চাকৰিৰ পৰা অব্যাহতি দিবলৈ লোৱা সম্পৰ্কত প্রতিষ্ঠানটোরে কয়, ‘অর্থনৈতিক বাস্তৱতাৰ স’তে তাল মিলাই এই কৰ্মচাৰীৰ সংখ্যা সুশৃংখল কৰি ৰখাটো অপৰিহাৰ্য হৈছে। আমাৰ ব্যৱস্থাপনা কর্তৃপক্ষ আৰু শ্রমিক ইউনিয়নে এই ক্ষেত্রত সহমত পোষণ কৰিছে।’
তদুপৰি কাৰখানাসমূহৰ বিকল্প ব্যৱহাৰৰো গুণাগঁথাও কৰিছে প্রতিষ্ঠানটোৱে। শ্রমিক আৰু অংশীদাৰৰ দুই পক্ষৰ প্ৰতিনিধিৰে গঠিত ফক্সৱাগনৰ তদাৰকী পৰিষদেও স্পৰ্শকাতৰ বিষয়সমূহত আলোচনাৰ পোষকতা কৰিছে।
এই সম্পর্কত প্রতিষ্ঠানটোৰ মুখ্য কাৰ্যবাহী বিষয়া অলিভাৰ ব্লুমে কয়, ‘তদাৰকী পৰিষদত উত্থাপিত কাৰ্যবাহী পৰিষদৰ ভৱিষ্যৎ পৰিকল্পনা সম্পৰ্কীয় বিষয় সর্বসম্মতিক্রমে গৃহীত হৈছে। ফক্সৱাগনৰ ভৱিষ্যতৰ স্বাৰ্থত এই সিদ্ধান্ত গ্রহণ কৰা হৈছে।’
অৱশ্যে কৰ্মচাৰী ছাটাইৰ সিদ্ধান্তৰ বিৰুদ্ধে ফক্সৱাগনৰ শ্রমিক ইউনিয়ন সৰৱ হৈছে। সূত্রই জনোৱা মতে, শ্রমিকসকলে কর্তৃপক্ষৰ এই সিদ্ধান্তৰ বিৰুদ্ধে আন্দোলনৰ কাৰ্যসূচী গ্ৰহণৰো সম্ভাৱনা আছে। উল্লেখ্য যে ১৯৬০ত আইনৰ জৰিয়তে ফক্সৱাগনৰ ব্যক্তিগতকৰণ হয়।
এই আইন অনুসৰি প্ৰতিষ্ঠানটোৰ কোনো কাৰখানা স্থানান্তৰ বা নির্মাণ সম্পর্কীয় বিষয় তদাৰকী পৰিষদৰ দুই-তৃতীয়াংশ সদস্যৰ অনুমোদন সাপেক্ষেহে গৃহীত হয়।
