দৈনিক অগ্ৰদূত ডিজিটেল ডেস্ক: ইৰান সমর্থনপুষ্ট য়েমেনৰ হুথি বিদ্রোহীৰ আক্ৰমণৰ পৰা কথমপিহে প্ৰাণৰক্ষা পৰিল ১৩ ভাৰতীয় নাৱিকৰ। শেহতীয়াভারে প্রচণ্ড উত্থান ঘটা হুথি বিদ্রোহীয়ে সম্প্ৰতি বাব অল-মাণ্ডেব প্ৰণালীৰ গুৰুত্বপূৰ্ণ অংশ লোহিত সাগৰৰ পেৰিম দ্বীপ দখল কৰাৰ পাছত কালি এই জলপথৰে চলাচল কৰা বহু সংখ্যক জাহাজত ভয়াৱহ আক্রমণ সংঘটিত কৰে।
এই আক্ৰমণত ভাৰতৰ পতাকাযুক্ত এখন জাহাজো আক্রান্ত হয়। ফলত ১৩ জন ভাৰতীয় নাৱিকৰ কথমপিহে প্ৰাণৰক্ষা পৰে। আক্ৰমণৰ কৱলত পৰা এই জাহাজসমূহে বাব অল-মাণ্ডেব অভিমুখে যাত্ৰা কৰি আছিল।
আনহাতে, ইন্ধনৰ সংকট যে অৱধাৰিত সেয়া সম্প্রতি সম্পূৰ্ণৰূপে স্পষ্ট হ’ল। হুথিৰ বৃহৎ উত্থানৰ ফলত এই আশংকা গভীৰ হৈছে। কাৰণ কালি বিদ্রোহী সংগঠনটোৱে লোহিত সাগৰৰ পেৰিম দ্বীপ দখল কৰে। ফলত মধ্যপ্রাচ্য তথা পশ্চিম এছিয়াৰ পৰা জাহাজ চলাচলৰ আৰু এটা পথ বন্ধ হৈছে।
ইয়াৰ পূৰ্বৰে পৰা যোৱা ২৮ ফেব্ৰুৱাৰীৰ পৰা হৰমুজ প্রণালী কাৰ্যতঃ বন্ধ হৈ আছে। যোৱা ২৮ ফেব্ৰুৱাৰীত ইৰান যুদ্ধৰ সূত্রপাত হোৱাৰ পাছত দেশখনে প্রণালীটো বন্ধ কৰি দিয়ে। সম্প্রতি মার্কিন বাহিনীয়েও প্রণালীটো বন্ধ কৰি ৰাখিছে। এনেদৰে মধ্যপ্রাচ্যৰ পৰা তেল অহাৰ দুটাকৈ জলপথ বন্ধ হৈ পৰাত বিশ্বত খাৰুৱা তেলৰ প্ৰচণ্ড নাটনিয়ে দেখা দিয়াৰ আশংকা প্ৰৱল হৈছে।
উল্লেখ্য যে মধ্যপ্রাচ্যৰ পৰা তিনিটা জলপথৰে খাৰুৱা তেল সৰবৰাহ হৈছিল। ইয়াৰে দুটা হ’ল হৰমুজ প্রণালী আৰু বাব অল-মাণ্ডেব প্রণালী। সম্প্রতি এই দুটা প্রণালী বন্ধ হৈছে। তৃতীয়টো প্রণালী হ’ল কৃত্রিমভাৱে তৈয়াৰী ছুৱেজ খাল।
উল্লেখ্য যে ছৌদি আৰবৰ পূব দিশৰ খনিসমূহৰ পৰা খাৰুৱা তেল পশ্চিমৰ লোহিত সাগৰৰ তীৰলৈ অনাৰ বাবে পাইপৰ ব্যৱস্থা আছে। এই তেল মূলতঃ দুখন চহৰ ক্ৰমে য়ানবু আৰু ৰাঘিবলৈ যায়। তাৰ পৰা জাহাজৰে ঘাইকৈ বাব অল-মাণ্ডেবৰে খাৰুৱা তেলৰ সৰবৰাহ কৰা হৈছিল।
সম্প্ৰতি হুথি বিদ্রোহীয়ে এই জলপথৰ গুৰুত্বপূৰ্ণ অংশ পেৰিম দ্বীপ দখল কৰাত ছৌদি আৰবো স্বাভাৱিকতে সংকটৰ সন্মুখীন হৈছে। বাব অল-মাণ্ডেব প্রণালী সকলোতকৈ সংকীর্ণ অংশটো পেৰিম দ্বীপৰ ওচৰত অৱস্থিত। গতিকে হুথি বিদ্রোহীৰ কৱললৈ পেৰিম দ্বীপ যোৱাৰ পাছত এই জলপথৰে জাহাজৰ চলাচল একপ্ৰকাৰ বন্ধ হৈছে।
উল্লেখ্য যে যোৱা বৃহস্পতিবাৰে হুথি বিদ্রোহীয়ে য়েমেনৰ ম’চা চহৰো দখল কৰে। কেৱল সেয়াই নহয়, দুদিন পূর্বে সংগঠনটোৱে ছৌদি আৰবৰ পূব আৰু পশ্চিম অঞ্চলৰ তেলবাহী পাইপসমূহতো একাধিক আক্রমণ সংঘটিত কৰে। কৃত্রিম উপগ্রহে তোলা চিত্রত পাইপ লাইন অৱস্থিত স্থানৰ এশ কিলোমিটাৰ অঞ্চলজুৰি ঘন ক’লা ধোঁৱা নিৰ্গত হ’বলৈ দেখা গৈছিল।
ইয়াৰ পৰিপ্ৰেক্ষিতত কালিৰ পৰা ছৌদি আৰবে এই পাইপ লাইনসমূহৰে খাৰুৱা তেল সৰবৰাহ বন্ধ ৰাখিছে।