দৈনিক অগ্ৰদূত ডিজিটেল ডেস্ক: ঋণ গ্রহণত অসম চৰকাৰ যেন অঘোষিত নিগনি দৌৰত অৱতীৰ্ণ হৈছে। বণ্ড বিক্ৰীৰ জৰিয়তে নিৰন্তৰ ঋণ গ্রহণ কৰি আহিছে চৰকাৰখনে। ইয়াৰ পৰিণাম স্বৰূপে গঠনৰ পৰা এতিয়ালৈকে অর্থাৎ পাঁচ মাহত আঠবাৰ ঋণ গ্রহণ কৰিছে ড° হিমন্ত বিশ্ব শৰ্মা নেতৃত্বাধীন চৰকাৰখনে।
শেষবাৰৰ বাবে চৰকাৰখনে যোৱা পহিলা ছেপ্টেম্বৰত এহেজাৰ কোটি টকা ঋণ লয়। ইয়াকে ধৰি বৰ্তমানৰ চৰকাৰখনে যোৱা দিনকেইটাত ৭,৭৫০ কোটি টকা ঋণ লয়। ইয়াৰ পাছত এইবাৰ পুনৰ ১৪ শ কোটি টকা ঋণ ল’বলৈ চৰকাৰখন সাজু হৈছে।
অহা ১৫ ছেপ্টেম্বৰত দুখন পৃথক নিলাম জাননীৰ জৰিয়তে এই ঋণ লোৱা হ’ব। ইয়াৰে এখনত ছয়শ কোটি টকা আৰু আনখনত সাতশ কোটি টকা ঋণ গ্রহণ কৰা হ’ব। ছয়শ কোটি টকা ঋণ ৭.৬৬ শতাংশ সুতৰ হাৰত লোৱা হ’ব। ইয়াৰ বিপৰীতে সাতশ কোটি টকাৰ সুতৰ হাৰ নিলামৰ সময়ত নিৰ্ধাৰণ কৰা হ’ব।
উল্লেখ্য যে চৰকাৰ গঠনৰ একেবাৰে প্ৰাৰম্ভিক অৱস্থাত যোৱা ১২ মে’ত চৰকাৰখনে প্রথম এহেজাৰ কোটি টকা ঋণ লৈছিল। তাৰ পাছত ২৬ মে’ত ৭৫০ কোটি টকা, ১৬ জুনত এহেজাৰ কোটি টকা, ৩০ জুনত এহেজাৰ কোটি টকা আৰু ২১ জুলাইত এহেজাৰ কোটি টকা ঋণ গ্রহণ কৰে।
ইয়াৰ পাছত পুনৰ এহেজাৰ কোটি টকা ঋণ লয় যোৱা চাৰি আগষ্টত। তাৰ পাছত ১৮ আগষ্টতো এহেজাৰ কোটি আৰু পহিলা ছেপ্টেম্বৰত এহেজাৰ কোটি টকা ঋণ গ্রহণ কৰে।
এনেদৰে উপর্যুপৰি ঋণ গ্রহণে ৰাজ্যবাসীৰ মূৰৰ ওপৰত জনমূৰি ঋণৰ পৰিমাণ বৃদ্ধি কৰিছে; কিন্তু ইয়াৰ প্ৰতি কোনো ভ্রূক্ষেপ নাই চৰকাৰখনৰ। বৰঞ্চ বিতর্ক সৃষ্টি হ’লেই উন্নয়নমূলক কামৰ বাবেহে ঋণ গ্রহণ কৰাৰ দাবী চৰকাৰে কৰি আহিছে। কিন্তু প্রকৃততে উন্নয়নমূলক আৰু উৎপাদনশীল উদ্দেশ্যত ঋণৰ ধন কিমান ব্যৱহাৰ হৈছে সেয়া আন এক প্রশ্ন হৈ ৰৈছে।
প্রসংগক্রমে উল্লেখ্য যে বিত্ত বিভাগৰ চলিত বিত্তীয় বৰ্ষৰ প্ৰস্তাৱ অনুসৰি চৰকাৰৰ মুঠ ৰাজহ প্রাপ্তিৰ ৯.৪৪ শতাংশ ধন ঋণৰ সুত প্রদানত ব্যয় হ’ব। ইপিনে, অসম চৰকাৰৰ বৰ্তমানলৈ ঋণৰ পৰিমাণ বৃদ্ধি হৈছে ২,১১,৫৫০.৪০ কোটি টকালৈ।
