Karnataka: দৈনিক অগ্ৰদূত ডিজিটেল ডেস্ক: সম্প্ৰতি কর্ণাটকত চলি থকা নির্বাচন আয়োগৰ ভোটাৰ তালিকাৰ বিশেষ গভীৰ পুনৰীক্ষণ (এছআইআৰ) ক লৈ দেশজুৰি আলোড়ন হৈছে। কাৰণ এই গভীৰ পুনৰীক্ষণত আধাৰখ্যাত বিশিষ্ট প্রযুক্তিবিদ নন্দন নিলেকানিসহ বহু বিখ্যাত ব্যক্তিলৈ জাননী জাৰি হোৱাৰ তথ্য পোহৰলৈ আহিছে।
আনকি এনে জাননী ভাৰতৰত্ন প্ৰাপক অধ্যাপক চিএনআৰ ৰাওলৈও জাৰি হোৱা বুলিও ব্যাপক চর্চা হৈছে। অৱশ্যে ৰাৱে এনে জাননী পোৱা বুলি চর্চা শুদ্ধ নহয় বুলি নির্বাচন আয়োগে দাবী কৰিছে। আনহাতে, একাংশৰ মতে যদিহে এনে প্রসিদ্ধ ব্যক্তিয়েই জাননী লাভ কৰিবলগীয়া হৈছে তেন্তে সাধাৰণ তথা দৰিদ্ৰ লোকৰ ক্ষেত্ৰত এছআইআৰে কেনে সমস্যাৰ সৃষ্টি কৰিছে সেয়া সহজে অনুমেয়।
উল্লেখ্য যে দেশৰ প্ৰযুক্তি খণ্ডৰ এক উল্লেখনীয় নাম হ’ল নিলেকানি। তেওঁ বিখ্যাত ইনফ’ছিছ প্রতিষ্ঠানৰ সহ-প্রতিষ্ঠাপক হোৱাৰ উপৰি দেশৰ আধাৰ কাৰ্ড ব্যৱস্থাৰ মূল মস্তিষ্ক হ’ল নিলেকানি। বাংগালুৰু নিৱাসী নিলেকানিৰ উপৰি এছআইআৰৰ জাননী পোৱা আন বিখ্যাত ব্যক্তিসকলৰ অন্যতম উদ্যোগপতিদ্বয় নিতীন কামাথ আৰু নিখিল কামাথ।
বিষয়টোৱে সামাজিক মাধ্যমত ব্যাপক চর্চা অৰ্জন কৰিছে। সূত্ৰৰ মতে, অন্তিম এছআইআৰত নিলেকানিক ‘আনমেপড’ উল্লেখ আছিল। আনহাতে কামাথ ভ্রাতৃদ্বয়ৰ পিতৃ-মাতৃৰ কোনো এগৰাকীৰ নামৰ অমিল আছে। এই জাননীৰ জৰিয়তে এইসকল প্রখ্যাত ব্যক্তিকো শুনানিত উপস্থিত থাকিবলৈ কোৱা হৈছে। অৱশ্যে এই সন্দৰ্ভত বাংগালুৰুৰ জিলা নির্বাচন বিষয়া মহেশ্বৰ ৰাৱে বিষয়টোত আশ্চর্য প্ৰকাশ কৰি বিষয়টো পৰীক্ষা কৰাৰ আশ্বাস দিছে।
উল্লেখ্য যে কেৱল বাংগালুৰুৰে বৃহৎ সংখ্যক ভোটাৰলৈ এছআইআৰৰ জাননী জাৰি কৰা হৈছে। অৱশ্যে পূৰ্বে কৰ্ণাটকৰ মুখ্য নির্বাচন বিষয়া ভি অম্বুকুমাৰে ঘোষণা কৰিছিল যে পূৰ্বৰ ভোটাৰ তালিকাত ত্রুটি-বিচ্যুতি থকা ভোটাৰসকললৈহে জাননী জাৰি কৰা হ’ব।
আনহাতে, বিজ্ঞানী চিএনআৰৰ বিষয়টো সম্পৰ্কত বাংগালুৰুৰ জিলা নির্বাচন বিষয়াই কয় যে প্রসিদ্ধ বিজ্ঞানীজনলৈ এছআইআৰৰ জাননী জাৰি কৰা সম্পৰ্কত তেওঁ অৱগত নহয়। অৱশ্যে ২০০২ৰ ভোটাৰ তালিকা আৰু বৰ্তমানৰ ভোটাৰ তালিকাৰ মাজত নামৰ বিসংগতি থকাৰ বাবেহে বিজ্ঞানীজনলৈ জাননী জাৰি কৰা হৈছিল বুলি সূত্রই প্রকাশ কৰে।
২০০২ৰ ভোটাৰ তালিকাত তেওঁৰ নাম ৰামা, এইছ নাগেশ আৰৰ পুত্ৰ বুলি উল্লেখ থকাৰ বিপৰীতে বৰ্তমানৰ ভোটাৰ তালিকাত তেওঁৰ নাম অধ্যাপক চিএনআৰ বাও, নাগেশ আৰ এইছৰ পুত্ৰ বুলি উল্লেখ আছে। ইতিমধ্যে বুথ পৰ্যায়ৰ বিষয়াই তথ্য প্রকাশ কৰি ৰাওৰ নাম চূড়ান্ত ভোটাৰ তালিকাত সন্নিবিষ্ট কৰিবলৈ পৰামর্শ আগবঢ়ালে বুলিও সূত্রই সদৰী কৰিছে।
ইপিনে, জনপ্রিয় অভিনেতা প্রকাশ ৰাজৰ নাম বাংগালুৰুৰ ভোটাৰ তালিকাৰ পৰা এছআইআৰৰ জৰিয়তে আঁতৰোৱা হ’ল বুলি উত্থাপন হোৱা অভিযোগো নির্বাচন আয়োগে খণ্ডন কৰিছে।
আয়োগে দাবী কৰা অনুসৰি অভিনেতাজনৰ নাম বাংগালুৰুৰ শান্তিনগৰ বিধানসভা সমষ্টিৰ প্রথম খণ্ডৰ ৯৭০ ক্রমিক নম্বৰত আছে।
উল্লেখ্য যে কৰ্ণাটকৰ সাম্প্রতিক এছআইআৰ প্ৰক্ৰিয়াত ৪৩.৮১ লাখ জাননী জাৰি কৰাৰ তথ্য পোহৰলৈ আহিছে। ইতিমধ্যে ইয়াৰ শুনানি যোৱা তিনি ছেপ্টেম্বৰৰ পৰা আৰম্ভ হৈছে। শুনানি গ্রহণ প্রক্রিয়া অহা ১২ অক্টোবৰলৈ চলি থাকিব। লক্ষ্যণীয়ভাবে বাংগালুৰু নগৰ সমষ্টিত সর্বাধিক ৯.৪৬ লাখ জাননী জাৰি হৈছে। ইয়াৰ পাছতে আছে বিবিএমপি উত্তৰ সমষ্টি (৬.১৩ লাখ)।
