CCTV: দৈনিক অগ্ৰদূত ডিজিটেল ডেস্ক : ঔষধৰ দোকানৰ পৰা আৰম্ভ কৰি ডাঙৰ ফাৰ্মেচীলৈকে—সকলোতে এতিয়া লাগিব পাৰে CCTV! ফাৰ্মেচী আৰু অনুজ্ঞাপত্ৰপ্ৰাপ্ত দোকানত যাতে কেৱল চিকিৎসকৰ প্ৰেছক্ৰিপশ্যন অনুসৰিহে ঔষধ বিক্ৰী কৰা হয়, সেয়া নিশ্চিত কৰাৰ লক্ষ্যৰে এই নতুন নিয়ম অনাৰ প্ৰস্তাৱ কৰিছে কেন্দ্ৰীয় স্বাস্থ্য মন্ত্ৰালয়ে। ইয়াৰ বাবে Drugs Rules, 1945 সংশোধনৰ প্ৰস্তাৱ আগবঢ়োৱা হৈছে।
যোৱা আঠ ছেপ্টেম্বৰত স্বাস্থ্য আৰু পৰিয়াল কল্যাণ মন্ত্ৰালয়ৰ তৰফৰ পৰা এখন খচৰা নিৰ্দেশ জাৰি কৰা হয়। তাত কোৱা হৈছে যে পঞ্জীয়নভুক্ত চিকিৎসকৰ প্ৰেছক্ৰিপশ্যনত দিয়া ঔষধ পাইকাৰী বিক্ৰীৰ বাহিৰে অন্য ধৰণে যোগান বা বিক্ৰী কৰিব লাগিলে, সেই অনুজ্ঞাপত্ৰপ্ৰাপ্ত দোকান বা প্ৰতিষ্ঠানত CCTV নজৰদাৰী ব্যৱস্থা থকাটো বাধ্যতামূলক হ’ব।
লগতে কমেও তিনিমাহৰ CCTV ফুটেজ সংৰক্ষণ কৰিব লাগিব। এনে ব্যৱস্থাৰেই প্ৰস্তাৱ দিয়া হৈছে। ড্ৰাগছ কনছালটেটিভ কমিটি আৰু ড্ৰাগছ টেকনিকেল এডভাইজৰী ব’ৰ্ডৰ সদস্যসকলে এই প্ৰস্তাৱটো পৰ্যালোচনা কৰিছে।
চৰকাৰৰ বক্তব্য অনুসৰি, এই পদক্ষেপৰ জৰিয়তে ঔষধৰ দোকানত প্ৰেছক্ৰিপশ্যনভিত্তিক ঔষধৰ অনুমতিবিহীন বিক্ৰী নিয়ন্ত্ৰণ কৰিব পৰা যাব। ইয়াৰ ফলত ঔষধ বিক্ৰীৰ নিৰ্ভৰযোগ্যতাও বৃদ্ধি পাব।
কি কোৱা হৈছে প্ৰস্তাৱনাত?
Drugs Rules, 1945-ৰ ৬৫ নং ধাৰা সংশোধনৰ প্ৰস্তাৱ দিয়া হৈছে। নতুন নিয়ম অনুসৰি, অনুজ্ঞাপত্ৰপ্ৰাপ্ত দোকানত প্ৰেছক্ৰিপশ্যনভিত্তিক ঔষধ বিক্ৰীৰ ক্ষেত্ৰত CCTV নজৰদাৰী বাধ্যতামূলকভাৱে ৰাখিব লাগিব। CCTV এনেদৰে সক্ৰিয় কৰি ৰাখিব লাগিব, যাতে কোনো ঔষধ বিক্ৰী বা যোগান ধৰা হৈছিল নে নাই, পৰৱৰ্তী সময়ত সেয়া পৰীক্ষা কৰিব পৰা যায়।
লগতে CCTVৰ ৰেকৰ্ডিং কমেও তিনিমাহ সংৰক্ষণ কৰিব লাগিব। অৱশ্যে প্ৰস্তাৱিত CCTV ব্যৱস্থাৰ নিয়মৰ পৰা পাইকাৰী ঔষধ বিক্ৰেতাসকলক বাদ ৰখা হৈছে।
প্ৰস্তাৱটো চূড়ান্ত হ’লে প্ৰেছক্ৰিপশ্যনৰ ভিত্তিত ঔষধ বিক্ৰী বা যোগান ধৰাৰ এক তথ্য-নথি সৃষ্টি হ’ব। ফলত নিয়ম ভংগৰ অভিযোগ উঠিলে বিষয়টো পৰীক্ষা কৰাৰ লগতে প্ৰয়োজন সাপেক্ষে সংশ্লিষ্ট ঔষধৰ বিক্ৰীৰ তথ্য পৰীক্ষা কৰাৰ ক্ষেত্ৰত নিয়ন্ত্ৰক সংস্থাসমূহৰ হাতত আন এটা ব্যৱস্থা থাকিব।
এই প্ৰস্তাৱ এনে সময়ত আহিছে, যেতিয়া Schedule H, H1 আৰু X -ৰ অন্তৰ্ভুক্ত ঔষধৰ ক্ষেত্ৰত ইতিমধ্যে বিভিন্ন বিধিনিষেধ আছে। Drugs Rules অনুসৰি, এই ঔষধসমূহৰ ক্ষেত্ৰত চিকিৎসকৰ প্ৰেছক্ৰিপশ্যন সম্পৰ্কীয় নিৰ্দিষ্ট নিয়ম মানিব লাগে।
অৱশ্যে প্ৰস্তাৱিত CCTVৰ নিয়ম কেৱল Schedule H, H1 আৰু X-ৰ অন্তৰ্ভুক্ত ঔষধৰ ক্ষেত্ৰতে প্ৰযোজ্য হ’ব বুলি কোৱা হোৱা নাই।
প্ৰেছক্ৰিপশ্যনভিত্তিক ঔষধৰ ক্ষেত্ৰত নিয়ন্ত্ৰক সংস্থাসমূহৰ নজৰদাৰী বৃদ্ধি পোৱাৰ সময়তে এই প্ৰস্তাৱ আহিছে। বিশেষকৈ কাহৰ ঔষধ আৰু ছিৰাপৰ ক্ষেত্ৰত শেহতীয়াকৈ নিয়ন্ত্ৰণ অধিক কঠোৰ কৰাৰ দিশত গুৰুত্ব দিয়া হৈছে।
কিছুমান ঔষধৰ অপ্ৰয়োজনীয় বা ভুল ব্যৱহাৰ আৰু উপযুক্ত চিকিৎসকৰ পৰামৰ্শ অবিহনে বিক্ৰী বা যোগানক লৈ উদ্বেগ প্ৰকাশ কৰা হৈছে। সেইবাবেই চৰকাৰে নিৰ্দিষ্ট কিছুমান ঔষধৰ বিক্ৰী আৰু যোগানৰ ওপৰত নিয়ন্ত্ৰণ অধিক শক্তিশালী কৰাৰ দিশত আগবাঢ়িছে।
এই বিষয়টো শিশুৰ ক্ষেত্ৰতো বিশেষ গুৰুত্বপূৰ্ণ। কাৰণ শিশুৰ বাবে ঔষধ আৰু ঔষধৰ মাত্ৰা তেওঁলোকৰ বয়স আৰু শাৰীৰিক অৱস্থাৰ স’তে সামঞ্জস্যপূৰ্ণ হোৱাটো প্ৰয়োজনীয়। প্ৰস্তাৱিত ব্যৱস্থা কেৱল কাহৰ ছিৰাপৰ মাজতে সীমাবদ্ধ নহয়। প্ৰস্তাৱিত সংশোধনী অনুসৰি, প্ৰেছক্ৰিপশ্যনৰ ভিত্তিত বিক্ৰী হোৱা ঔষধৰ ক্ষেত্ৰতেই এই নিয়ম প্ৰযোজ্য হ’ব পাৰে।
এই প্ৰস্তাৱিত সংশোধনী সন্দৰ্ভত সাধাৰণ নাগৰিকৰ পৰা পৰামৰ্শ বিচাৰিছে কেন্দ্ৰীয় চৰকাৰে। পৰামৰ্শ আৰু আপত্তি জনোৱাৰ সময়সীমা শেষ হোৱাৰ পাছত খচৰাটো পুনৰ পৰ্যালোচনা কৰা হ’ব। ইয়াৰ পাছত চৰকাৰে প্ৰস্তাৱটো চূড়ান্তভাৱে জাননী জাৰি কৰি কাৰ্যকৰী কৰা হ’ব নে নহয়, সেই সন্দৰ্ভত সিদ্ধান্ত ল’ব পাৰে।
