দৈনিক অগ্ৰদূত ডিজিটেল ডেস্ক : জ্ঞানেশ কুমাৰৰ বিৰুদ্ধে প্ৰতিবাদক আৰু অধিক তীব্ৰ কৰি তুলিবলৈ শনিবাৰে (১০ অক্টোবৰ) যন্তৰ মন্তৰত বিক্ষোভ কাৰ্যসূচীৰ আহ্বান জনাইছে ককৰোচ জনতা পাৰ্টি (চিজেপি)-য়ে। এই কাৰ্যসূচীৰ পূৰ্বেই দলটোৰ শীৰ্ষস্থানীয় নেতাসকলক গ্ৰেপ্তাৰ কৰা হ’ব পাৰে বুলি আশংকা প্ৰকাশ কৰিছে চিজেপিয়ে। অৱশ্যে কেন্দ্ৰীয় চৰকাৰে এনে কোনো পৰিকল্পনা কৰি থাকিলে সেয়া ভুল হ’ব বুলি দাবী কৰিছে চিজেপিৰ নেতাসকলে।
দেওবাৰে নিশা সামাজিকমাধ্যমত এটা পোষ্ট কৰে চিজেপি নেতা সৌৰভ দাসে। তাত তেওঁ লিখে,“চৰকাৰে অভিজিৎ (চিজেপিৰ প্ৰতিষ্ঠাপক অভিজিৎ দীপকে), আশুতোষ (ৰাংকা), মোক আৰু ককৰোচ জনতা পাৰ্টিৰ আন নেতাসকলক গ্ৰেপ্তাৰ কৰাৰ পৰিকল্পনা কৰিছে।”
একে সময়তে তেওঁ লিখে, “চৰকাৰে যদি ভাবে যে তেওঁলোকৰ এনে স্বৈৰাচাৰী পদক্ষেপে কাম কৰিব, তেন্তে তেওঁলোকে ভুল কৰিছে। যুৱ প্ৰজন্ম জাগি উঠিছে। সকলোৰে প্ৰতি আমাৰ আহ্বান, নিজৰ অধিকাৰ আৰু ভৱিষ্যতৰ বাবে যুঁজ দিয়ক। সেয়া আমাৰ স’তেও কৰিব পাৰে, আমাৰ স’তে নোহোৱাকৈও কৰিব পাৰে।”কেন্দ্ৰক সতৰ্ক কৰি সৌৰভে জনায় যে তেওঁলোকে কাৰাগাৰলৈ যাবলৈ সাজু।
সৌৰভৰ এই পোষ্টৰ পাছতে সামাজিকমাধ্যমত এটা পোষ্ট কৰে চিজেপি প্ৰধান দীপকে। কেন্দ্ৰীয় গৃহমন্ত্ৰীক কটাক্ষ কৰি তেওঁ লিখে,“কিমানজনক গ্ৰেপ্তাৰ কৰিব, অমিত শ্বাহ? ১০ অক্টোবৰ (যন্তৰ মন্তৰত) সমগ্ৰ দেশ আহিব।”
দেশৰ মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগকে ধৰি একাধিক দাবীত শুকুৰবাৰে গান্ধী জয়ন্তীৰ দিনা মুম্বাইৰ শিৱাজী পাৰ্কত সমবেত হৈছিল ককৰোচসকল। তেওঁলোকৰ আহ্বানত হেজাৰ হেজাৰ লোকৰ সমাগম হৈছিল।
ভোটাৰ তালিকাৰ নিবিড় সংশোধন (এছআইআৰ)-ৰ নামত ব্যাপকভাৱে ভোটাৰৰ নাম বাদ দিয়া আৰু অনিয়মৰ প্ৰতিবাদ জনায় তেওঁলোকে। তাৰ পৰাই নিশা ‘দিল্লী চলো’ৰ আহ্বান জনায় দীপকে।
সমাজিক মাধ্যমত তেওঁ লিখে, “জ্ঞানেশ কুমাৰে পদত্যাগ নকৰিলে সমগ্ৰ দেশৰ ককৰোচ বাহিনীয়ে সমদল কৰি দিল্লীলৈ যাব আৰু অহা ১০ অক্টোবৰত যন্তৰ মন্তৰত বিক্ষোভ প্ৰদৰ্শন কৰিব। দিল্লী আৰক্ষীয়ে যদি আমাক বাধা দিয়াৰ চেষ্টা কৰে, য’ত আমাক ৰখাব, সেই স্থানেই আমাৰ যন্তৰ মন্তৰ হৈ পৰিব।”
ইয়াৰ পূৰ্বে নিটৰ প্ৰশ্নকাকত ফাদিলৰ বিৰুদ্ধে কেন্দ্ৰীয় শিক্ষামন্ত্ৰীৰ পদত্যাগৰ দাবীত দিল্লীত আন্দোলন কৰিছিল চিজেপিয়ে। যন্তৰ মন্তৰত তেওঁলোকৰ কাৰ্যসূচীক সমৰ্থন জনাই অনশন কৰিছিল লাডাখৰ পৰিৱেশকৰ্মী সোণম ৱাংচুকেও।
সেই সময়ত যোৱা ২০ জুলাইত আন্দোলনকাৰীসকলে যন্তৰ মন্তৰৰ পৰা সংসদ ভৱন অভিমুখে যাত্ৰাৰ আহ্বান জনাইছিল। অভিযোগ অনুসৰি, বিক্ষুব্ধ ছাত্ৰ-ছাত্ৰীৰ ওপৰত আৰক্ষীয়ে লাঠীচালনা কৰিছিল।
উল্লেখ্য যে,এছআইআৰৰ ফলত ভোটাৰ তালিকাৰ পৰা বহু ভোটাৰৰ নাম বাদ পৰাৰ অভিযোগ উত্থাপন হোৱাৰ পাছৰে পৰা দীৰ্ঘদিন ধৰি এই প্ৰক্ৰিয়াৰ বিৰুদ্ধে সৰৱ হৈ আহিছে বিৰোধীসকল।
অভিযোগ অনুসৰি, বৈধ ভোটাৰৰ নাম বাদ দি এনেদৰে বিজেপিক সুবিধা কৰি দিছে খোদ নিৰ্বাচন আয়োগে। এনে পৰিস্থিতিৰ মাজতে কিছুদিন পূৰ্বে ইংৰাজী দৈনিক ‘দ্য ইণ্ডিয়ান এক্সপ্ৰেছ’-এ এক অনুসন্ধানমূলক প্ৰতিবেদন প্ৰকাশ কৰে।
প্ৰতিবেদনটোত দাবী কৰা হয় যে এছআইআৰ চলি থকাৰ সময়ত আন দুগৰাকী নিৰ্বাচন আয়ুক্তক উপেক্ষা কৰি জ্ঞানেশে অকলে এটাৰ পাছত এটাকৈ সিদ্ধান্ত গ্ৰহণ কৰি গৈছিল। যোৱা ১০ মাহত তেওঁৰ সিদ্ধান্তৰ বিৰুদ্ধে আন দুগৰাকী নিৰ্বাচন আয়ুক্ত সুখবিন্দৰ সিং সঁধু আৰু বিবেক যোশীয়ে ১৪ বাৰ লিখিত আপত্তি দিছিল। কিন্তু তেওঁলোকৰ আপত্তিক গুৰুত্ব দিয়া হোৱা নাছিল বুলি অভিযোগ।
এই ধৰণৰ অভিযোগ অস্বীকাৰ কৰিছে নিৰ্বাচন আয়োগে। কিন্তু তাৰ পাছৰে পৰা বিক্ষোভে তীব্ৰ ৰূপ ধাৰণ কৰিছে। জ্ঞানেশৰ পদত্যাগৰ দাবীও অধিক জোৰদাৰ হৈছে।
