USMidtermElections : দৈনিক অগ্ৰদূত ডিজিটেল ডেস্কঃ নৱেম্বৰ মাহত আমেৰিকাত মধ্যৱৰ্তী নিৰ্বাচন। ভোটগ্ৰহণ শেষ হ’লেই ইৰানত পুনৰ বৃহৎ আক্ৰমণ চলাব পাৰে আমেৰিকাই। শুকুৰবাৰে তেনে হুংকাৰ দিয়া দেখা গ’ল মাৰ্কিন ৰাষ্ট্ৰপতি ড’নাল্ড ট্ৰাম্পক। ইয়াৰ পূৰ্বে শুনিবলৈ পোৱা গৈছিল যে এইবাৰ সমুদ্ৰৰ তলত চকু ৰাখিছে তেহৰানে।
আমেৰিকা বা ইজৰাইলে পুনৰ আক্ৰমণ চলালে সমুদ্ৰৰ তলত আক্ৰমণ কৰি ইণ্টাৰনেট কেৱল ধ্বংস কৰিব ইৰানে। এই ৰণহুংকাৰৰ পিছতে প্ৰত্যুত্তৰ দিলে ট্ৰাম্পে! তেওঁ জনালে, তেনে হ’লে আৰু অধিক বৃহৎ আক্ৰমণৰ সন্মুখীন হ’ব লাগিব ইৰান।
শুকুৰবাৰে ফ্লৰিডাৰ এখন সভাত মাৰ্কিন ৰাষ্ট্ৰপতিগৰাকীক কোৱা শুনা গ’ল, “হয়তো এইবাৰ আমি আৰু অধিক ভয়াৱহ আক্ৰমণ চলাবলৈ আগবাঢ়িছোঁ।” একে সময়তে তেওঁ কয়, “যদি তেওঁলোক বুদ্ধিমান হ’লহেঁতেন, তেন্তে হয়তো ক’লেহেঁতেন, আহক, কামৰ কথালৈ অহা যাওক। কিন্তু মোৰ ধাৰণা, তেওঁলোকে তেনে নকৰে, কাৰণ সম্ভৱতঃ তেওঁলোক বুদ্ধিমান নহয়।”
ইয়াৰ পূৰ্বে জানিব পৰা গৈছিল যে আমেৰিকা আৰু ইজৰাইলে পুনৰ আক্ৰমণ চলালে এইবাৰ সমুদ্ৰৰ তলত আক্ৰমণ চলোৱাৰ পৰিকল্পনা কৰিছে ইৰানে। সঁচাকৈয়ে তেনে হ’লে ইণ্টাৰনেটৰ কেবল ধ্বংস হৈ যাব পাৰে। তেনে পৰিস্থিতিত মধ্যপ্ৰাচ্যৰ যোগাযোগ ব্যৱস্থা আৰু ইণ্টাৰনেট সেৱা সম্পূৰ্ণৰূপে ব্যাহত হ’ব পাৰে।
উল্লেখ্য যে চলিত মাহৰ আৰম্ভণিতে মাৰ্কিন ৰাষ্ট্ৰপতি ড’নাল্ড ট্ৰাম্পে মন্তব্য কৰিছিল যে ইৰানৰ সৈতে আমেৰিকা-ইজৰাইলৰ যুদ্ধ অষ্টম মাহত ভৰি দিছে। এনে পৰিস্থিতিত ইৰানক প্ৰকৃততে কোনে পৰিচালনা কৰি আছে, সেয়া কোনেও নাজানে। ট্ৰাম্পে কৈছিল, “তেওঁলোকৰ নেতাসকল নাই, দ্বিতীয় শাৰীৰ নেতাসকলো নাই। আটাইতকৈ ডাঙৰ সমস্যা হ’ল, দেশখন প্ৰকৃততে কোনে চলাই আছে, সেয়া কোনেও নাজানে।” অৱশ্যে, এই দাবী খাৰিজ কৰিছে ইৰানে।
প্ৰকৃততে, বৰ্তমান যুদ্ধবিৰতি চলি থাকিলেও বাকযুদ্ধত কোনেও কাকো এ ইঞ্চি মাটিও এৰি দিবলৈ ৰাজী নহয়। মাৰ্কিন ৰাষ্ট্ৰপতি ড’নাল্ড ট্ৰাম্পৰ ‘ফিনিছ দ্য জব’ মন্তব্যৰ প্ৰত্যুত্তৰত ইৰানৰ বৈদেশিক মন্ত্ৰী আব্বাছ আৰাঘচিয়ে যোৱা সপ্তাহত মুখ খুলিছিল। কঠোৰ সুৰত তেওঁ কৈছিল, “পুনৰ ভাগ্য পৰীক্ষা কৰিব বিচাৰিলে আহক। আপোনালোকক আদৰিবলৈ আমি সাজু।”
ইয়াৰ উপৰি কঠোৰ ভাষাৰে ইজৰাইলৰ প্ৰধানমন্ত্ৰী বেঞ্জামিনকো লক্ষ্য কৰি লৈছিল আৰাঘচিয়ে। সেই হুংকাৰৰ পৰৱৰ্তী অধ্যায়তে এইবাৰ সমুদ্ৰৰ তলত আক্ৰমণৰ হুংকাৰ দিয়া দেখা গ’ল তেহৰানক। নিজৰ স্বভাৱসিদ্ধ ভংগীমাৰে প্ৰত্যুত্তৰ দি ট্ৰাম্পে বুজাই দিলে যে যুদ্ধবিৰতি সম্ভৱতঃ নিতান্তই সাময়িক ব্যৱস্থাহে।
