দৈনিক অগ্ৰদূত ডিজিটেল ডেস্ক : দিল্লীৰ ৰামলীলা ময়দানত দেওবাৰে অৰ্থাৎ এক নৱেম্বৰত প্ৰতিবাদী কাৰ্যসূচীৰ আয়োজন কৰিছে বিজেপি-বিৰোধী মিত্ৰজোঁট ‘ইণ্ডিয়া’ই। এই কাৰ্যসূচীলৈ সমৰ্থন জনাইছে ককৰচ জনতা পাৰ্টি (চিজেপি)য়ে। আইছাৰ নেত্ৰী নেহা বৰাইও শুকুৰবাৰে নিশা ৰামলীলা ময়দানত সমবেত হ’বলৈ আহ্বান জনাইছে।
দেশৰ মুখ্য নিৰ্বাচন আয়ুক্ত জ্ঞানেশ কুমাৰৰ অপসাৰণৰ দাবীত আৰু ভোটাৰ তালিকাৰ বিশেষ নিবিড় সংশোধন (এছআইআৰ) বাতিলৰ দাবীত বিৰোধীয়ে গ্ৰহণ কৰা এই কাৰ্যসূচীক কেন্দ্ৰ কৰি দেওবাৰে পুনৰ উত্তপ্ত হৈ পৰিব পাৰে ৰাজধানী দিল্লী। আৰক্ষীয়ে ৰামলীলা ময়দানত কাৰ্যসূচী অনুষ্ঠিত কৰাৰ অনুমতি দিছে। কিন্তু লোকসভাৰ বিৰোধী দলপতি ৰাহুল গান্ধীয়ে কনট প্লেচ-মিণ্টো ৰোডৰ সংযোগস্থলৰ পৰা ৰামলীলা ময়দানলৈ উলিওৱাৰ বাবে আহ্বান জনোৱা সমদলটোৰ আনুষ্ঠানিক অনুমতি দিয়া হোৱা নাই বুলি জানিব পৰা গৈছে।
ইনষ্টাগ্ৰামত প্ৰশ্নোত্তৰ পৰ্বৰ এটা অনুষ্ঠানত ৰামলীলা ময়দানলৈ উলিওৱা সমদলত সাধাৰণ ৰাইজক অংশগ্ৰহণ কৰিবলৈ আহ্বান জনাইছে ৰাহুল গান্ধীয়ে। দেওবাৰে দুপৰীয়া কনট প্লেচ-মিণ্টো ৰোডৰ পৰা আৰম্ভ হ’ব এই সমদল।
আৰক্ষী সূত্ৰৰ দাবী, এনে কোনো সমদলৰ বাবে অনুমতি বিচৰা হোৱা নাই। আনকি, এনে সমদল উলিওৱাৰ পৰিকল্পনা থকাৰ বিষয়েও বিৰোধীয়ে আৰক্ষীক অৱগত কৰা নাই। কিন্তু দেওবাৰে ৰামলীলা ময়দানত উপস্থিত হোৱাৰ পূৰ্বেই ৰাহুল গান্ধীহঁতক বাধা দিয়া হ’ব নেকি?
এই সন্দৰ্ভত আৰক্ষীয়ে বৰ্তমানলৈ কোনো মন্তব্য কৰা নাই। এগৰাকী জ্যেষ্ঠ বিষয়াই সংবাদ মাধ্যমক জনোৱা অনুসৰি, পৰিস্থিতিৰ ওপৰত নিৰ্ভৰ কৰি ব্যৱস্থা গ্ৰহণ কৰা হ’ব। আগতীয়াকৈ কি হ’ব, সেয়া কোৱা সম্ভৱ নহয়। পৃথককৈ কোনো সমদলৰ অনুমতি বিচৰা হোৱা নাই বুলি নিশ্চিত কৰিছে ডিচিপি (চেণ্ট্ৰেল) ৰোহিত ৰাজবীৰ সিং আৰু ডিচিপি (নতুন দিল্লী) সচিন শৰ্মাই।
দেওবাৰে ‘চলো দিল্লী’ অভিযানৰ আহ্বান জনাইছে ৰাহুল গান্ধীয়ে। বিৰোধী মিত্ৰজোঁটৰ আন সহযোগী দলসমূহৰ প্ৰতিনিধিসকলেও এই সমাৱেশত অংশগ্ৰহণ কৰিব। বুধবাৰে চিজেপিৰ মুৰব্বী অভিজিৎ দীপকে সামাজিক মাধ্যমত জনায় যে জ্ঞানেশৰ অপসাৰণৰ দাবী অধিক শক্তিশালী কৰিবলৈ আৰু গণতন্ত্ৰ ৰক্ষাৰ স্বাৰ্থত তেওঁলোকে ‘ইণ্ডিয়া’ৰ কাৰ্যসূচীক সমৰ্থন জনাইছে।
শুকুৰবাৰে প্ৰকাশ কৰা এটা ভিডিঅ’ বাৰ্তাত নেহাই কয়, ‘‘জ্ঞানেশ কুমাৰৰ পদত্যাগ, এছআইআৰ প্ৰক্ৰিয়া স্থগিত ৰখা আৰু ২০২৩ চনৰ আইন প্ৰত্যাহাৰৰ দাবীত আমাৰ আন্দোলন ১ নৱেম্বৰত ৰামলীলা ময়দানত পুনৰ আৰম্ভ হ’ব। গণতন্ত্ৰৰ পৱিত্ৰতা ৰক্ষাৰ স্বাৰ্থত সকলোৱে তাত সমবেত হওক। দেখা হ’ব।’’
বিৰোধীৰ এই কাৰ্যসূচীক কেন্দ্ৰ কৰি উৎসৱৰ বতৰ শেষ হোৱাৰ পিছত ৰাজধানীত পুনৰ উত্তেজনা বিয়পি পৰাৰ আশংকা কৰা হৈছে। পৰিস্থিতি নিয়ন্ত্ৰণৰ বাবে আৰক্ষীও সাজু হৈছে। ৰামলীলা ময়দান আৰু অন্যান্য স্থানত নিৰাপত্তা ব্যৱস্থা অধিক শক্তিশালী কৰা হৈছে।
