অসমত কৰ’নাৰ সংহাৰী ৰূপে উদ্বেগজনক পৰিস্থিতি সৃষ্টি কৰাৰ সময়তে পুনৰ পাঁচজন লোক কৰ’নাত মৃত্যু হয় । ইয়াৰ ভিতৰত জি এম চিৰ চকুৰোগ বিশেষজ্ঞ ডা° জাহান ইকবাল আহমেদৰ মৃত্যুক লৈ চাঞ্চল্যৰ সৃষ্টি হৈছে । কৰ’নাত আক্ৰান্ত হৈ মৃত্যু হোৱা ডা° আহমেদ প্ৰথমজন চিকিৎসক । তদুপৰি মৃত্যুৰ পূৰ্বৰ ঘটনাৰাজিও চাঞ্চল্যকৰ ৷ মহানগৰীৰ বাঘবাৰীৰ বাসিন্দা ডা° আহমেদ বিগত কে’বাদিনো ধৰি জ্বৰ আৰু কাহত ভূগি আছিল ৷ ঘৰতে তেওঁ ইয়াৰ চিকিৎসাও কৰিছিল ৷
ইয়াৰ পিছত সোমবাৰে তেওঁ উশাহ লোৱাত কষ্ট অনুভৱ কৰে ৷ পৰিয়ালৰ লোকে তেওঁক জি এম চি চিকিৎসালয়লৈ আনে যদিও তাৰ পূৰ্বেই তেওঁ শেষ নিশ্বাস ত্যাগ কৰে ৷ তেওঁৰ মৃত্যুৰ লক্ষণবোৰ কৰ’নাৰ লগত মিল থকাত মৃতদেহৰ পৰা নমুনা সংগ্ৰহ কৰি পৰীক্ষা কৰা হয় । নিশা অহা ফলাফল অনুসৰি স্বাস্থ্য বিভাগে চিকিৎসকজন কৰ’নাত আক্ৰান্ত বুলি নিশ্চিত কৰে ৷ চিকিৎসকজন ক’ৰ পৰা কেনেকৈ কৰ’নাত আক্ৰান্ত হ’ল সেয়া নিশ্চিত হোৱা নাই ।
ইপিনে স্বাস্থ্যমন্ত্ৰী ড° হিমন্ত বিশ্ব শৰ্মাই সদৰী কৰে যে সোমবাৰৰ দিনটোত ডা° আহমেদৰ উপৰি কৰ’নাত আক্ৰান্ত হৈ মৃত্যু হোৱা আন লোককেইজন হ’ল ক্ৰমে গোলাঘাটৰ উত্তম দাস(৩১), কামৰূপ মহানগৰৰ কেশৱ কুমাৰ বৰুৱা(৬২) আৰু মহানগৰৰে কাৰ্তিক কলিতা(৩০) ৷ ইয়াৰ উপৰি মঙলদৈত মৃত্যু হোৱা দুনী কনিষ্ঠ মহাবিদ্যালয়ৰ অৱসৰপ্ৰাপ্ত অধ্যক্ষ শৰৎ চহৰীয়া (৬১)ৰো কৰ’নাত আক্ৰান্ত হোৱাটো নিশ্চিত কৰা হয় ৷ আনহাতে ৰাজ্যত পুনৰ ১০০১ জনৰ শৰীৰত ধৰা পৰিছে কৰ’না ভাইৰাছৰ উপস্থিতি ৷ ইয়াৰে ৫১৩ জন গুৱাহাটীৰ । আনহাতে ৰাজ্যত কৰ’নাত আক্ৰান্ত হৈছে ১৭,৮০৭ জন৷সুস্থ হৈছে ১১,৪১৬ জন,চিকিৎসাধীন হৈ আছে ৬৩৪৮ জন আৰু মৃত্যু হৈছে ৫২ জনৰ ।