এগৰাকী ৮০ বছৰীয়া অকলশৰীয়া আইতা, নাম বীণাপাণি দাস ৷ ঘৰৰ ফুটাৰে আকাশৰ তৰা গণিব পৰা এটা উৰুখা পঁজাত জীৱন নিৰ্বাহ কৰে তেঁও ৷ পৰিয়ালৰ আন সদস্য বুলিবলৈ কোনো এজনেই নাই আইতা গৰাকীৰ ৷ নিজৰ বস্তিৰ মাটি টুকুৰাত ৰোপণ কৰা দুডালমান তামোলগছৰ তামোল বিক্ৰী কৰি পোৱা ধনৰ লগতে সেইখিনি শেষ হ’লে গাঁওখনৰ লোকৰ ঘৰে ঘৰে খুজিমাগি অকলশৰীয়া পৰিয়ালটো কোনোমতে চলাই নিয়ে তেঁও ৷
বাক্সা জিলাৰ শালবাৰী মহকুমা সদৰ শালবাৰীৰ উত্তৰ দিশে থকা ভূঞাপাৰা নামৰ গাঁওখনৰেই বাসিন্দা আইতা বীণাপাণি দাস ৷ প্ৰায় ৩৫ বছৰ ধৰি অকলশৰীয়া জীৱন কটাই অহা আইতা গৰাকীৰ বেমাৰ আজাৰ হ’লেও আলপৈচান ধৰোতা কোনো নাই ৷
কিন্তু আশ্বৰ্যজনকভাৱে চৰকাৰে ৰাজ্যৰ দুখীয়া দৰিদ্ৰ জনসাধাৰণৰ বাবে যিবোৰ আঁচনি ৰূপায়ণ কৰি আহিছে তাৰ কোনো এটাই আজিও ঢুকি নাপালে আইতা বীণাপাণি দাসক ৷ বহু গাঁওত বহু ধনীক শ্ৰেণীয়েও চৰকাৰী গৃহ লাভ কৰাৰ উদাহৰণ সৰ্বদিশে । কিন্তু বীণাপাণি দাসৰ কপালত যেন সেইয়া নাই ৷ এসাঁজ খাই এসাঁজ লঘোণে থকা দৰিদ্ৰ আইতাগৰাকীয়ে আশীৰ দেওনা পাৰ হোৱাৰ সময়তো লাভ নকৰিলে এটা চৰকাৰী গৃহ ৷
তেঁওৰ গৃহত উপস্থিত হোৱা সাংবাদিকৰ আগত থোকাথুকি মাতেৰে কয়- “চৰকাৰে মোক একো নিদিলে ৷ বৰষুণ পৰা ঘৰটোতে কোনোমতে থাকো ৷ কিবা অলপ দিছিল তাকো কোনোবাই কাঢ়ি নিলে ৷ কেইমাহমান বৃদ্ধ পেঞ্চনৰ অলপ পইচা পাইছিলোঁ, পিছে বহুবছৰেই হ’ল সেইবোৰো নাই ৷ বৃদ্ধ পেঞ্চনৰ পইচা মোক নিদিয়ে ৷”
গাঁওৰ বহু লোকে ধান চাউলে দি সহায় কৰা বুলি কোৱা আইতা গৰাকীক চৰকাৰী শৌচাগাৰ এটাও কোনো এজন চৰকাৰী প্ৰতিনিধিয়ে নিদিলে বুলি দুখ প্ৰকাশ কৰি ঘৰত যিটো দমকল আছে সেইটোৰেও মাজে মাজে পানী নোলোৱাত বহু দূৰৰ পৰা পানী আনিব লগা হয় বুলিও আক্ষেপ প্ৰকাশ কৰে ৷ এই প্ৰতিবেদনৰ পিছতেই সংশ্লিষ্ট বিভাগ, ব্যক্তিবিশেষে অশীতিপৰ বৃদ্ধা আইতাগৰাকীক যৎকিঞ্চিৎ সহায় আগবঢ়াব বুলি আমি আশাবাদী