গুৱাহাটী মহানগৰীৰ ছোৱালী হোষ্টেলত ওলাল নাহৰফুটুকী বাঘ

গুৱাহাটী মহানগৰীৰ হেঙেৰাবাৰীৰ মাইলষ্ট’ন ছোৱালী হোষ্টেলত প্ৰকাণ্ড নাহৰফুটুকী বাঘ । ঘটনাটোক লৈ অঞ্চলটোত প্ৰবল উত্তেজনাৰ সৃষ্টি হয়।জানিব পৰা মতে,মাইলষ্ট’ন নামৰ ছোৱালী হোষ্টেলৰ বাৰাণ্ডাত চোফাৰ তলত সোমাই আছিল নাহৰফুটুকীটো । হোষ্টেলটো তত্বাৱধায়কে জনোৱা মতে,ৰাতিপুৱা গেট খুলিবলৈ আহি চোফাৰ তলত পৰি থকা কাপোৰ তুলি লওঁতে হাতত লাগি আহিছিল বাঘৰ নোম। আৰু চকীৰ তলত শুই থকা বাঘ দেখি তৎক্ষণাত সেই ঠাইৰ পৰা দৌৰি ভিতৰ সোমাই তত্বাৱধায়ক মৌচুমী বৰা। দৌৰি আহি ভিতৰত সোমাই ঘৰৰ সকলোকে সাৱধান কৰি বন বিভাগক খবৰ দিয়ে মৌচুমীয়ে । বন বিভাগৰ দল উপস্থিত হৈ বাঘটোক ট্ৰেংকুলাইজ কৰিবলৈ চেষ্টা চলাই আৰু প্ৰায় তিনি ঘণ্টা মূৰত অৱশেষত প্ৰকাণ্ড বাঘটো বন বিভাগে ট্ৰেংকুলাইজ কৰিবলৈ সক্ষম হয়। আৰু বাঘটো ট্ৰেংকুলাইজ কৰি চিৰিয়াখানালৈ প্ৰেৰণ কৰে।