ৰাজধানীৰ ঐতিহ্যমণ্ডিত অশোক হোটেলৰ দায়িত্ব বেচৰকাৰী সংস্থাক দিয়াৰ সিদ্ধান্ত গ্ৰহণ কৰিলে কেন্দ্রই । ৬৫ বছৰ পুৰণি এই চৰকাৰী সম্পত্তিৰ পৰা চৰকাৰৰ কোনো লাভ নোহোৱাৰ বাবেই এই সিদ্ধান্ত গ্ৰহণ কৰিছে বুলি সূত্রৰ খবৰ । বৰঞ্চ, চৰকাৰী হিচাপ অনুযায়ী হোটেলখনক নতুন কার্পেট, নতুন আচবাবেৰে নতুনকৈ সাজাওতে ৫০০ কোটি টকা ব্যয় হ’ব পাৰে । সেয়ে কেন্দ্রই সিদ্ধান্ত লৈছে যে এই বিশাল ব্যয়ৰ বোজা চৰকাৰৰ কান্ধত নলৈ সেই ভাৰ কোনো বেচৰকাৰী সংস্থাৰ হাতত তুলি দিয়াৰ ।
এক সর্বভাৰতীয় সংবাদ সংস্থাৰ প্রকাশিত প্ৰতিবেদনত এই তথ্য জনোৱা হৈছে । প্ৰতিবেদনত কোৱা হৈছে, কেন্দ্রই ৬০ বছৰৰ বাবে চুক্তি ভিত্তিক ভাৰা দিব বিচাৰিছে অশোক হোটেলক । ইয়াৰ বাবে বৃহৎ অংকৰ ধন লিজৰ লগতে বার্ষিক লভ্যাংশও দাবী কৰিব পাৰে কেন্দ্রই । এই বিষয়ত শীঘ্রে মন্ত্রীসভাই সিদ্ধান্ত ল’ব বুলিও জানোৱা হৈছে প্ৰতিবেদনখনত ।
কোষাগাৰৰ অৱস্থা পুনৰ সৱল কৰি তুলিবলৈ সম্প্রতি বিভিন্ন চৰকাৰী সম্পত্তিৰ বেচৰকাৰীকৰণৰ পৰিকল্পনা কৰিছে কেন্দ্রই । অশোক হোটেলক লৈ এই সিদ্ধান্ত সেই পৰিকল্পনাৰেই অংগ বুলি অনুমান কৰা হৈছে । প্রায় চাৰে ২১ একৰ ভূমিৰ ওপৰত তৈয়াৰী এই হোটেলখনত ৫০০টা ঘৰ আছে । ইয়াৰ উপৰি হোটেলৰ কাষত বহু খালি ভূমি আছে । ইয়াৰ ভিতৰত ৮.১ একৰ ভূমি পৃথককৈ লিজত দিয়াৰ কথা ভাবিছে কেন্দ্রই । ৬.৩ একৰ ভূমি হোটেল চৌহদতেই বিশেষ সেৱাযুক্ত এপার্টমেন্ট তৈয়াৰ কৰিবৰ বাবে দিয়া হ’ব । বাকী ১.৮ একৰ অন্যান্য বাণিজ্যিক কাৰ্যত ব্যৱহাৰ কৰিবৰ বাবে ভাৰা দিয়া হ’ব । কেন্দ্র সূত্রে খবৰ এই ভূমিবোৰ ৯০ বছৰৰ বাবে লিজত দিয়া হ’ব । ম্যাদ উকলিলে পুনৰ চৰকাৰৰ হাততেই ঘূৰি আহিব ।
১৯৫৬ত ৰাষ্ট্ৰসংঘৰ এক সন্মিলনৰ বাবে তৈয়াৰ কৰা হয় অশোক হোটেল । ভাৰতৰ প্রথম প্রধানমন্ত্রী জৱাহৰলাল নেহৰুৱে হোটেলখন তৈয়াৰ কৰিছিল জম্মু কাশ্মীৰৰ তৎকালীন যুৱৰাজ কর্ণ সিঙে দান কৰা ২৫ একৰ ভূমিৰ ওপৰত । হোটেলখনৰ আধুনিক ভাৰতীয় স্থাপত্যৰ নক্সা প্ৰস্তুত কৰিছিল স্থপতি ই বি ডক্টৰে । ৬৫ বছৰ পাছত সেই ঐতিহ্যমণ্ডিত সম্পত্তিৰ বেচৰকাৰীকৰণৰ সিদ্ধান্ত লয় যদিও হোটেলৰ স্থাপত্যত যাতে কোনো ধৰণৰ পৰিৱৰ্তন নঘটে সেই বিষয়টো লক্ষ্য ৰাখিব কেন্দ্রই । এই বিষয়ত চর্তও আৰোপ কৰা হ’ব চুক্তিপত্রত । সূত্রৰ খবৰ কোনো এটা সংস্থা বা একাধিক সংস্থাই একেলগে আবেদন কৰিব পাৰে । সর্বোচ্চ মূল্য দিবলৈ আগ্রহীকেই নিৰ্বাচিত কৰা হ’ব কেন্দ্রৰ তৰফৰ পৰা । ইয়াৰ পৰা লাভ কৰা এককালীন অর্থৰ এটা বৃহৎ অংশ ঋণ পৰিশোধ কৰিবলৈ আৰু স্বেচ্ছাবাসৰ প্রকল্পৰ কাৰ্যত লগাব পাৰে কেন্দ্রই ।