একেৰাহে দুনিশা আৰক্ষীৰ লক-আপত কটালে কোটি কোটি টকা আত্মসাৎ কৰি বিলাসী জীৱন কটোৱা অসম ক্ৰিকেট সন্থাৰ প্ৰাক্তন সম্পাদক প্ৰদীপ বুঢ়াগোহাঁয়ে । যোৱা নিশা মহানগৰীৰ ফটাশিল আমবাৰী আৰক্ষী থানাৰ আৰক্ষীয়ে টিংখাঙত গ্ৰেপ্তাৰ কৰাৰ পাছত আজি এচিএৰ প্ৰাক্তন সম্পাদকজনক গ্ৰেপ্তাৰ কৰা হয় । আজি তেওঁক আদালতত হাজিৰ কৰাব বুলি আৰক্ষী সূত্ৰই জনাইছে । নিজৰ কাৰ্যকালত নানা জালিয়াতিৰে কে’বা কোটি টকা সৰকোৱা বুঢ়াগোহাঁইৰ বিৰুদ্ধে ফটাশিল আমবাৰী আৰক্ষী থানাত ইতিমধ্যে ভাৰতীয় দণ্ডবিধিৰ ১২০ (বি)/৪০৬/৪০৯/৪২০/৪৬৯/৩৪ ধাৰাৰ অধীনত ৮১৭/২১ নম্বৰত এটা গোচৰ পঞ্জীয়ন হৈছে ।
উল্লেখ্য যে বিগত ২০১৬ৰ পৰা ২০১৯লৈ সংঘটিত বিত্তীয় খেলিমেলিৰ সন্দৰ্ভত ফটাশিল আমবাৰী আৰক্ষী থানাত অসম ক্ৰিকেট সন্থাই এখন এজাহাৰ দাখিল কৰিছিল । সন্থাৰ বৰ্তমানৰ সমিতিখনে তৰা গোচৰটোৰ তদন্ত প্ৰক্ৰিয়া আৰম্ভ কৰি যোৱা নিশা ডিব্ৰুগড়ৰ টিংখাংস্থিত বাসগৃহৰ পৰা ফটাশিল আমবাৰী আৰক্ষীয়ে বুঢ়াগোহাঁইক গ্ৰেপ্তাৰ কৰে । উল্লেখ্য যে উল্লিখিত সময়ছোৱাত বুঢ়াগোহাঁই অসম ক্ৰিকেট সন্থাৰ সম্পাদকৰ দায়িত্বত আছিল ।
তেওঁৰ কাৰ্যকাল শেষ হোৱাৰ পাছত মহাধিবক্তা দেৱজিৎ শইকীয়াই সম্পাদকৰ দায়িত্ব লাভ কৰে আৰু তাৰ পাছতে উক্ত সময়ছোৱাৰ হিচাপ পৰীক্ষা কৰিবলৈ ২০১৯ৰ ২৭ আগষ্টত এখন সমিতি গঠন কৰে । সমিতিখনে ২০২০ৰ আগষ্টত প্ৰতিবেদন দাখিল কৰে । এই প্ৰতিবেদনত উল্লিখিত সময়ছোৱাত অসম ক্ৰিকেট সন্থাত সংঘটিত হোৱা কোটি কোটি টকাৰ বিত্তীয় খেলিমেলিৰ ঘটনা পোহৰলৈ আহে ।
শেহতীয়াকৈ অনুষ্ঠিত সন্থাৰ সাধাৰণ পৰিষদৰ সভাত উক্ত প্ৰতিবেদনৰ সন্দৰ্ভত বিতংভাৱে আলোচনা হয় আৰু বিত্তীয় কেলেংকাৰিৰ সন্দৰ্ভত আইনৰ কাষ চাপে অসম ক্ৰিকেট সন্থা । এই ঘটনাত ইতিমধ্যে আৰক্ষীয়ে কে’বাজনো বিষয়া-কৰ্মচাৰীক সোধ-পোছ অব্যাহত ৰাখিছে । তদন্ত প্ৰক্ৰিয়াৰ অংশৰূপেই মহানগৰীৰ পৰা যোৱা আৰক্ষীৰ দল এটাই টিংখাঙৰ পৰা বুঢ়াগোহাঁইক আটক কৰাৰ পাছত নিশাই ফটাশিল আমবাৰী আৰক্ষী থানালৈ আনে ।
পুৱতি নিশা প্ৰায় দুই বজাত মহানগৰীত উপস্থিত হোৱাৰ পাছত ফটাশিল আমবাৰী আৰক্ষীয়ে কালি অভিযুক্ত ক্ৰীড়া সংগঠকজনক স্বাস্থ্য পৰীক্ষাৰ বাবে গুৱাহাটী চিকিৎসা মহাবিদ্যালয় হাস্পাতাললৈ নিয়ে । অৱশ্যে কালিয়ে তেওঁক আৰক্ষীয়ে গ্ৰেপ্তাৰ কৰে । বিত্তীয় কেলেংকাৰিত অভিযুক্ত বুঢ়াগোহাঁইক আজিআদালতত হাজিৰ কৰোৱা হ’ব বুলি আৰক্ষীয়ে জনাইছে ।
ইপিনে, এচিএৰ বৰ্তমানৰ সম্পাদক দেৱজিৎ শইকীয়াই বুঢ়াগোহাঁইৰ গ্ৰেপ্তাৰৰ প্ৰসংগত কয়, ‘ৰাজ্যৰ এজন ক্ৰীড়া সংগঠকক আৰক্ষীয়ে গ্ৰেপ্তাৰ কৰাতো লজ্জাজনক বিষয় । বুঢ়াগোহাঁই সম্পাদক থকাৰ সময়ত অসম ক্ৰিকেটত হোৱা যি বহু কোটি টকাৰ বিত্তীয় অনিয়ম পোহৰলৈ আহিছে, সেয়া আপোচবিহীন ।’
শইকীয়াই লগতে কয় যে, বৰ্ষাপাৰা ক্ৰিকেট ষ্টেডিয়াম ৰং কৰাৰ বাবদ বুঢ়াগোহাঁয়ে চাৰি-পাঁচ গুণ অধিক খৰচ দেখুৱাই কোটি টকা হেৰফেৰ কৰিছিল । আনহাতে, নিজে দুশৰ অধিকবাৰ বিমানত ভ্ৰমণ কৰা দেখুৱাই বিমানৰ টিকট ক্ৰয়ৰ নামতো তেওঁ কে’বা কোটি টকা আত্মসাৎ কৰাটো অনুসন্ধান কমিটীৰ প্ৰতিবেদনত পোহৰলৈ আহিছে বুলিও শইকীয়াই কয় । তেওঁ লগতে সদৰী কৰে যে সকলো তথ্য ইতিমধ্যে অসম ক্ৰিকেট সন্থাই আৰক্ষীক দিছে ।
