AGP Parliamentary Constituencies :
অতি সোনকালে লোকসভা নিৰ্বাচনৰ বাবে সমষ্টি বিচাৰি বিজেপিৰ ওচৰত তালিকা দাখিল কৰিব মিত্রদল অসম গণ পৰিষদে । ইতিমধ্যে নির্বাচনী প্রস্তুতি আৰম্ভ কৰা দলটোৰ নিৰ্বাচিত একাংশ সমষ্টিত কর্মকর্তা সম্মিলন অনুষ্ঠিত হৈ আছে।
অলপতে গুৱাহাটী সমষ্টিৰ বাবে এই সম্মিলন অনুষ্ঠিত হ’ব আৰু তাৰ পাছতে বিজেপিৰ ওচৰত দাখিল কৰা হ’ব দলটোৱে প্রতিদ্বন্দ্বিতা কৰিব বিচৰা সংসদীয় সমষ্টিৰ তালিকা।
এই তালিকাত অন্তর্ভুক্ত হ’ব পাঁচটা সমষ্টি। পুনৰ গঠনৰ পূৰ্বে বৰ্তমানৰ নাম আৰু গাঁথনিৰ ভিত্তিত দলটোৱে বিচাৰিবলগীয়া সমষ্টিকেইটা হ’ল নগাঁও, কলিয়াবৰ, তেজপুৰ, মঙলদৈ আৰু বৰপেটা। এই বিষয়ে সদৰী কৰি দলৰ জ্যেষ্ঠ নেতা তথা বিধায়ক ৰমেন্দ্ৰ নাৰায়ণ কলিতাই কয় যে আলোচনাৰ ভিত্তিত এই তালিকাৰ পৰাই অগপই প্রতিদ্বন্দ্বিতা কৰিবলগীয়া সমষ্টিকেইটাৰ নাম চূড়ান্ত কৰা হ’ব।
ইয়াৰ লগতে কলিতাই কয় যে এইবাৰ দলৰ প্ৰতিনিধিক সংসদলৈ নির্বাচিত কৰি পঠোৱাৰ লক্ষ্য লৈছে অগপই। সেই লক্ষ্যৰে দলে কাম কৰিছে। কলিতাই কয়, ‘আমাৰ দলত লোকসভা নিৰ্বাচনৰ বাবে প্ৰস্তুতি ইতিমধ্যে আৰম্ভ হৈছে। তিনিটা সমন্বিত কর্মকর্তা সন্মিলন অনুষ্ঠিত হৈছে।
গুৱাহাটী সমষ্টিৰ বাবেও সন্মিলন অনুষ্ঠিত হ’ব। তাৰ পাছতে আমাৰ দলৰ পৰা বিজেপিৰ ওচৰত দাবী কৰা সমষ্টিৰ তালিকা অৰ্পণ কৰা হ’ব।
এই প্ৰসংগতে দলৰ সূত্ৰই কয় যে অগপই এইবাৰ এনেদৰে বিজেপিৰ ওচৰত সমষ্টি বিচাৰি পত্ৰ তথা তালিকা দাখিল কৰিব, য’ত ন্যূনতম এটা নিশ্চিত জয়ৰ সমষ্টি থাকিব লাগিব। অৱশ্যে সূত্রটোরে এই দাবীও কৰে যে এইবাৰ তেওঁলোকৰ মিত্রজোঁটে ২০১৯তকৈ ভাল ফলাফল লাভ কৰিব।
বিজেপিয়ে যিহেতু ন্যূনতম ১২টা সমষ্টি দখল কৰিব বুলি ঘোষণা কৰিছে, গতিকে মিত্রদল হিচাপে অগপই প্রতিদ্বন্দ্বিতা কৰিবলগীয়া সমষ্টিৰ সংখ্যাও বৃদ্ধি পাব।
এই প্রসংগতে বিজেপিয়ে অগপক ধুবুৰী সমষ্টিটো এৰি দিব বুলি যি চর্চা নির্বাচনকেন্দ্ৰিক আলোচনাবোৰত হৈ আহিছে, সেই সন্দৰ্ভত দলীয় সূত্ৰটোৱে কয় যে তেওঁলোক এই সমষ্টিটোৰ বাবে আগ্রহী নহয়। সেই কাৰণে ধুবুৰীত নির্বাচনী বিশেষ তৎপৰতা চলোৱা নাই।
কেৱল মিত্ৰজোঁটৰ অংশীদাৰ হিচাপে যি কৰিব লাগে সেয়া কৰি থকা হৈছে আৰু নিৰ্বাচন চমু চাপি অহাৰ লগে লেগে অধিক ক্ষিপ্ৰতৰ হৈ থাকিব ।
আনহাতে, বিষয়টোৰ সন্দৰ্ভত ৰাজ্যিক বিজেপিৰ সভাপতি ভবেশ কলিতাই মন্তব্য কৰে যে মিত্ৰদলৰে মিলি বিজেপিয়ে এইবাৰ অসমত কংগ্ৰেছক শূন্য কৰি সৰ্বাধিক আসন লাভ কৰিব। তাৰ বাবে সঠিক ৰণকৌশলেৰে দলটো আগবাঢ়ি যাব।
গতিকে মিত্ৰদলৰ বিষয়বোৰো আলোচনা কৰা হ’ব। ইয়াৰ বিপৰীতে বিজেপিৰ সূত্ৰই মন্তব্য কৰে যে দাবী কৰা অনুসৰি অগপই সমষ্টি পাব বুলি কথা নাই। সকলোৰে মূল লক্ষ্য হ’ব লাগে কেনেকৈ লক্ষ্য নির্ধাৰিত আসনবোৰ দখল কৰিব পাৰি ।