Leaders who joined BJP are banned from Returning to the Congress:
বিজেপিত নিজৰ স্থান নাপাই পুনৰ কংগ্ৰেছমুৱা হ’ব বিচাৰিছে একাংশ প্রাক্তন দলীয় নেতা-কর্মীয়ে। লোকসভা নিৰ্বাচনৰ আগমুহূৰ্তত বিজেপিত যোগ দি মাত্র চাৰি মাহতে দলটোৰ প্ৰতি মোহ হেৰুৱাই পেলোৱা সেইসকলৰ প্ৰচেষ্টাতে কলিতে মযিমূৰ কৰিলে প্ৰদেশ কংগ্ৰেছৰ নেতৃত্বই। সেইসকলক দলৰ বাবে অন্ততঃ আজিৰ সময়ত ‘অস্পৃশ্য’ সজাই কংগ্রেছ এতিয়া পাঁচটা সমষ্টিৰ উপ- নিৰ্বাচনৰ বাবে তৎপৰ হৈ উঠিছে।
অহা ১৫ জুলাইত ইয়াকে লৈ বিস্তৃতভাৱে আলোচনা কৰা হ’ব। উল্লেখ্য যে সাংসদ হোৱাৰ পৰিপ্ৰেক্ষিতত বিধায়ক শূন্য হোৱা বিহালী, চামগুৰি, বঙাইগাঁও, চিদলী আৰু ধলাইত নিয়ম অনুসৰি ছমাহৰ ভিতৰতে উপ-নির্বাচন অনুষ্ঠিত হ’ব লাগে। সেয়েহে দলৰ সাংগঠনিক দিশ, সম্ভাব্য প্রার্থী, নির্বাচনী ৰণকৌশল, প্ৰচাৰৰ বিষয়বস্তু আদি সকলো দিশৰ আলোচনা ১৫ জুলাইৰ সভাত অনুষ্ঠিত হ’ব। এই আলোচনাৰ বাবে বৈঠকত উপস্থিত থাকিব প্রদেশ কংগ্ৰেছৰ ৰাষ্ট্ৰীয় তত্ত্বাবধায়ক জিতেন্দ্র সিঙো। ভূপেন বৰাৰ সভাপতিত্বত অনুষ্ঠিত হ’বলগীয়া এই বৈঠকত বিৰোধী দলপতি দেৱব্ৰত শইকীয়া, কাৰ্যকৰী সভাপতি জাকিৰ হুছেইন শিকদাৰৰ লগতে আটাইকেইজন সাংসদ-বিধায়কো উপস্থিত থাকিব।
ইপিনে, ১৬ জুলাইত অনুষ্ঠিত হ’ব দলৰ সকলো পৰ্যায়ৰ সাংগঠনিক সভা। ১৭ জুলাইত অনুষ্ঠিত হ’ব প্ৰদেশ কংগ্ৰেছৰ ৰাজনৈতিক পৰিক্ৰমা সমিতিৰ গুৰুত্বপূৰ্ণ সভা। এই সভাতে দলত যোগদানৰ বাবে যোগাযোগ ৰক্ষা কৰি চলাসকলৰ উপৰি নিজাববীয়াকৈ আন দলৰ কোন কোন নেতাক কংগ্রেছত যোগদানৰ বাবে চেষ্টা চলোৱা হ’ব, সেই সম্পর্কত আলোচনা কৰা হ’ব।
কংগ্ৰেছে যোগদানৰ বিষয়টোক আগ্রাসী ৰূপত আগবঢ়াই নিয়াৰ পৰিকল্পনা কৰিছে। দলৰ নেতৃত্বই সাম্প্রতিক সময়ত এই বিশ্বাস কৰে যে কংগ্ৰেছত যোগদানৰ বাবে বহুতেই আগ্রহী হৈ আছে। সেইবুলি কিন্তু সকলোকে গ্রহণ কৰা নহয়। বিশেষকৈ যিসকলে যোৱা লোকসভা নিৰ্বাচনৰ আগত কংগ্ৰেছ এৰি বিজেপিত যোগ দিয়ে, সেইসকলৰ নাম আলোচনাৰ মাজলৈকে ননাৰ সিদ্ধান্ত গ্ৰহণ কৰা হৈছে।
এই সিদ্ধান্তৰ বাবেই পুনৰ কংগ্ৰেছলৈ ওভতাৰ বাবে যোগাযোগ স্থাপন কৰা এজন প্রাক্তন কাৰ্যকৰী সভাপতি, গুৱাহাটীৰ এজন প্রাক্তন মন্ত্ৰীৰ পুত্ৰ আৰু দলৰ এজন প্ৰয়াত প্রাক্তন সভাপতিৰ জীয়ৰীৰ নাম পোনছাটেই নাকচ কৰা হৈছে। তদুপৰি সিদ্ধান্ত লোৱা হৈছে যে বৰাৰ সভাপতিৰ কার্যকালত কংগ্ৰেছ এৰা সকলক পুনৰ দলত লোৱা নহ’ব।