ঐতিহাসিক অসম আন্দোলনত অস্তিত্ব ৰক্ষাৰ বাবে প্ৰাণ বিসৰ্জন দিয়া শ্বহীদৰ ত্যাগক সুঁৱৰি বিজেপিৰ ৰাজ্যিক যুৱ মৰ্চাই আজি চতিয়া সমষ্টিৰ জামুগুৰিহাটৰ পকামূৰা পথাৰত কেন্দ্ৰীয়ভাৱে উদযাপন কৰে শ্বহীদ দিৱস। মুখ্যমন্ত্ৰী ড:হিমন্ত বিশ্ব শৰ্মা, প্ৰদেশ বিজেপিৰ সভাপতি ভৱেশ কলিতাকে ধৰি ভালে সংখ্যক মন্ত্ৰী- বিধায়ক উপস্থিত থকা শ্বহীদ দিৱসত অবিভক্ত শোণিতপুৰ জিলাৰ ১৬০ শ্বহীদ পৰিয়ালক সম্বধৰ্ণা জনোৱা হয়।
প্ৰায় পোন্ধৰ হাজাৰৰো অধিক লোক উপস্থিত থকা এই শ্বহীদ দিৱস কাৰ্য্যসূচীত অংশ গ্ৰহণ কৰি মুখ্যমন্ত্ৰী হিমন্ত বিশ্ব শৰ্মাই অসম আৰু অসমীয়াৰ অস্তিত্ব ৰক্ষাৰ সংগ্ৰামত আত্মবলিদান দিয়া ঐতিহাসিক অসম আন্দোলনৰ মহান শ্বহীদসকলৰ প্ৰতি গভীৰ শ্ৰদ্ধাঞ্জলি নিবেদন কৰি কয়, অসমৰ জাতীয় জীৱনৰ এক জটিল সন্ধিক্ষণত অসম আন্দোলনৰ সূত্ৰপাত হৈছিল ৷
বিদেশী বিতাড়নক কেন্দ্ৰ কৰি আৰম্ভ হোৱা ঐতিহাসিক এই অসম আন্দোলনে দীৰ্ঘকাল ধৰি ৰাজ্যৰ ইতিহাসত এক নিৰ্ণায়ক স্থান দখল কৰি আহিছে। অসম আন্দোলন হৈছে অসমবাসীৰ স্বদেশ প্ৰেম আৰু ত্যাগৰ উৎকৃষ্ট নিদৰ্শন ৷ অসমৰ বিদেশী বিতাড়ন আৰু অস্তিত্ব ৰক্ষাৰ আন্দোলনত প্রাণ আহুতি দিয়া প্ৰতিগৰাকী শ্বহীদ আমাৰ চিৰনমস্য।
অসমৰ জনগণে অবৈধ বুলি ঘোষণা কৰা ১৯৭৯ চনৰ ১০ ডিচেম্বৰত বাৰম্বাৰ লাঠীৰ প্রহাৰত আৰু বন্দুকৰ নলীৰ খুন্দাত ভৱানীপুৰৰ উজানবৰবৰী গাঁৱৰ খর্গেশ্বৰ তালুকদাৰক অমানৱীয় অত্যাচাৰ কৰি হত্যা কৰা ঘটনাই ৰাজ্যখনৰ সর্বত্রে জোকাৰণি তুলি অসম আন্দোলনক নতুন গতি প্ৰদান কৰিছিল।
পৰৱৰ্তী পৰ্যায়ত অসমৰ ৮৬০গৰাকী শ্বহীদে আত্মবলিদান দি জাতীয় আন্দোলনটোক অধিক শক্তিশালী ৰূপ দিয়াৰ উপৰি ৰাজ্যখনৰ লগতে দেশৰ অস্তিত্ব ৰক্ষাৰ সংগ্ৰামক মহীয়ান কৰি তুলিছিল৷ ৰাজ্যখনৰ বৃহত্তৰ স্বাৰ্থত আত্ম বলিদান দিয়া ঐতিহাসিক অসম আন্দোলনৰ মহান শ্বহীদ সকলৰ লগতে জামুগুৰিহাটৰ যি ১৭ গৰাকী যুৱকে অসমৰ অস্তিত্ব আন্দোলনত প্ৰাণাহুতি দিছিল তেখেত সকলকো মুখ্যমন্ত্ৰীয়ে শ্ৰদ্ধাৰে সোঁৱৰণ কৰে ৷
