Gujarat Bus Accident:তীৰ্থযাত্ৰীৰ স’তে দ্বাৰকালৈ যোৱাৰ পথত দ খাৱৈত পৰিল বাছ !
গুজৰাতত মৃত কমেও পাঁচ, আহত ১৭
মহাৰাষ্ট্ৰৰ পৰা গুজৰাট অভিমুখে যোৱাৰ পথত সংঘটিত হয় এক ভয়ংকৰ পথ দুৰ্ঘটনা। যাত্ৰীসকলৰ স’তে নিয়ন্ত্ৰণ হেৰুৱাই প্ৰায় ৩৫ ফুট দ খাৱৈত বাগৰি পৰে বাছখন।
তথ্য অনুসৰি এই দুৰ্ঘটনাত এতিয়ালৈকে পাঁচজন লোকৰ মৃত্যু হৈছে । মৃতকৰ সংখ্যা আৰু বৃদ্ধি পোৱাৰ আশংকা কৰা হৈছে। এই দুৰ্ঘটনাত আন ১৭ জন লোক গুৰুতৰভাৱে আহত হয়।
প্ৰাথমিক তথ্য অনুসৰি, দেওবাৰে পুৱা প্ৰায় চাৰি বাজি ৩০ মিনিটত দুৰ্ঘটনাটো সংঘটিত হয়। সংবাদ সংস্থা পিটিআইয়ে প্ৰকাশ কৰা অনুসৰি, নাছিক-গুজৰাট ঘাইপথৰ কাষেৰে তীৰ্থযাত্ৰীৰ বাবে গুজৰাটৰ দ্বাৰকালৈ ৰাওনা হৈছিল বাছখন। তেতিয়াই গুজৰাটৰ দাং জিলাৰ সপুতৰাৰ সমীপত সংঘটিত হয় এই দুৰ্ঘটনা।
বাছখন ৪৮ জন যাত্ৰীৰ স’তে এটা গভীৰ খাৱৈত পৰে। দুৰ্ঘটনাৰ খবৰ পোৱাৰ পাছত স্থানীয় আৰক্ষী থানা ইতিমধ্যে ঘটনাস্থলীত উপস্থিত হৈছে।
আৰক্ষী কৰ্মীয়ে আহতসকলক উদ্ধাৰ কৰি তেওঁলোকক চিকিৎসালয়লৈ প্ৰেৰণ কৰে। দাং জিলাৰ উপ আৰক্ষী অধীক্ষক (ডিএছপি) সুনীল পাটিলে জনাই যে বাছখন এখন খাৱৈত ওলটি পৰিছে। দুৰ্ঘটনাটোত পাঁচজন লোকৰ মৃত্যু হোৱাৰ লগতে আহতসকলক চিকিৎসা প্ৰদান কৰা হৈছে।
উপ আৰক্ষী অধীক্ষকে জনাই যে মৃতসকলৰ ভিতৰত দুজন মহিলাও আছে। ইফালে আন ১৭ জন গুৰুতৰ আহত। বাকীসকলে কম বেছি পৰিমাণে আঘাত প্ৰাপ্ত হৈছে ।
আৰক্ষীয়ে জনোৱা অনুসৰি, বাছখন মহাৰাষ্ট্ৰৰ ত্ৰিম্বকেশ্বৰৰ পৰা দ্বাৰকালৈ গৈ আছিল। পিটিআইয়ে জনোৱা অনুসৰি বাছখনে মধ্য প্ৰদেশৰ গুণা, শিৱপুৰী আৰু অশোকনগৰ জিলাৰ পৰা তীৰ্থযাত্ৰীসকলক লৈ গৈছিল।
এইটো এতিয়াও স্পষ্ট হোৱা নাই যে কি কাৰণত বাছখনে নিয়ন্ত্ৰণ হেৰুৱাই খাৱৈত পৰে। আৰক্ষীয়ে দুৰ্ঘটনাটোৰ কাৰণ অনুসন্ধান কৰি আছে।
