One passenger survived the plane crash:
ৰাখে হৰি, মাৰে কোনে! এই আপ্তবাক্যষাৰ যেন আখৰে আখৰে ফলিয়ালে বিশ্বাস কুমাৰ ৰমেশৰ ক্ষেত্ৰত। বৃহস্পতিবাৰে দুপৰীয়া আহমেদাবাদত সংঘটিত ভয়াৱহ বিমান দুর্ঘটনাটোত দৈৱক্রমে প্ৰাণৰক্ষা পৰে ৰমেশৰ।
দুর্ঘটনাটোত যাত্রী আৰু বিমান কৰ্মচাৰীসহ ২৪২জন লোকৰে মৃত্যু হোৱা বুলি চৰকাৰীভাবে ঘোষিত হোৱাৰ পাছতে পোহৰলৈ আহে যে ভয়াৱহ দুর্ঘটনাটোত এজন যাত্ৰীৰ প্ৰাণৰক্ষা পৰে। এই সৌভাগ্যবান যাত্রীজনেই হ’ল ৰমেশ।
সম্প্রতি ৪০ বছৰীয়া ৰমেশ ব্ৰিটিছ নাগৰিক। লণ্ডনৰ গেটৱিক অভিমুখে উৰা মৰাৰ সময়ত ধ্বংস হোৱা বিমানখনত ৰমেশৰ স’তে তেওঁৰ জ্যেষ্ঠ ভ্রাতৃ অজয় কুমাৰ ৰমেশ (৪৫)-এও যাত্রা কৰিছিল। দুর্ঘটনাটোৰ পাছত অজয়ৰ কোনো তথ্য পোহৰলৈ অহা নাই।
সম্প্রতি আহমেদাবাদৰ আচৰৱাৰ অসামৰিক চিকিৎসালয়ত চিকিৎসাধীন হৈ থকা বিশ্বাস ৰমেশে এই ভয়াৱহ অভিজ্ঞতাৰ কথা সংবাদ মাধ্যমৰ আগত বৰ্ণনা কৰিছে। মৃত্যুৰ দুৱাৰডলিৰ পৰা উভতি অহা লোকজনে কয়, ‘দুপৰীয়া ১-৩৯ বজাত বিমানখনে উৰা মৰাৰ ৩০ ছেকেণ্ড পাছতে ইঞ্জিনত বিজুতিয়ে দেখা দিয়ে। এটা প্রকাণ্ড শব্দৰ সৃষ্টি হয় আৰু তাৰ পাছতে বিমানখন দুর্ঘটনাগ্রস্ত হয়।
এই সকলো ঘটনা ইমান তাৎক্ষণিকভারে ঘটিল!’ দুর্ঘটনাগ্রস্ত বিমানখনৰ ১১-এ নম্বৰ আসনৰ যাত্ৰী আছিল ৰমেশ। এই ভয়াৱহ অভিজ্ঞতাৰ বিষয়ে তেওঁ আৰু কয়, ‘(বিমানখন দুর্ঘটনাগ্রস্ত হোৱাৰ পাছত) আসনৰ পৰা উঠি মই মোৰ চাৰিওকাষে মৃতদেহ দেখিবলৈ পাওঁ। মই শংকিত হওঁ। থিয় হওঁ আৰু দৌৰিবলৈ ধৰো।
মোৰ চাৰিওকাষে বিমানখনৰ টুকুৰা পৰি আছিল। দৌৰি অহাৰ সময়ত মোক কোনোবাই সাবটি ধৰি এখন এম্বুলেন্সত উঠাই চিকিৎসালয়লৈ আনে।’ তাৰ পাছৰে পৰা তেওঁ উক্ত চিকিৎসালয়ত চিকিৎসাধীন হৈ আছে। অৱশ্যে তেওঁৰ আঘাত গুৰুতৰ নহয়। দুর্ঘটনাটোত তেওঁ বুকু, চকু আৰু ভৰি দুখনত কিছু আঘাত পায়।
তেওঁ জনোৱা মতে, বিগত ২০ বছৰ ধৰি তেওঁ পত্নী-সন্তানসহ লণ্ডনত বাস কৰি আছে। লণ্ডন অভিমুখী বিমানখনত যাত্ৰাৰ সময়ত তেওঁৰ ভ্ৰাতৃ অজয়ে তেওঁৰ পৰা সুকীয়া শাৰীৰ আসনত বহিছিল বুলি সদৰী কৰে ৰমেশে। ভ্রাতৃৰ তথ্য উদ্ধাৰত সহায় বিচাৰি অসহায় লোকজনে আৰু কয়, ‘আমি দুয়ো ডিউ ভ্রমণ কৰো। তেওঁ মোৰ স’তে ভ্রমণ কৰিছিল আৰু মই তেওঁক এতিয়া পোৱা নাই। তেওঁক বিচাৰি উলিওৱাত মোক সহায় কৰক।’
চিকিৎসালয়খন বিমান দুর্ঘটনাত হতাহতসকলৰে ভৰি পৰিছে। তেওঁলোকৰ আত্মীয়-স্বজনে চিকিৎসালয়ত ভিৰ কৰাৰ লগতে বহুজনে কান্দোনত ভাঙি পৰি শোকাকুল পৰিৱেশৰ সৃষ্টি কৰিছে। এনে শোকাকুল পৰিৱেশৰ মাজত গুজৰাটৰ প্ৰাক্তন মুখ্যমন্ত্রী বিজয়ৰ ৰূপানীৰ পূৰ্বৰ সহযোগী শৈলেস মণ্ডলিয়াকো চিকিৎসালয়ত দেখা পোৱা গ’ল। চিকিৎসালয়ত ৰূপানীৰ সন্ধানত প্ৰাক্তন সতীর্থজন উপস্থিত হয়।
সাংবাদিকৰ আগত এই কথা সদৰী কৰি তেওঁ কয়, ‘আমি ৰূপানীক বিচাৰি ইয়ালৈ আহিছো।আপোনালোকে যদি তেওঁৰ কোনো সন্ধান পাইছে তেন্তে আমাক জানিবলৈ দিয়ক।’ উল্লেখ্য যে এই ভয়াৱহ বিমান দুর্ঘটনাত ৰূপানীৰো মৃত্যু হয়।
# মোদীৰ গৃহৰাজ্যত মৃত্যুৰ কিৰিলি ! পুৱাই আহমেদাবাদত উপস্থিত প্ৰধানমন্ত্ৰী নৰেন্দ্ৰ মোদী,আহতসকলৰ খবৰ লৈ বিমান দুৰ্ঘটনাস্থলীত প্ৰধানমন্ত্ৰী মোদী
আহমেদাবাদৰ ভয়ংকৰ বিমান দুৰ্ঘটনাত ২৬৫ গৰাকীৰ মৃত্যু | এতিয়াও ঘটনাস্থলীত অব্যাহত আছে উদ্ধাৰ অভিযান | মৃত্যু উপত্যকাত পৰিণত গৃহৰাজ্যৰ খবৰ ল’বলৈ পুৱাই ঘটনাস্থলীত উপস্থিত হয় প্ৰধানমন্ত্ৰী নৰেন্দ্ৰ মোদী | ভয়াৱহ বিমান দুর্ঘটনাটোত দৈৱক্রমে প্ৰাণৰক্ষা পৰা আচৰৱাৰ অসামৰিক চিকিৎসালয়ত চিকিৎসাধীন হৈ থকা বিশ্বাস কুমাৰ ৰমেশ সহ আন আহতসকলৰ খবৰ লৈ বিমান দুৰ্ঘটনাস্থলীত উপস্থিত হৈ পৰিস্থিতি বুজ লয় প্ৰধানমন্ত্ৰী গৰাকীয়ে ৷