Mohan Bhagwat :
এজন ব্যক্তিয়ে ৭৫ বছৰ বয়স পূর্ণ কৰাৰ লগে লগে স্বেচ্ছাই ৰাজহুৱা জীৱনৰ পৰা অব্যাহতি ল’ব লাগে বুলি অলগতে আৰএছএছ মুৰব্বী মোহন ভাগৱতে কৰা ইংগিতপূর্ণ মন্তব্যই যেন সুযোগৰ অপেক্ষাত থকা বিৰোধীৰ হাতত প্রধানমন্ত্রী নৰেন্দ্র মোদীক আক্ৰমণৰ ‘অস্ত্র’হে তুলি দিলে। আৰএছএছ মুৰব্বীৰ এই মন্তব্যৰ আঁত ধৰি একাংশ বিৰোধী দলে দাবী কৰিছে যে দৰাচলতে ভাগৱতে প্রধানমন্ত্রী মোদীক ইংগিত কৰিয়ে এই মন্তব্য কৰিছে।
কাৰণ অহা ছেপ্টেম্বৰত মোদীয়ে ৭৫ বছৰ বয়স সম্পূর্ণ কৰিব। লক্ষ্যণীয়ভাৱে মোদীয়ে বয়সক দোহাই দি বিজেপিৰ দুই প্ৰতিষ্ঠাপক নেতা এল কে আদৱানী আৰু মুৰলী মনোহৰ যোশীকে সক্ৰিয় ৰাজনীতিৰ পৰা অব্যাহতি দিয়া বুলি চর্চা হৈ আহিছে। লগতে তেওঁ পূর্বে ৭৫ ঊর্ধ্বৰ দলীয় নেতাক মন্ত্রীসভাত অন্তর্ভুক্তিৰো বিৰোধিতা কৰিছিল। গতিকে তেওঁ এই পথ অনুসৰণ কৰি স্বেচ্ছাই প্রধানমন্ত্ৰিত্বৰ পৰা অব্যাহতি ল’ব নেকি বুলি বিভিন্ন স্তৰত চৰ্চা হৈ আহিছে। এনে অৱস্থাত যোৱা বুধবাৰে নাগপুৰত এক গ্ৰন্থ উন্মোচনী অনুষ্ঠানত আৰএছএছ মুৰব্বী ভাগৱতে ৭৫ পূৰ্ণ কৰা ব্যক্তিয়ে স্বেচ্ছাই ৰাজহুৱা জীৱনৰ পৰা অব্যাহতি ল’ব লাগে বুলি ইংগিতপূর্ণ মন্তব্য কৰে।
তেওঁৰ এই মন্তব্যৰ বাতৰি প্ৰচাৰ হোৱাত বিভিন্ন বিৰোধী দলে প্রতিক্রিয়া প্রকাশ কৰিছে। বিষয়টো সন্দৰ্ভত শিৱসেনাৰ উদ্ধৱ থাকৰে গোটৰ নেত্রী সাংসদ প্রিয়ংকা চতুর্বেদীয়ে কয় যে ভাগৱতৰ ভাষ্যই আৰএছএছ আৰু বিজেপিৰ মাজত ঘর্ষণ সৃষ্টিৰ আভাস প্রতিফলিত কৰিছে। বিৰোধী নেত্ৰীগৰাকীয়ে লগতে দাবী কৰে যে বিজেপিয়ে সদায়ে জ্যেষ্ঠ নেতাসকলে যুৱ নেতাসকলক দায়িত্ব প্রদান কৰাৰ পোষকতা কৰে। এই সম্পৰ্কত তেওঁ আৰু কয়, ‘এয়া হৈছে যে বিজেপি আৰু আৰএছএছৰ মাজত সংঘাত চলি আছে তাৰ এক স্পষ্ট বার্তা।
২০১৪ত কেন্দ্রত বিজেপিয়ে চৰকাৰ গঠন কৰাৰ সময়ত দলৰ ৭৫ ঊর্ধ্বৰ নেতাসকলক মার্গদর্শক মণ্ডলীত অন্তর্ভুক্ত কৰে। তাৰ ১১ বছৰৰ পাছত এতিয়া আৰএছএছে বিজেপিক কি কৰিব লাগে সেয়া সোঁৱৰাই দিছে। আভ্যন্তৰীণ সংঘাত ৰাজহুৱা হ’ল। এই সংঘাতৰ ফল কি হ’ব কোনেও নাজানে।’ একেদৰে জ্যেষ্ঠ কংগ্ৰেছ নেতা পৱন খেড়াই কয়, ‘ভাগৱতে এটা ভাল খবৰ দিলে। তেওঁ ক’লে যে ৭৫ বছৰ পূৰ্ণ কৰা এজন ব্যক্তিয়ে আনক সুযোগ দিব লাগে। এইটো কিয় ভাল খবৰ নহ’ব ? অহা ১১ ছেপ্টেম্বৰত ভাগৱতে আৰু ১৭ ছেপ্টেম্বৰত প্ৰধানমন্ত্ৰ মোদীয়ে ৭৫ বছৰ পূৰ্ণ কৰিব।’
# আৰএছএছৰ প্ৰতিক্রিয়া: মোদীক ইংগিত কৰি কোৱা নাই !
আৰএছএছে দাবী কৰে যে সংগঠনৰ মুৰব্বী ভাগৱতে প্রধানমন্ত্রীক উদ্দেশি ৭৫ বছৰীয়া ব্যক্তিয়ে ৰাজহুৱা জীৱনৰ পৰা স্বেচ্ছাই অৱসৰ ল’ব লাগে বুলি মন্তব্য কৰা নাই। বিজেপিৰ অভিভাৱক সংগঠনটোৰ মতে ভাগৱতে নাগপুৰৰ অনুষ্ঠানত যি মন্তব্য কৰিছিল সেই মন্তব্য কেৱল সংগঠনটোৰ নেতা প্রয়াত মৰোপান্ট পিংগালে সম্পর্কীয়হে আছিল।
উল্লেখ্য যে পিংগালে জীৱন আধাৰিত এখন গ্রন্থ উন্মোচনী সভাত ভাগৱতে এই আলোড়ন সৃষ্টিকাৰী মন্তব্য কৰে। অনুষ্ঠানত ভাগৱতে কয়, ‘পিংগালে এবাৰ কৈছিল যে যেতিয়া আপুনি গাত মেৰিয়াই লোৱা চাদৰখন ৭৫ বছৰীয়া হয় তেতিয়া আপুনি নিশ্চিত হ’ব লাগে যে আপুনি এটা নির্দিষ্ট বয়সত ভৰি দিছে আৰু দায়িত্বৰ পৰা স্বেচ্ছাই অব্যাহতি লৈ আনক কাম কৰিবলৈ দিব লাগে।’ যিহেতু আৰএছএছ বিজেপিৰ অভিভাৱক সংগঠন।
গতিকে সংগঠনৰ মুৰব্বীজনে প্রধানমন্ত্রী মোদীক উদ্দেশি এই মন্তব্য কৰা বুলি চৰ্চিত হয়। লক্ষ্যণীয়ভাবে বিষয়টোক লৈ কোনো প্রতিক্রিয়া প্রকাশ কৰা নাই বিজেপিয়ে। ইয়ে বহুতৰে মনত বিষয়টোক লৈ অধিক কৌতূহলৰ সৃষ্টি কৰিছে। উল্লেখ্য যে আৰএছএছৰ অনুমতি নাপালে বিজেপিয়ে গুৰুত্বপূর্ণ সিদ্ধান্ত নলয় বুলিও সততে চর্চিত হয়।
