Wildlife Photography Exhibition:
অগ্ৰণী জৈৱ বৈচিত্ৰ্য সংৰক্ষণ সংস্থা আৰণ্যকৰ ৩৫ সংখ্যক বাৰ্ষিকী উদযাপনৰ সৈতে সংগতি ৰাখি ৰাজ্যজুৰি অনুষ্ঠিত কৰা এলানি কাৰ্যসূচীৰ অংশহিচাপে নগাঁৱৰ প্ৰণৱ বৰুৱা কলাক্ষেত্ৰত অনুষ্ঠিত কৰা “বন ছবি ২.০” শীৰ্ষক এখন দুদিনীয়া প্ৰকৃতি আৰু বন্যপ্ৰাণী ফটোগ্ৰাফী প্ৰদৰ্শনীৰ কালি সফল সামৰণি পৰে ।
নগাঁৱৰ পৰিচিত সাংস্কৃতিক গোষ্ঠী কল্লোলৰ সহযোগত অনুষ্ঠিত এই প্ৰদৰ্শনীত দেশৰ বিভিন্ন প্ৰান্তৰ ৩১ জন প্ৰতিভাৱান ফটোগ্ৰাফাৰে বন্দী কৰা ৪৫ খনতকৈও অধিক উল্লেখযোগ্য ফটো প্ৰদৰ্শন কৰা হয় । ৩০ ৰো অধিক যুৱ প্ৰকৃতিপ্ৰেমী আৰু আন কেইবাজনো বিশিষ্ট ব্যক্তিয়েও ইয়াত অংশগ্ৰহণ কৰে।
নগাঁও-বটদ্ৰৱা সমষ্টিৰ বিধায়ক ৰূপক শৰ্মাৰ লগতে ভালেসংখ্যক প্ৰকৃতি অনুৰাগীৰ উপস্থিতিত নগাঁৱৰ জিলা আয়ুক্ত দেৱাশীষ শৰ্মাই শনিবাৰে প্ৰদৰ্শনীখন উদ্বোধন কৰে ।
জিলা আয়ুক্ত শৰ্মাই তেওঁৰ উদ্বোধনী ভাষণত প্ৰকৃতি আৰু মানুহৰ সম্পৰ্ক নিবিড় কৰা আৰু পৰিৱেশৰ প্ৰতি মানুহৰ দায়বদ্ধতা পুনৰুজ্জীৱিত কৰাৰ ওপৰত গুৰুত্ব আৰোপ কৰে । তেওঁ জৈৱ বৈচিত্ৰ্য সংৰক্ষণৰ বাবে আৰণ্যকৰ নিৰলস প্ৰচেষ্টাক প্ৰশংসা কৰে আৰু উপস্থিত লোকসকলক সংস্থাটোৰ এই অভিযানৰ প্ৰতি সমৰ্থন আগবঢ়াবলৈ আহ্বান জনায় । তেওঁ কয়, “ফটোগ্ৰাফী গুৰুত্বপূৰ্ণ বাৰ্তা বিয়পোৱাৰ এক শক্তিশালী মাধ্যম আৰু প্ৰকৃতি ফটোগ্ৰাফীৰ মানুহক প্ৰকৃতিৰ সৌন্দৰ্য্য আৰু গুৰুত্বৰৰ ওচৰ চপাই নিয়াৰ অনন্য ক্ষমতা আছে”।
বিধায়ক ৰূপক শৰ্মাই বৰ্তমানৰ দ্ৰুত পৰিৱৰ্তিত পৰিবেশত এনে পদক্ষেপৰ প্ৰাসংগিকতাৰ বিষয়ে উল্লেখ কৰে আৰু নগাঁৱত এনে এক অৰ্থপূৰ্ণ অনুষ্ঠান আয়োজন কৰাৰ বাবে আৰণ্যক আৰু কল্লোলক প্ৰশংসা কৰে । তেওঁ ৰাজ্য চৰকাৰৰ প্ৰশংসনীয় গছপুলি ৰোপণ অভিযানৰ প্ৰসংগ উল্লেখ কৰি উন্নয়ন আৰু পৰিৱেশ বৰ্তাই ৰখাৰ মাজত ভাৰসাম্য ৰক্ষাৰ প্ৰয়োজনীয়তাৰ ওপৰত গুৰুত্ব আৰোপ কৰে।
আৰণ্যকৰ কাৰ্যনিৰ্বাহক সমিতিৰ সদস্য ড: পাৰ্থ জে দাসে আঁত ধৰা উদ্বোধনী অনুষ্ঠানত আৰণ্যকৰ সাংগঠনিক সম্পাদক উদয়ন বৰঠাকুৰে সংস্থাটোৱে মনোনিৱেশ কৰা বিষয়বোৰ আৰু সংৰক্ষণৰ ক্ষেত্ৰত গ্ৰহণ কৰা উল্লেখযোগ্য পদক্ষেপসমূহৰ ব্যাখ্যা আগবঢ়ায় আৰু কল্লোলৰ সম্পাদক নৌছাদ আখতাৰ হাজৰিকাই বৰ্তমানৰ পৰিৱেশ প্ৰেক্ষাপটত এই প্ৰদৰ্শনীৰ সাংস্কৃতিক তাৎপৰ্য্য আৰু প্ৰাসংগিকতাৰ বিষয়ে উল্লেখ কৰে ।
উদ্বোধনী অনুষ্ঠানৰ পাছতে ড: পাৰ্থ জে দাসৰ সঞ্চালনাত অনুষ্ঠিত “প্ৰকৃতি সংৰক্ষণ আৰু সজাগতাৰ মাধ্যম হিচাপে ফটোগ্ৰাফীৰ গুৰুত্ব” বিষয়ক আলোচনাচক্ৰত বিশিষ্ট চলচ্চিত্ৰ পৰিচালক অৰূপ মান্না, যুৱ সমালোচক অৰিন্দম বৰকটকী আৰু এগৰাকী প্ৰখ্যাত সংৰক্ষণবিদ ড° স্মৰাজিৎ ওঝাই অংশগ্ৰহণ কৰে। আলোচনাত প্ৰকৃতিৰ ফটোগ্ৰাফীয়ে প্ৰযুক্তি আৰু সৃষ্টিশীলতাৰ মিশ্ৰণেৰে কেনেকৈ প্ৰকৃতিৰ বিষয়ে শক্তিশালী আৰু বহুমাত্ৰিক বাক্…ধাৰা সৃষ্টি কৰে তাৰ ওপৰত আলোকপাত কৰা হয়।
কাৰ্যসূচীৰ অংশহিচাপে অনুষ্ঠিত “ইউজ অৱ আৰ্ট এণ্ড টেকন’ল’জি ইন ফটোগ্ৰাফী ফৰ্… নেচাৰ এপ্ৰিচিয়েশ্যন এণ্ড কন্…জাৰভেশ্যন” শীৰ্ষক এখন কাৰিকৰী অধিবেশন পৰিচালনা কৰি প্ৰখ্যাত বন্যপ্ৰাণী ফটোগ্ৰাফাৰ উদয়ন বৰঠাকুৰে সঠিক কৌশল ব্যৱহাৰৰ পৰা আৰম্ভ কৰি এখন ফটোক সংৰক্ষণৰ বাৰ্তা বহন কৰিব পৰাকৈ অৰ্থবহ কৰি তোলালৈ আকৰ্ষণীয় যাত্ৰাটোৰ বিষয়ে তেওঁ বৰ্ণনা কৰে।
“লেন্সৰ জৰিয়তে প্ৰকৃতিক দৰ্শন : প্ৰকৃতি আৰু সৃষ্টিশীলতাৰ সমন্বয়” শীৰ্ষক এক অন্তৰংগ আড্ডা (আলোচনা)ৰে ৩ আগষ্টত দুদিনীয়া কাৰ্যসূচীৰ সামৰণি পৰে ।