Guwahati high court:✒️অসম চৰকাৰে সকলো নীতি-নিয়মক অংগুষ্ঠ দেখুৱাই ৰাজ্যখনক অভাৱনীয় ঋণৰ বোজাত কক্ককাবলৈ এৰি দিছে। ঋণ গ্ৰহণৰ বাবে আনকি ভাৰতীয় ৰিজার্ভ বেংকৰ নীতি-নিৰ্দেশনাকো গুৰুত্ব দিয়া হোৱা নাই।
এই ক্ষেত্রত ‘আছাম ফিছকেল ৰেছপনছিবিলিটি এণ্ড বাজেট মেনেজমেন্ট’ (এএফআৰবিএম) এক্ট, ২০০৫ উলংঘা কৰা বুলি বুধবাৰে বিষয়টো গুৱাহাটী উচ্চ ন্যায়ালয়ৰ মুখ্য ন্যায়াধীশক এক পত্রযোগে অৱগত কৰি ইয়াৰ বিৰুদ্ধে ন্যায়ালয়ক নিজাববীয়াকৈ ব্যৱস্থা গ্রহণ কৰিবলৈ আহ্বান জনায় অসম বিধানসভাৰ বিৰোধী দলপতি দেৱব্ৰত শইকীয়াই।
তেওঁ এই বুলিও উল্লেখ কৰে যে যোৱা জুলাইলৈ অসম চৰকাৰৰ ঋণৰ পৰিমাণ ১,৮৪,৪৬ কোটি টকালৈ বৃদ্ধি হৈছে। এএফআৰবিএম আইনখন বিত্তীয় ঘাটিৰ পৰিমাণ মুঠ ৰাজ্যিক ঘৰুৱা উৎপাদনৰ ৩.৫ শতাংশৰ অধিক হ’ব নোৱাৰে। অথচ অসমৰ বৰ্তমান এই ঘাটিৰ পৰিমাণ ৩.৮৮ শতাংশলৈ বৃদ্ধি হৈছে। পত্ৰখনত অভিযোগ কৰা অনুসৰি, এই পৰিস্থিতি অসমৰ বাবে অতি ভয়াৱহ।
অর্থনৈতিক স্থিৰতা, জনকল্যাণমূলক কাম-কাজ আৰু ৰাজ্যখনৰ নাগৰিকৰ সাংবিধানিক অধিকাৰবোৰলৈ এই পৰিস্থিতিয়ে ভয়ংকৰ ভাবুকি নমাই অনাৰ আশংকা গাঢ় হৈছে। ২০২৯-২০ক লৈ অসমত ফিছকেল ঘাটিৰ হাৰ লক্ষ্যতকৈ ওপৰত আছে। এনে ধাৰাবাহিকতাই অসমৰ অৰ্থনীতিক আগন্তুক দিনত কোঙা কৰাটো প্রায় স্পষ্ট হৈছে বুলি শইকীয়াই অভিযোগ কৰে।
তেওঁ উল্লেখ কৰে যে ২০১৯-২০ত তিনি শতাংশৰ বিপৰীতে ফিছকেল ঘাটি তথা বিত্তীয় ঘাটি মুঠ ৰাজ্যিক ঘৰুৱা উৎপাদনৰ তিনি শতাংশৰ বিপৰীতে আছিল ৪.২ শতাংশ। ২০২১-২২ত এই হাৰ আছিল ২.৪ শতাংশৰ বিপৰীতে ৩.৫ শতাংশ। ২০২২-২৩ত আছিল তিনি শতাংশৰ বিপৰীতে ৩.৫ শতাংশ। ২০২৩-২৪৩ ০.২ শতাংশৰ বিপৰীতে আছিল ৩.৫ শতাংশ আৰু ২০২৪-২৫ত এই ঘাটিৰ পৰিমাণ আছিল ৩.৫ শতাংশৰ বিপৰীতে ৩.৮৮ শতাংশ।
পত্ৰখন দাখিলৰ সন্দৰ্ভত শইকীয়াই কয়, ‘কেৱল মাত্র অনুৎপাদনশীল কাৰ্যত চৰকাৰে গুৰুত্ব আৰোপ কৰিছে। হিতাধিকাৰী সৃষ্টিৰ নতুন নতুন আঁচনিয়ে ৰাজ্যৰ অৰ্থনৈতিক পৰিস্থিতি কোঙা কৰিছে। এনে আঁচনিৰ বাবে চৰকাৰে কোটি কোটি টকা ঋণ লৈছে। ইমানৰ পাছতো নতুন নতুন আঁচনি চৰকাৰে ঘোষণা কৰি আছে। চলিত থকা আঁচনিৰো হিতাধিকাৰীৰ সংখ্যা বৃদ্ধি কৰা হৈছে। ঋণৰ মাত্রা বৃদ্ধি হোৱাৰ পৰিণাম অসম গণ পৰিষদ চৰকাৰৰ দিনত ৰাইজে ভুগিছিল। বিত্তীয় বিশৃংখলতাই ১৯৮৫-১৯৯০ লৈ অসমক অর্থনৈতিকভাৱে অস্থিৰ কৰি তুলিছিল। সেই পৰিস্থিতিৰ পুনৰাবৃত্তি ঘটাতো স্পষ্ট হৈ পৰিছে।’
পত্ৰখনৰ জৰিয়তে এএফআৰবিএম আইনখন কঠোৰভাৱে মানি চলিবলৈ ৰাজ্য চৰকাৰক বাধ্য কৰাব লাগে বুলি উচ্চ ন্যায়ালয়ক আহ্বান জনোৱা হৈছে। চৰকাৰক বাজেট বহির্ভূত ব্যয় বন্ধ কৰিবলৈ অন্তর্বতীকালীন স্থগিতাদেশ জাৰি কৰিবলৈও পত্রখনত ন্যায়ালয়ক আহ্বান জনোৱা হৈছে। আইন ভংগৰ বাবে অসম চৰকাৰক কৈফিয়ৎ তলৱৰো ন্যায়ালয়ক আহ্বান জনাইছে বিৰোধী দলপতিজনে।