Two former MLAs resign in Assam:
শাসকীয় বিজেপি আৰু অগপত গৰাখহনীয়া ৷ প্ৰভাৱশালী দুই প্ৰাক্তন বিধায়ক অগপৰ সত্যৱত কলিতা আৰু বিজেপিৰ বিনন্দ শইকীয়াই আজি নিজ নিজ দলৰ পৰা পদত্যাগ কৰে ৷ কমলপুৰৰ অগপৰ প্ৰাক্তন বিধায়ক সত্যৱত কলিতাই বাৰ্তাবাহকৰ জৰিয়তে তেওঁৰ পদত্যাগ পত্ৰ প্ৰেৰণ কৰে দলৰ সভাপতি অতুল বৰালৈ ৷ একেদৰে ছিপাঝাৰৰ বিজেপিৰ প্ৰাক্তন বিধায়ক বিনন্দ শইকীয়াই দৰ সভাপতিলৈ পদত্যাগ পত্ৰ প্ৰেৰণ কৰে ৷
উল্লেখ্য যে,ছিপাঝাৰৰ প্ৰাক্তন বিধায়ক বিনন্দ শইকীয়াই পূৰ্বতে কংগ্ৰেছত আছিল যদিও মুখ্যমন্ত্ৰী ড:হিমন্ত বিশ্ব শৰ্মা ২০১৪ত বিজেপিত যোগদান কৰাৰ কিছুমাহৰ পিছতে তেওঁৱো কংগ্ৰেছ ত্যাগ কৰি বিজেপিত যোগদান কৰে ৷ বিগত বিধানসভা নিৰ্বাচনত অন্যতম টিকট প্ৰত্যাশী আছিল যদিও শইকীয়াক বঞ্চিত কৰি ন বিজেপি পৰমানন্দ ৰাজবংশীক টিকট দিয়া হয় । তেতিয়াৰ পৰা ক্ৰমাৎ দলৰ পৰা ব্যৱধান বৃদ্ধি পায় শইকীয়াৰ ৷ আনকি এসময়ত ড:হিমন্ত বিশ্ব শৰ্মাৰ সোঁহাত স্বৰূপ হিচাপে পৰিচিত বিনন্দ শইকীয়া শেহতীয়াকৈ বিজেপিৰ মজিয়াত একাষৰীয়া হোৱাত অস্তিত্ব সংকটত ভোগি অৱশেষত দলত্যাগ কৰিবলৈ বাধ্য হয় ৷
আনহাতে অসম আন্দোলনৰ কৰ্মী তথা অগপৰ সাধাৰণ সম্পাদক আৰু অগপৰ শাসনৰ কালছোৱাত কমলপুৰৰ পৰা বিধায়ক ৰূপে বিধানসভাৰ আসন শুৱনি কৰা সত্যৱত কলিতা বিগত দিনত দলৰ পৰা টিকট লাভ কৰা নাছিল ৷ কিয়নো বিজেপিৰে অগপৰ মিত্ৰতা হোৱা সূত্ৰে ২০১৬ আৰু ২০২১ ত কমলপুৰ সমষ্টিতো এৰি দিয়া হৈছিল বিজেপিক ৷ সেই সূত্ৰে বৰ্তমান সমষ্টিটোৰ বিধায়ক ৰূপে কাৰ্যনিৰ্বাহ কৰি আছে দিগন্ত কলিতাই ৷ অগপৰ টিকটত পুনৰ কমলপুৰৰ পৰা টিকট প্ৰত্যাশী হৈ থকা সত্যৱত কলিতাই শেহতীয়াকৈ বিভিন্ন মহলত নিশ্চিত হৈছিল যে কমলপুৰ সমষ্টিটো পুনৰ বিজেপিক এৰি দিব অগপই ৷ এনে আশংকা কৰিয়েই সত্যৱত কলিতাই অগপ পৰা দলত্যাগ কৰে বুলি বিভিন্ন মহলত সৰৱ চৰ্চা লাভ কৰিছে ৷
আনহাতে অগপৰ প্ৰভাৱশালী জ্যেষ্ঠ নেতা সত্যৱত কলিতাৰ পদত্যাগৰ পিছত কমলপুৰ অগপত পদত্যাগৰ জোৱাৰ উঠিছে ৷ শেহতীয়া খবৰ অনুসৰি সমূহীয়াভাৱে দলত্যাগ কৰিলে কমলপুৰ সমষ্টি অগপ সমিতিয়ে ৷ কাৰ্যত অগপ শূন্য হ’ল কমলপুৰ বিধানসভা সমষ্টি ৷ দলত্যাগি অগপ তৃণমূল নেতা- কৰ্মীয়ে ক্ষোভ উজাৰে দলৰ সভাপতি অতুল বৰাৰ বিৰুদ্ধে ৷
আনহাতে বিশেষ খবৰ অনুসৰি দুই দলত্যাগি প্ৰাক্তন বিধায়ক সত্যৱত কলিতা আৰু বিনন্দ শইকীয়াই কংগ্ৰেছত যোগদানৰ সম্ভাৱনা আছে ৷ এই সন্দৰ্ভত দুয়োজনে সুকীয়া সুকীয়াকৈ কংগ্ৰেছ নেতৃত্বৰ স’তে আলোচনাত মিলিত হৈছে ৷ হয়তো দুই – এদিনৰ ভিতৰতে দুয়োজন নেতাই কংগ্ৰেছত যোগদান কৰিব বুলি ৰাজিৱ ভৱনৰ সূত্ৰে জানিব পৰা গৈছে ৷
ৰাজ্য বিধানসভা নিৰ্বাচনলৈ মাজত মাত্ৰ কেইটামান মাহ থকা অৱস্থাত শাসকীয় বিজেপি- অগপৰ দুগৰাকীকৈ প্ৰাক্তন বিধায়কে নিজ নিজ দলৰ পৰা পদত্যাগৰ ঘটনাই কিবা প্ৰভাৱ পৰে নে নপৰে সেয়া আগন্তুক দিনত হ’ব লক্ষণীয় ৷