Guwahati Child Dead Incident:
মহানগৰীৰ আৰ্যনগৰৰ এ কে আজাদ ৰোডত দুৰ্ভাগ্যজনকভাৱে খেলি থকা অৱস্থাতে ঘৰৰ সন্মুখৰ নিৰ্মীয়মাণ পদপথৰ উন্মুক্ত অংশৰে নলাত সৰি পৰি তিনিবছৰীয়া সুনিত কুমাৰ নাদৰ নিস্পাপ শিশুৱে বুধবাৰে প্ৰাণ হেৰুৱাই ৷ এই ঘটনাই জোকাৰিছে গুৱাহাটীবাসীক৷ ইতিমধ্যে মুখ্যমন্ত্ৰী ড:হিমন্ত বিশ্ব শৰ্মাই ঘটনাৰ তদন্তৰ নিৰ্দেশ দিয়াৰ পিচতে থৰকাছুটি হেৰুৱা ফটাশিল- আমবাৰী আজি আৰক্ষীয়ে আজি বিআইপিএল কনষ্ট্রাকচন কোম্পানীৰ তিনিজন বিষয়াক গ্ৰেপ্তাৰ কৰে ৷ আটকাধীন বিষয়া কেইগৰাকী হ’ল বিআইপিএলৰ সঞ্চালক অবিনাশ ভাটিয়া,ডেপুটি প্ৰজেক্ট মেনেজাৰ প্ৰসেনজিৎ কাকতি আৰু সুৰক্ষা অভিযন্তা কৌশিক গগৈ ।
ফটাশিল- আমবাৰীৰ এ কে আজাদ ৰোডৰ বাসিন্দা সকলৰ অভিযোগ বিআইপিএল নামৰ কনষ্ট্রাকচন কোম্পানীটোৰ কৰ্মচাৰীৰ গাফিলতিৰ বাবে উন্মুক্ত হৈ আছিল নলাটো ৷ ফলত কৰুণ মৃত্যুক সাবটিলবলগীয়া হৈছিল শিশুটি ৷
উল্লেখযোগ্য বুধবাৰৰৰ ঘটনাটো এক হত্যাকাণ্ড বুলিও স্থানীয় ৰাইজে অভিযোগ কৰে। কাৰণ সেতুৰ লগতে নলা নির্মাণ কার্য অতি বিপজ্জনকভাবে চলাই থকা হৈছে। নিশাৰ কথা বাদেই, দিনতেই মানুহ নির্মীয়মাণ পদপথৰে খোজ কাঢ়ি যোৱাটো অতি বিপজ্জনক হৈ পৰিছে। কোনো ধৰণৰ সুৰক্ষা ব্যৱস্থা গ্রহণ নকৰাকৈ এই কাম কৰি অহা হৈছে। প্রশাসনো অস্তিত্বহীন।
পৌৰ নিগমৰ স্থানীয় পাৰিষদৰ পৰা আৰম্ভ কৰি আৰক্ষী, জিলা প্ৰশাসনৰ প্ৰতিনিধি কোনেও এই ধৰণৰ বিপজ্জনক পৰিৱেশক ন্যূনতমো গুৰুত্ব দিয়া নাই। স্থানীয় ৰাইজে ইয়াৰ বিৰুদ্ধে বিভিন্ন সময়ত অভিযোগ উত্থাপন কৰি আহিছে। তেনে অভিযোগ অৰণ্যৰোদনত পৰিণত হৈছে। গতিকে নিজৰ ঘৰৰ সন্মুখত খেলি থকা অৱস্থাত কালি যিদবে শিশুটিয়ে প্রাণ হেৰুৱালে, সেয়া প্রকাৰান্তৰে এক হত্যা বুলি ৰাইজে অভিযোগ উত্থাপন কৰে। কালিৰ ঘটনাটোক লৈ স্থানীয় বহু লোকে আজি প্ৰতিবাদ সাব্যস্ত কৰে। ইয়াৰ ফলত বৃহস্পতিবাৰে পুৱা দীর্ঘ সময় ব্যস্ত এ কে আজাদ ৰোড সম্পূৰ্ণৰূপে বন্ধ হৈ পৰে।
ৰাইজে কৰা পথ অৱৰোধত আৰক্ষীও দৌৰি আহে। নানান কূট কৌশলৰে আৰক্ষীয়ে পথ অৱৰোধ প্রত্যাহাৰ কৰিবলৈ ৰাইজক বাধ্য কৰায়। পথ অৱৰোধক লৈ আৰক্ষী ঘটনাস্থলীত উপস্থিত হোৱাৰ বিপৰীতে কালিৰে পৰা দুৰ্ভগীয়া পৰিয়ালটোৰ ওচৰত কোনো থিয় হোৱা নাই। প্ৰশাসনৰ লোক, স্থানীয় জনপ্রতিনিধি, ঠিকাদাৰী প্ৰতিষ্ঠানটোৰ প্ৰতিনিধি, কাৰো ওচৰত শিশুটি হেৰাই যোৱা ঘটনাটোৰ মূল্য নাই। আৰ্যনগৰৰ বাসিন্দা ব্যৱসায়ী অজয় দাসে কয়, ‘উৰণ সেতু আৰু পদপথ নিৰ্মাণৰ নামত আমাৰ গোটেই অঞ্চলটোত এক ভয়ংকৰ পৰিবেশৰ সৃষ্টি কৰা হৈছে।
কোনো ধৰণৰ সুৰক্ষা ব্যৱস্থা গ্রহণ নকৰাকৈ নির্মাণকার্য চলাই থকা হৈছে। সাধাৰণ ৰাইজৰ প্ৰতি কাৰো দায়িত্ব নাই। তেওঁলোকৰ বেপৰোৱা কাৰ্যব পৰিণাম কি হ’ব পাবে, তাৰ প্ৰতি ন্যূনতমো গুৰুত্ব নাই। পদপথত যেনি-তেনি লোহা ওলাই আছে। সেইবোৰত লাগি বহু লোক আঘাতপ্রাপ্ত হৈছে। আমাৰ ৰাইজে নিৰ্মাণৰ দায়িত্বত থকাসকলক এই বিষয়ে বহুবাৰ অভিযোগ দিছে; অথচ অভিযোগৰ প্ৰতি কোনো গুরুত্ব নাই। শেষত কালি এটা জীবনেই শেষ হৈ গ’ল। তাৰ পাছতো যেন কাৰোবেই দায়িত্ব নাই। মুঠতে এক অৰাজক পৰিস্থিতি হৈছে। সেইবাবে আজি ৰাইজে পথ অৱৰোধ কৰি প্ৰতিবাদ সাব্যস্ত কৰিবলৈ বাধ্য হয়।’ কালি ঘটনা সংঘটিত হোৱা অংশটোকে ধৰি পদপথটোত ২০টা স্থান উন্মুক্ত হৈ আছে আৰু সেইবোৰত কোনো ধৰণৰ সুৰক্ষা ব্যৱস্থা নাই।
ইপিনে, বৃহস্পতিবাৰে শিশুটিৰ গুৱাহাটী চিকিৎসা মহাবিদ্যালয় হাস্পতালত মৰণোত্তৰ পৰীক্ষা সম্পন্ন কৰা হয়। খেলি থকা অৱস্থাতে নলাত সৰি পৰা শিশুটি বহু সময় ধৰি ঘৰৰ মানুহে দেখা পোৱা নাছিল। তেতিয়াহে বিচাৰ-খোচাৰত নামিছিল। -এটা চিচি কেমেৰাত শিশুটি নলাত পৰাৰ দৃশ্য আবদ্ধ হৈছিল। তেনেদৰেহে শিশুটিৰ সন্ধান ওলাইছিল। নলাটো প্রায় সাত ফুট দ। তাত চাৰি ফুট পানী আছিল। সেই পানীত ওপঙি আছিল শিশুটিৰ নিথৰ দেহ। এনেদৰে হঠাৎ সন্তানক হেৰুওৱা ঘৰখনত বিৰাজ কৰিছে অবর্ণনীয় পৰিৱেশ। পিতৃ-মাতৃ, ককাক-আইতাক, আনকি চুবুৰীয়াও শোকত দগ্ধ। পিতৃ-মাতৃক সান্ত্বনা দিবলৈ কাৰো ভাষা নাই। তাৰ মাজতে যন্ত্রবৎ আজি মৰণোত্তৰ পৰীক্ষাৰ সময়ত জিএমচি এইছত উপস্থিত থাকে। শোকত দগ্ধ মাতৃ মূহূর্তে মুহূর্তে মূছকছ যায়।