Cooch Behar:✒️ঘৰত চলিছে ভোজৰ মহা আয়োজন। গাঁৱৰ মানুহবোৰতো আছিলেই, নিমন্ত্রিত অতিথিসকলৰ ভিতৰত আছিল অঞ্চলটোৰ খণ্ড উন্নয়ন বিষয়া, সীমান্তৰক্ষা বাহিনীৰ বিষয়াসকলো। আচলতে বয়সৰ শতক আগতেই সম্পূৰ্ণ কৰিছিল সেই ঘৰৰ গৰাকী নৃপেন্দ্ৰ বৰ্মনে। এইবাৰ পালন কৰা হৈছে তেওঁৰ অন্নপ্রাসন।
বৃদ্ধৰ নাতি-নাতিনীৰ পৰা আৰম্ভ কৰি পৰিয়ালৰ মানুহে এই আয়োজন কৰিছে। শিশুৰ প্ৰথম দাঁত গজাৰ পাছত অন্নপ্রাসন পতা হয়। অথচ শতায়ু গৰকা বৰ্মনৰ অন্নপ্রাসনৰ আয়োজন কৰা বিষয়টোও আমোদজনক। কিয়নো এশ বছৰ পাৰ কৰাৰ পাছত বৃদ্ধৰ মুখত পুনৰ গজিছিল গাখীৰ দাঁত।
বৃদ্ধৰ এই অন্নপ্রাসনৰ আয়োজনক কেন্দ্র কৰি কোচবিহাৰৰ হলদিবাড়ি গাঁৱত এতিয়াও চর্চা অব্যাহত আছে।কোচবিহাৰৰ ভাৰত-বাংলাদেশ সীমান্তৰ বড় হলদিবাড়ি গাঁৱৰ বাসিন্দা বৰ্মন।
সেই গাঁও তথা জিলাৰ প্ৰবীণতম ব্যক্তি হয়তো তেৱেঁই। গাঁৱৰ সকলোৰে মাজত তেওঁ দাদু বুলিয়েই পৰিচিত। ভোটাৰ কাৰ্ডৰ হিচাপ ধৰিলে এই মুহূৰ্তত তেওঁৰ বয়স ১০২ বছৰ। যদিও বৰ্মনে দাবী কৰে যে তেওঁৰ বয়স এতিয়া ১১৩ বছৰ। বৃদ্ধৰ তিনি প্ৰজন্ম একেটা ঘৰতে থাকে। পৰিয়ালত তেওঁৰ তিনি পুত্ৰ আৰু চাৰি কন্যা।
নাতি-নাতিনীৰ সংখ্যাও ৩৪। নাতি-নাতিনীসকলে ‘দাদু’ক লৈ সকলো সময়তে উলাহত থাকে। বয়সৰ ভৰত তথা প্রাকৃতিক নিয়মত আগতেই বৃদ্ধৰ বহু দাঁত সৰিছিল। মুখত লাগি থকা বাকী দুই-তিনিটামান দাঁতো ইতিমধ্যে ক্ষয় যাবলৈ আৰম্ভ কৰিছিল।
সম্প্রতি নাতি-নাতিনীসকলে লক্ষ্য কৰে যে ককাকৰ পুনৰ দাঁত গজিছে। মুখৰ আলু ফুটি শুধ বগা তিনিটা ‘গাখীৰ দাঁত’ ওলাই আহিছে। তাৰ পাছৰে পৰাই বৃদ্ধক কেন্দ্ৰ কৰি নাতি-নাতিনীসকলৰ মাজত নতুনকৈ উৎসাহ আৰম্ভ হয়।
পৰম আহ্লাদিত হৈ পৰে নাতি-নাতিনীকে ধৰি পৰিয়ালৰ সদস্যসকল। তেওঁলোকে ঠিক কৰে যে বৃদ্ধৰ অন্নপ্রাসন পতা হ’ব আৰু সেয়া হ’ব অতি আড়ম্বৰপূৰ্ণভাবে। যোৱা শুকুৰবাৰে অন্নপ্রাসনৰ অনুষ্ঠানক কেন্দ্ৰ কৰিয়ে সমগ্ৰ গাঁওখনতে উৎসৱমুখৰ পৰিৱেশ দেখা গ’ল।
অঞ্চলটোৰ লোকসৰলৰ উপৰি আমন্ত্ৰণ ৰক্ষা কৰিবলৈ আহিছিল হলদিবাড়িৰ খণ্ড উন্নয়ন বিষয়া ৰেঞ্জি লামু ভূটীয়া আৰু বিএছএফৰ একাংশ বিষয়াই। সকলোৱে বৃদ্ধ বৰ্মনৰ দীর্ঘায়ু কামনা কৰে।
উল্লেখ্য যে শতায়ু গৰকিলেও বৃদ্ধ বৰ্মন এতিয়াও শাৰীৰিকভাৱে শক্তিসমর্থ। এতিয়াও নিজেই খোজকাঢ়ি ফুৰিব পাৰে। এটা সময়ত তেওঁৰ ঘৰ আছিল বৰ্তমানৰ বাংলাদেশৰ ৰংপুৰ জিলাৰ মুক্তিৰহাটৰ ভোগডাবুড়ি গাঁৱত। ১৯৭২ত তেওঁ ভাৰতলৈ গুচি আহে। তেতিয়াৰ পৰাই তেওঁ সেই অঞ্চলতে বাস কৰি আছে।
বৃদ্ধ বয়সত এনে অন্নপ্রাসন অনুষ্ঠানৰ বাবে তেওঁ কিছু লজ্জিতও অনুভৱ কৰিছে। তথাপি নাতি-নাতিনীৰ এনে মৰমত তেওঁ অনেক তৃপ্তও বুলি জনাইছে।
