Gaurav Gogoi:✒️অসমক দেশৰ উন্নত পাঁচখন ৰাজ্যৰ ভিতৰত স্থান দিয়াৰ প্রতিশ্রুতি দিয়া মুখ্যমন্ত্রী ড° হিমন্ত বিশ্ব শৰ্মাক উন্নয়নৰ দিশত সকলো ক্ষেত্রতে ব্যর্থ আখ্যা দিছে প্রদেশ কংগ্ৰেছৰ সভাপতি গৌৰৱ গগৈয়ে। কালি ফকিৰাগ্ৰামত বিটিচি নিৰ্বাচনৰ দলীয় প্রার্থী সমর্থনত ড০ হাছনা আৰা বেগমৰ সমর্থনত এখন জনাকীর্ণ সভাত ভাষণ দি গগৈয়ে মন্তব্য কৰে যে মুখ্যমন্ত্রী ড° শৰ্মা কেৱল মানুহৰ মাজত সংঘাত লগোৱাতহে সফল।
তেওঁ কয়, ‘মুখ্যমন্ত্রীয়ে বিটিচিৰ ভিচিডিচিত দুর্নীতি সংঘটিত হৈছে বুলি অভিযোগ উত্থাপন কৰি আহিছে। কিন্তু ১০ বছৰ কেন্দ্ৰ-ৰাজ্যত বিজেপিৰ চৰকাৰ থকাৰ পাছতো বিটিআৰত কেনেদৰে দুর্নীতি হ’বলৈ পালে?’
শিক্ষা আৰু স্বাস্থ্যৰ ক্ষেত্ৰত দেশৰ ৰাজ্যসমূহৰ ভিতৰত অসমে তল ফালেহে স্থান পালে বুলি উল্লেখ কৰি তেওঁ কয় যে ইয়াৰ দায়িত্ব মুখ্যমন্ত্রীয়ে ল’ব লাগিব। বিজেপিৰ মাজত কেৱল গৰু চোৰ, ভোট চোৰেই নাই, মাটি চোৰো আছে বুলি গগৈয়ে কটাক্ষ কৰে। তেওঁ কয়, ‘বাহুল গান্ধীয়ে বিজেপিত ভোট চোৰ আছে বুলি কৈ আহিছে। মই বিটিআৰলৈ আহি গম পালো যে বিজেপিৰ মাজত মাটি চোৰো আছে। গতিকে বিজেপিৰ মাজত গৰু চোৰ, ভোট চোৰেই নাই, মাটি চোৰো আছে।’
প্রদেশ কংগ্ৰেছৰ সভাপতিজনে লগতে অভিযোগ উত্থাপন কৰে যে বিজেপিৰ স’তে বিপিএফ আৰু ইউপিপিএলৰ গোপন বুজাবুজি আছে। নিজৰ নিৰাপত্তা, ভবিষ্যৎ সুৰক্ষিত কৰিব বিচাৰিলে কংগ্রেছক ভোট দিবলৈ তেওঁ ৰাইজক আহ্বান জনায়।
গগৈয়ে কয়, ‘আপোনালোকে যদি নিজৰ নিৰাপত্তা বিচাৰে, সুৰক্ষিত ভবিষ্যৎ বিচাৰে তেন্তে কংগ্রেছক সমর্থন জনাব। গোপন বুজাবুজি কৰা দলক সমর্থন কৰিব নে?’ এইবাৰৰ বিটিচি নির্বাচনত কংগ্রেছে তিনিগৰাকী মহিলাক প্রার্থিত্ব দিছে বুলিও তেওঁ কয়। এই সভাতে আগন্তুক ২০২৬ৰ বিধানসভা নির্বাচনৰো ৰণশিঙা বজায় গগৈয়ে। সাত মাহৰ পাছত অনুষ্ঠিত হ’ব লগা বিধানসভা নিৰ্বাচনৰ জৰিয়তে ৰাজ্যত কংগ্ৰেছে চৰকাৰ গঠন কৰিব বুলিও তেওঁ দাবী কৰে।
বিজেপিক সমালোচনা কৰি গগৈয়ে লগতে কয়, ‘বিজেপিয়ে বাঙালীসকলৰ ‘ডি’ ভোটাৰৰ সমস্যা সমাধান নকৰিলে। জনজাতিকৰণৰ দাবীত প্রতিবাদ কৰা কোচ ৰাজবংশীসকলৰ আৰক্ষী নিয়োগ কৰি প্ৰহাৰ কৰালে। দৰাচলতে বিজেপিৰ ভোটক লৈ চিন্তা নাই। বাঙালী, নেপালী জনগোষ্ঠী আদিয়ে ভোট নিদিলেও তেওঁলোকৰ চিন্তা নাই। কাৰণ তেওঁলোকে ভোট চুৰি কৰে।’ সভাখনত কংগ্ৰেছ নেত্রী মীৰা বৰঠাকুৰ আদিয়েও অংশগ্রহণ কৰে।