Bone glu:✒️হাত-ভৰি আদিৰ হাড় ভাঙিলে যিমান বেদনা অনুভৱ কৰা হয় তাতকৈ অধিক কষ্ট -অসুবিধা সহ্য কৰিবলগীয়া হয় ইয়াৰ চিকিৎসাৰ ক্ষেত্ৰত। কাৰণ ভঙা হাড় জোৰা দিবলৈ সাধাৰণতে প্লাষ্টাৰ কৰা হয়। চিকিৎসাত ধাতব প্লেটো ব্যৱহাৰ কৰা হয়। দীঘলীয়া সময় ধৰি প্লাষ্টাৰ লগাই ৰাখিলেহে ভঙা হাড় পুনৰ জোৰা লাগে।
এই সময়ছোৱাত কেনে অসুবিধাৰ সম্মুখীন হ’বলগীয়া হয়, সেয়া ভুক্তভোগীয়েহে অনুধাৱন কৰে। তদুপৰি বয়স্ক ব্যক্তিৰ হাড় ভাগিলে সমস্যা অধিক বৃদ্ধি পায়। এই ক্ষেত্রত শেহতীয়াভাৱে এক সুখবৰ আহিছে। চীনৰ ঝেজিয়ান প্রদেশৰ একাংশ বিজ্ঞানীয়ে ভঙা হাড় জোৰা দিয়া এবিধ বিশেষ আঠা উদ্ভাবন কৰিছে।
সংশ্লিষ্ট বিজ্ঞানীসকলৰ মতে এই আঠা লগালে ভঙা হাড় জোৰা দিবলৈ প্লাষ্টাৰ কৰাৰ প্রয়োজন নহ’ব। চীনৰ বিজ্ঞানীয়ে উদ্ভাৱন কৰা এই আঠাৰ নাম ‘ব’ন-০২’। এই আঠা উদ্ভাৱন কৰা বিজ্ঞানীৰ দলটোক নেতৃত্ব দিয়া গবেষক লীন জিয়ানফেঙে মন্তব্য কৰিছে যে যি ঠাইত হাড় ভাঙে, সেই ঠাইত আঠাবিধ লগাই দিলেই পুনৰ ভঙা হাড় জোৰা লাগে।
আনকি এই আঠাবিধৰ শক্তি ইমানেই প্রবল যে নির্দিষ্ট স্থানত মাথোঁ তিনি মিনিট এই আঠা লগাই ৰাখিলেই ভঙা হাড় পুনৰ জোৰা লাগে। পুনৰ জোৰা লগাৰ পাছত হাড়ৰ বৃদ্ধিও স্বাভাবিক হ’ব। এই আঠাবিধৰ আন এটা চমৎকাৰী গুণ হ’ল যে এই আঠা লগোৱাৰ ফলত ৰোগীয়ে কোনো যন্ত্রণা বা বেদনা অনুভর নকৰে।
একেদৰে প্লাষ্টাৰ কৰাৰো সমস্যা নাথাকে। উল্লেখ্য যে হাড়ৰ অনেক স্তৰ থাকে। একেবাৰে বাহিৰৰ স্তৰত এখন পর্দা থাকে। এই পৰ্দাক পেৰিঅস্ট্রিয়াম বুলি কোৱা হয়। তাৰ পাছতে কর্টিকল থাকে। এই কর্টিকলৰ মাজত মজ্জা থাকে। গতিকে হাড়ৰ গঠন ত্রিমাত্রিক হয়।
কেতিয়াবা হাড় নাভাঙিলেও হাড়ৰ স’তে যুক্ত লিগামেন্ট ফাটি যায়। কেৱল দুর্ঘটনা বা তেনে কাৰণতে হাড় যে ভাঙে তেনে নহয়। অস্ট্রিয়পৰেচিছ, ভিটামিন-ডিৰ অভাৱ বিউমাটয়েড, আর্থাইটিছ থাকিলে বা আন কাৰণতো হাড় ভাঙিব পাৰে। তদুপৰি জন্মগত কাৰণত হাড়ৰ শক্তি কম থাকিলেও সহজে হাড় ভাঙে।
অৱশ্যে যি কাৰণতেই হাড় নাভাঙক কিয়, ইয়াৰ চিকিৎসা পদ্ধতি জটিল। প্রথম এক্স-বে, চিটি স্কেন আৰু আনকি কিছু ক্ষেত্ৰত এমআইআৰ কৰাৰো প্ৰয়োজন হয়। তাৰ পাছতে স্প্রিন্ট দি সাময়িকভারে ভঙা অংশ ধৰি ৰখা হয়।
এই সময়ছোৱাত চিকিৎসকে সিদ্ধান্ত লয়, ভঙা হাড় জোৰা দিবলৈ প্লাষ্টাৰ কৰা হ’ব নে, অস্ত্রোপচাৰৰ প্ৰয়োজন আছে। ভাঙি দুটা টুকুৰাত পৰিণত হোৱা হাড় জোৰা দিবলৈ সাধাৰণতে প্লাষ্টাৰ কৰা হয়। ইয়াৰ বাবে ধাতব প্লেট, স্ক্রু বা ৰডৰো প্রয়োজন হ’ব পাৰে।
প্লাষ্টাৰ কৰাৰ পাছত সংশ্লিষ্ট স্থানত পেশীৰ সঞ্চালন ঠিকে আছে নে নাই, তাৰ প্ৰতিও চিকিৎসকে লক্ষ্য ৰাখে। শেহতীয়াভাবে হাড় জোৰা দিয়া আঠা উদ্ভাৱন কৰা চীনা বিজ্ঞানীসকলৰ মতে, এই আঠা ব্যৱহাৰ কৰিলে এনে জটিল চিকিৎসা পদ্ধতিৰ আৰু প্রয়োজন নহ’ব।
ইতিমধ্যে ডেৰশ লোকৰ ভঙা হাড় জোৰা দিয়াত এই আঠা প্রয়োগ কৰি সফলতা অর্জন কৰা হৈছে বুলিও বিজ্ঞানীসকলে জনায়। অর্থাৎ এই ডেৰশ লোকৰ হাড় পুনৰ জোৰা লাগিল।