Biswakarma Puja Celebration In Guwahati:
আজি বিশ্ব খনিকৰ শ্ৰীশ্ৰী বিশ্বকৰ্মাৰ পূজা৷ সমগ্ৰ দেশৰ লগতে ৰাজ্যজুৰি বিশ্ব খনিকৰ বিশ্বকৰ্মা পূজাৰ ব্যাপক আনন্দ উছাহ ৷ গুৱাহাটী মহানগৰীত মঙলবাৰে বিশ্বকৰ্মাৰ পূজাৰ প্ৰস্তুতিৰ মাজতে পুৱা দিয়া এজাক মুষলধাৰ বৰষুণে যথেষ্ট বিধি পথালি দিয়ে যদিও আজি পূজাৰ দিনটোত পুৱাতে ডাৱৰীয়া বতৰ আছিল যদিও দুপৰীয়া দিয়া ক্ষীণ ৰ’দচালিয়ে সকলোৰে মন পুলকিত কৰি তোলে ৷ মহানগৰীৰ বিভিন্ন কল – কাৰাখানা,গেৰেজ আদিৰ লগতে ছপা আৰু বৈদ্যুতিন মাধ্যমৰ কাৰ্যালয়তো বিস্তৃত কাৰ্যসূচীৰে শিল্পৰ দেৱতাৰ আৰাধনা উৎসৱ বিশ্বকৰ্মা পূজা উদযাপন কৰা হয় ৷
ৰাজ্যৰ অগ্ৰণী সংবাদ প্ৰতিষ্ঠান ‘দৈনিক অগ্ৰদূত পাব্লিচাৰ্ছ লিমিটেড’ৰ মহানগৰীৰ গণেশগুৰি জটিয়াস্থ কাৰ্যালয়টো উদযাপন কৰা হয় বিশ্বকৰ্মা পূজাভাগ ৷ পুৰোহিতৰ বৈদিক মন্ত্ৰোচ্চাৰণ আৰু হোম যজ্ঞৰে পূজাৰ কাম আৰম্ভ হয় ৷
আনহাতে উত্তৰ-পূবৰ একমাত্ৰ বিশ্বকর্মা মন্দিৰ হিচাপে পৰিচিত মালিগাঁৱৰ ‘বিশ্বকৰ্মা মন্দিৰ’ত পুৱাৰে পৰা ভক্তৰ লানিনিচিঙা সোত ৷ ভক্তৰ অভাৱনীয় ভিৰে এক আনন্দময় পৰিবেশৰ সৃষ্টি কৰিছে ৷ গুৱাহাটীৰ কামাখ্যা গে’টৰ ৰাজপথত যান-বাহনৰ দীঘলীয়া শাৰী। ‘বিশ্বকৰ্মা মন্দিৰ’ চৌহদত অর্ধশতাধিক পুৰোহিতৰ বৈদিক মন্ত্ৰোধ্বনি আৰু ঢাকৰ শব্দৰ মাজৰেৰে ইতিমধ্যে কৰিছে পূজা-অৰ্চনা ৷
