BJP:
প্ৰাণৰ শিল্পী জুবিন গাৰ্গক ন্যায়ালয়ৰ জৰিয়তে ন্যায় প্রদান কৰিবলৈ ৰাজ্যিক বিজেপিয়ে অহা ২২ৰ পৰা ৩০ অক্টোবৰলৈ প্ৰতিখন জিলা সদৰত ৰূপায়ণ কৰিব ‘বিশাল জন সমদল’। এই কাৰ্যসূচী নলবাৰীৰ জিলাৰ পৰা আৰম্ভ হ’ব। এক প্রেছ বার্তাত ৰাজ্যিক বিজেপিৰ মুখপাত্র প্রাঞ্জল কলিতাই এই কথা সদৰী কৰিছে।
উল্লেখ্য যে ৰাজ্যৰ বিভিন্ন প্ৰান্তৰ লগতে আজি ৰাজ্যিক বিজেপিৰ মুখ্য কার্যালয় বশিষ্ঠস্থিত অটল বিহাৰী বাজপেয়ী ভৱনত জুবিন গাৰ্গৰ এমহীয়া শ্রদ্ধাঞ্জলি অনুষ্ঠান অনুষ্ঠিত হয়। সমান্তৰালভাবে শাসকীয় দলটোরে জুবিন গাৰ্গৰ ন্যায় সন্দৰ্ভত আৰু স্মৃতি যুগমীয়া কৰিবলৈ এলানি কাৰ্যসূচী ঘোষণা কৰিছে। ‘ময়ো জুবিন অনুৰাগী, আমিও জুবিন অনুৰাগী’ শীর্ষক ডিজিটেল আন্দোলন কার্যসূচী গ্রহণ কৰি ৰাজ্যৰ সকলো জুবিন অনুৰাগীয়ে চলোবা ন্যায় যাত্রাত চামিল হৈছে বুলি মুখপাত্র কলিতাই বার্তাটোত উল্লেখ কৰি লগতে কয় যে উল্লিখিত জন সমদল কার্যসূচীৰ উপৰি অহা ২৬ অক্টোবৰত ৰাজ্যখনৰ ২৫ হেজাৰৰো অধিক বুথত প্রধানমন্ত্রীৰ ‘মন কী বাত’ কাৰ্যসূচীৰ লগত জুবিন গাৰ্গৰ শ্রদ্ধাঞ্জলি আৰু স্মৃতিচাৰণ সভাৰ আয়োজন কৰা হৈছে। একেদবে বিজেপিৰ কৰ্মকর্তাসকলে প্ৰাণৰ শিল্পীগৰাকীৰ স্মৃতি যুগমীয়া কৰিবলৈ এজোপাকৈ নাহৰ গছ ৰোপণ কৰাৰ লগতে প্রতিপালন কৰিব বুলি কলিতাই উল্লেখ কৰি কয়, ‘প্রাণৰ শিল্পী জুবিন গাৰ্গৰ স্মৃতি যুগমীয়া কৰিবলৈ দলৰ বিধায়ক আৰু সাংসদসকলে নিজৰ সমষ্টিত জুবিন গাৰ্গৰ একোটাকৈ প্রতিমূর্তি স্থাপন কৰিব। প্রতিখন জিলাত সৰ্বস্তৰৰ নিৰ্বাচিত বিজেপিৰ জনপ্রতিনিধিসকলৰ সহযোগত প্ৰাণৰ শিল্পীগৰাকীৰ স্মৃতি যুগমীয়া কৰিবলৈ একোখন সংগীত বিদ্যালয় স্থাপন কৰা হ’ব।
জুবিন গাৰ্গৰ প্রতি শ্রদ্ধা নিবেদন কৰিবলৈ বিজেপিৰ সাংসদ, বিধায়কসকলে নিজ সমষ্টিত একোখনকৈ প্রদর্শনীমূলক ফুটবল খেলবো আয়োজন কৰিব। ইয়াৰ উপৰি প্ৰাণৰ শিল্পীগৰাকীৰ হৃদয় জুৰুৱা গীত পৰিবেশনৰে পাঁচ হেজাৰ জুবিন অনুৰাগী দলীয় কর্মকর্তা, সমর্থক, শুভাকাংক্ষীসকলে সামুহিক শ্রদ্ধাঞ্জলি নিবেদন কৰিব। একেদৰে অহা ১৮ নৱেম্বৰত জুবিন গাৰ্গৰ জন্মদিনৰ পৰা আৰম্ভ কৰি ৩০ নৱেম্বৰৰ ভিতৰত সামুহিক গীত পৰিবেশনৰ কাৰ্যসূচী প্রতিখন জিলাত অনুষ্ঠিত কৰিব।’
আনহাতে, জুবিন গাৰ্গৰ মৃত্যুৰ এমাহ সম্পূর্ণ হোৱাৰ দিনটোত তথা এমহীয়া উপলক্ষে বাজপেয়ী ভবনত পুৱা শ্রদ্ধাঞ্জলি অনুষ্ঠান অনুষ্ঠিত হয়। ইয়াৰ পাছতে নাম-প্রসংগ আৰু ভাগৱত পাঠ কৰা হয়। অনুষ্ঠানত শান্তা উজিৰ, মৃণালকান্তি মেধি, নমিতা ভট্টাচার্য, মালবিকা বৰা, সন্ধ্যা মেনন তথা জুবিন গাৰ্গৰ সহযোগী বাদ্যযন্ত্রী ভদ্রকান্ত দাস, গুৱাহাটী লোকসভা সমষ্টিৰ সাংসদ বিজুলী কলিতা মেধি, বিধায়ক ক্রমে সিদ্ধার্থ ভট্টাচার্য, অতুল বৰা, গুৱাহাটীৰ পৌৰ নিগমৰ মেয়ৰ মৃগেন শৰণীয়াকে ধৰি বিজেপিৰ বহুকেইজন জ্যেষ্ঠ নেতাই অংশগ্ৰহণ কৰি প্ৰাণৰ শিল্পীগৰাকীলৈ শ্ৰদ্ধাঞ্জলি জ্ঞাপন কৰে।উল্লেখ্য যে জুবিন গাৰ্গৰ এমহীয়া শ্রদ্ধাঞ্জলি অনুষ্ঠান দলটোৰ ৩৯খন সাংগঠনিক জিলা, ৪৩৩ মণ্ডলৰ লগতে ৰাজ্যৰ বিভিন্ন স্থানত গাম্ভীর্যপূর্ণভাবে আয়োজন কৰা হয়। ৰাজ্যিক বিজেপিৰ সভাপতি দিলীপ শইকীয়াই বিশ্বনাথ জিলা বিজেপি কার্যালয়ত আয়োজিত শ্রদ্ধাঞ্জলি অনুষ্ঠানত অংশগ্রহণ কৰে। শইকীয়াই কয় যে জুবিন গাৰ্গৰ ন্যায় সন্দৰ্ভত আৰু স্মৃতি যুগমীয়া কৰিবলৈ ‘ময়ো জুবিন অনুৰাগী, আমিও জুবিন অনুৰাগী’ শীর্ষক কাৰ্যসূচী গ্ৰহণ কৰা হৈছে। ইয়াৰ লগতে #জাষ্ট্ৰিফৰজুবিন গাৰ্গ’ শীর্ষক ডিজিটেল কার্যসূচীতো অংশগ্রহণ কৰি জুবিন অনুৰাগীয়ে চলোৱা ন্যায় যাত্রাত দলটো চামিল হৈছে।
# ৰাজ্যজুৰি অগপৰ শ্ৰদ্ধাঞ্জলি অনুষ্ঠান
ইফালে, অসম গণ পৰিষদৰ উদ্যোগতো দেওবাৰে ৰাজ্যজুৰি জুবিন গাৰ্গৰ শ্ৰদ্ধাঞ্জলি অনুষ্ঠান আয়োজন কৰা হয়। দলটোৰ আমবাৰীস্থিত মুখ্য কাৰ্যালয়ত বিয়লি বৰেণ্য শিল্পীগৰাকীৰ প্রতি শ্রদ্ধা নিবেদন কৰি এমহীয়া শ্রদ্ধাঞ্জলি অনুষ্ঠান আয়োজন কৰা হয়। অগপৰ সাধাৰণ সম্পাদক ৰমেন্দ্ৰ নাৰয়ণ কলিতাই জুবিন গাৰ্গৰ প্রতিচ্ছবিৰ সন্মুখত বন্তি প্রজ্বলন কৰাৰ পাছতে অনুষ্ঠানত উপস্থিত সকলোৱে প্ৰাণৰ শিল্পীগৰাকীক শ্রদ্ধাঞ্জলি জ্ঞাপন কৰে। দলৰ সাধাৰণ সম্পাদক মনোজ শইকীয়া, সুনীল ডেকা, প্রাক্তন সাংসদ তথা অগপৰ উপ-সভাপতি কুমাৰ দীপক দাস আদিয়ে অনুষ্ঠানত উপস্থিত থাকে। এই অনুষ্ঠানতে জুবিন গাৰ্গৰ বিদেহী আত্মাৰ সদগতিৰ বাবে নাগাৰা নাম পৰিৱেশন কৰা হয়। অসম গণ পৰিষদৰ মুখ্য কাৰ্যালয়ৰ লগতে সকলো জিলা সমিতি, বিধানসভা সমষ্টি সমিতি আৰু অন্যান্য সাংগঠনিক স্তৰসমূহতো আজি সন্ধিয়া শিল্পীগৰাকীৰ এমহীয়া শ্রদ্ধাঞ্জলিৰ বিশেষ কার্যসূচী গ্রহণ কৰা হয়।
ADVERTISEMENT
