Bihar :
বিগত কিছু বছৰৰ পৰা সমগ্র দেশত চৰকাৰী বিনামূলীয়া আঁচনিৰ জোৱাৰ উঠাক লৈ বহুতে সংশ্লিষ্ট চৰকাৰসমূহক সমালোচনা কৰি আহিছে। সমালোচকসকলৰ দৃষ্টিত বিভিন্ন দলৰ চৰকাৰে নিৰ্বাচনী ৰণজয়ৰ অংকৰেহে ধাৰ-ঋণ কৰি হ’লেও বিনামূলীয়া আঁচনিৰ জোৱাৰৰ সৃষ্টি কৰিছে। ইয়াৰ বলত নির্বাচনী বৈতৰণী পাৰ হৈ ক্ষমতাত অধিষ্ঠিত হোৱা চৰকাৰে পৰৱৰ্তী সময়ত ৰাজহুৱা সমস্যালৈ কৰ্ণপাত নকৰে বুলিও সততে অভিযোগ উত্থাপন হৈ আহিছে।
আনকি প্রতিবাদলৈও ভ্রূক্ষেপ নকৰে এনে চৰকাৰে। এনে কাৰণতে একাংশ ৰাজ্যত শিক্ষা তথা স্বাস্থ্যৰ লেখীয়া প্রাথমিক প্রয়োজনসমূহৰ অৱস্থাও শোচনীয় হ’বলৈ ধৰিছে। এনেদৰে ক্ষমতালৈ অহা চৰকাৰে জনতাৰ প্ৰতি কেনে দায়বদ্ধতা প্ৰদৰ্শন কৰে তাক লৈয়ো সন্দিহান হৈ আছে বিভিন্নজন। এনে চর্চা অব্যাহত থকাৰ সময়তে বিহাৰৰ সদ্যসমাপ্ত বিধানসভা নির্বাচনক লৈ এক সর্বত্রে চর্চিত অভিযোগ উত্থাপন কৰিছে নির্বাচনী ৰণনীতিবিদ প্রশান্ত কিশোৰ নৱগঠিত জন সুৰাজ পার্টিয়ে। সকলো দিশৰ পৰা দেশৰ ভিতৰতে দৰিদ্ৰ ৰাজ্যৰূপে চিহ্নিত বিহাৰলৈ বিগত সময়ত বিশ্ববেংকে উন্নয়নৰ বাবে দিয়া ১৪ হেজাৰ কোটি টকা ঋণৰ ধনো নীতিশ কুমাৰ চৰকাৰে সদ্যসমাপ্ত নির্বাচনত ব্যয় কৰা বুলি সৰৱ হৈ উঠিছে নৱগঠিত দলটো।
এই নির্বাচনত প্ৰথমবাৰৰ বাবে প্রতিদ্বন্দ্বিতা কৰি ধৰাশায়ী হোৱা জন সুৰাজৰ ৰাষ্ট্ৰীয় সভাপতি তথা প্রাক্তন বিজেপি সাংসদ উদয় সিঙে এক সংবাদমেলত কয়, ‘উন্নয়নৰ বাবে অহা ধন আন শিতানলৈ নি বিনামূলীয়া আঁচনিত ব্যয় কৰিলে। আনকি বিশ্ববেংকে ঋণ হিচাপে দিয়া ১৪ হেজাৰ কোটি টকাও বিনামূলীয়া আঁচনিত বিতৰণ কৰিলে।’ জন সুৰাজ পার্টিয়ে লগতে অভিযোগ উত্থাপন কৰে যে চলিত বৰ্ষৰ জুনৰ পৰা সদ্যসমাপ্ত নিৰ্বাচনৰ দিন ঘোষণা হোৱালৈকে নীতিশ কুমাৰ চৰকাৰে ভোট ক্ৰয়ত ৪০ হেজাৰ কোটি টকা ৰাজহুৱা ধন ব্যৱহাৰ কৰে। যোৱা ছয় আৰু ১১ নৱেম্বৰত দুটা পৰ্যায়ত ভোটগ্রহণ সম্পন্ন হোৱা বিহাৰ বিধানসভা নিৰ্বাচনৰ প্ৰাক্ষণত মুখ্যমন্ত্রী মহিলা ৰোজগাৰ যোজনাৰ অধীনত মহিলাসকলৰ বেংক একাউন্টলৈ ১০ হেজাৰকৈ টকা হস্তান্তৰক লৈয়ো প্রশ্ন উত্থাপন কৰি জন সুৰাজ পাৰ্টিৰ নেতাজনে লগতে কয়, ‘নির্বাচনী আচৰণবিধি বলবৎ থকা সত্ত্বেও ভোটগ্রহণৰ আগদিনালৈকে মানুহে চৰকাৰৰ পৰা নগদ ধন লাভ কৰি থকাৰ ঘটনা এইবাৰেই প্রথম হ’ব।
দুবেলা দুসাঁজ কোনোমতে খাই জীৱন প্রৱৰ্তাই থকা মহিলাসকলৰ মন জয়ৰ বাবে ইয়েই যথেষ্ট।’ নৱগঠিত হ’লেও বা নিৰ্বাচনত ধৰাশায়ী হ’লেও দলটোৰ এই অভিযোগে যথেষ্ট গুৰুত্ব লাভ কৰিছে। কাৰণ বিগত কিছু বছৰৰ পৰা বিভিন্ন ৰাজ্যত বিভিন্ন দলৰ চৰকাৰে বিনামূলীয়া আঁচনিৰ জোৱাৰ তুলিছে। ইয়াক লৈ বহুতে উদ্বেগ প্ৰকাশ কৰি আহিছে। কাৰণ দেশৰ বহু ৰাজ্যৰ লগতে কেন্দ্ৰীয় চৰকাৰৰো ঋণৰ বোজা বৃদ্ধি পাই অহাৰ তথ্যও চৰকাৰীভাৱেই প্রকাশ পাই আহিছে। তদুপৰি বিহাৰৰ নিজা আয়ৰ উৎস সীমিত। গতিকে ৰাজ্যখনৰ পৰা দেশৰ বিভিন্ন ৰাজ্যলৈ সাধাৰণ শ্রমিকৰ কাম কৰিবলৈ আজিও কর্মঠ মানুহৰ সোঁত বৈ আছে। জন সুৰাজ পার্টিৰ সভাপতি সিঙে লগতে দাবী কৰে যে ভোট ক্রয়ত ৰাজহুৱা পুঁজিৰ ধন পানীৰ দৰে খৰচ নকৰা হ’লে এনডিএ নিশ্চিতভাৱে এই নির্বাচনত পৰাস্ত হ’লহেঁতেন।
জন সুৰাজ পার্টিয়ে বৃদ্ধ পেন্সন দুহেজাৰ টকাকৈ প্ৰদান কৰাৰ প্রতিশ্রুতি দিয়াৰ পাছতহে নীতিশ চৰকাৰে বৃদ্ধ পোপনৰ পৰিমাণ মাহিলি সাতশ টকাৰ পৰা ১১০০ টকালৈ বৃদ্ধি কৰে বুলিও সিঙে মন্তব্য কৰে। একেদৰে তেওঁৰ দলীয় সতীর্থ পৱান বার্মায়ো অনুৰূপ অভিযোগ উত্থাপন কৰে। অৱশ্যে নীতিশ কুমাৰ চৰকাৰে ১৪ হেজাৰ কোটি নহয়, বিশ্ববেংকৰ পৰা ঋণৰূপে পোৱা ২১ হেজাৰ কোটি টকা বিনামূলীয়া আঁচনিলৈ হস্তান্তৰ কৰে বুলি বার্মাই অভিযোগ উত্থাপন কাৰে। তেওঁ কয়, ‘বর্তমানে বিহাৰৰ ৰাজহুৱা ধাৰৰ পৰিমাণ চাৰি লাখ ছহেজাৰ কোটি টকা। ঋণৰ বাবদ প্রতিদিনে ৬৩ কোটি টকাকৈ সুত প্রদান কৰিবলগীয়া হৈছে। কোষাগাৰ খালী হ’ল। কিছু সংখ্যক প্ৰকল্পৰ বাবে বিশ্ববেংকৰ পৰা অহা ২১ হেজাৰ কোটি টকাৰ পৰাই মহিলাসকলক ১০ হেজাৰ টকাকৈ দিয়াৰ তথ্য আমি পাইছো।’
নির্বাচনী আচৰণ বিধি বলৱৎ হোৱাৰ মাথোঁ এঘণ্টাৰ আগত ১৪ হেজাৰ কোটি টকা উলিয়াই আনি ৰাজ্যখনৰ এক কোটি ২৫ লাখ মহিলাক চৰকাৰে বিলাই দিলে বুলিও জন সুৰাজ পাৰ্টিৰ নেতাজনে অভিযোগ উত্থাপন কৰে। তেওঁ কয়, ‘এয়া হৈছে আমাৰ তথ্য। চৰকাৰে কৰা এই কাৰ্য কিমানদূৰ নীতিসংগত? আইনগতভারে এইটো সম্ভর যে আপুনি একো কৰিব নোৱাৰে। চৰকাৰে পুঁজি আন শিতানলৈ সলনি কৰিব পাৰে আৰু পাছত নিজৰ সুবিধা হোৱাকৈ ব্যাখ্যা আগবঢ়াব পাৰে।’ লক্ষ্যণীয়ভারে জন সুৰাজ পার্টিয়ে উত্থাপন কৰা এই অভিযোগ সম্পৰ্কত বিহাৰ চৰকাৰ অথবা এনডিএৰ কোনো নেতাই তাৎক্ষণিক প্রতিক্রিয়া প্রকাশ কৰা নাই।
