উত্তৰ-পূবত প্রধানমন্ত্রী নৰেন্দ্ৰ মোদীৰ কাম-কাজৰ খতিয়ান (ৰিপ’ৰ্ট কার্ড) যথেষ্ট বেয়া বুলি কালি প্রধানমন্ত্রীৰ অসম ভ্ৰমণৰ দিনটোতে সৰৱ হৈ উঠে প্রদেশ কংগ্ৰেছৰ সভাপতি গৌৰৱ গগৈ। জল জীৱন মিছন ৰূপায়ণত সংঘটিত বিয়াগোম দুর্নীতিৰ বিৰুদ্ধে বিৰোধী দলটোৱে ‘নল আছে জল নাই’ ধ্বনি দি ৰাজ্যজুৰি প্ৰতিবাদ সাব্যস্ত কৰে।
মাজুলীত এই প্রতিবাদত অংশ লৈ প্রদেশ কংগ্ৰেছৰ সভাপতিজনে কয়, ‘অসম তথা উত্তৰ-পূবৰ ঔদ্যোগিক উন্নয়ন, নিবনুৱা সমস্যা সমাধান, কর্মসংস্থাপন সৃষ্টিকে ধৰি প্ৰায় প্ৰতিটো ক্ষেত্ৰত প্ৰধানমন্ত্ৰীৰূপে মোদীৰ ৰিপ’ৰ্ট কার্ড যথেষ্ট বেয়া। যোৱা ১০ বছৰত অসমত ইটোৰ পাছত সিটোকৈ ৰাজহুৱা উদ্যোগ বন্ধ হৈছে। বিজেপিয়ে জাগীৰোডৰ অৰ্ধপৰিবাহক (ছেমিকণ্ডাক্টৰ) উদ্যোগক লৈ ঢোল কোবালেও সেইটো কাগজ কল বন্ধ কৰিহে স্থাপন কৰি আছে। কাগজ কলটো চলাই ৰাখি আন স্থানত সেইটো কৰিলেহে প্রকৃতার্থত ঔদ্যোগিক উন্নয়ন হোৱা বুলি ক’ব পৰা হ’লহেঁতেন।’
নামৰূপ সাৰ কাৰখানাৰ দ্বিতীয় গোট ২০২০ত বন্ধ হ’ল বুলি উল্লেখ কৰি গগৈয়ে লগতে কয়, ‘সাৰ কাৰখানাটোৰ চতুৰ্থ গোটটো বহু আগতেই হ’ব লাগিছিল। ২০১৪ মানতে কেন্দ্ৰীয় চৰকাৰে চতুর্থ গোটক লৈ অসমবাসীক সপোন দেখুৱাইছিল। সেইটো এতিয়াহে আৰম্ভ কৰিবলৈ ওলাইছে। ইখনৰ পাছত সিখনকৈ অসম চাহ নিগমৰ চাহ বাগিচাসমূহ বিক্রী হৈ গ’ল। আঠ হেজাৰ চৰকাৰী স্কুল বন্ধ হ’ল।’ গগৈয়ে লগতে মুখ্যমন্ত্রী ড° হিমন্ত বিশ্ব শর্মালৈও বাক্যবাণ নিক্ষেপ কৰে। তেওঁ কয়, ‘অসমত এতিয়া মুখ্যমন্ত্রী ড° শৰ্মাৰ ঘনিষ্ঠ কেইজনমান মুষ্টিমেয় লোকৰহে জয়জয় ময়ময় অৱস্থা। দিছপুৰৰ পৰা দিল্লীলৈ এইখন বিজেপি চৰকাৰৰ নীতি হ’ল থলুৱা উদ্যোগ বন্ধ কৰা আৰু এটা বিশেষ কোম্পানীক গোটেই কামবোৰ গতাই দি একচেটিয়া ব্যৱস্থা গঢ়ি তোলা।’
বিমান সেৱা খণ্ড, বিমানকোঠ টার্মিনেল ব্যৱস্থাপনাত যিদৰে বিজেপি চৰকাৰে একচেটিয়া ব্যৱস্থাৰ সৃষ্টি কৰিছে, তেনেদৰে ৰাজ্য চৰকাৰেও বস্ত্ৰ উদ্যোগ, সংবাদ মাধ্যম আদিৰ দৰে বিভিন্ন ক্ষেত্রত একচেটিয়া ব্যবস্থা গঢ়ি তুলিছে বুলিও গগৈয়ে অভিযোগ উত্থাপন কৰে। ফলত আর্থিকভাৱে অসমৰ লগতে দেশ বাস্তৱ ক্ষেত্ৰত যিদৰে আগবাঢ়ি যাব লাগিছিল তেনেদৰে আগবঢ়া নাই বুলি উল্লেখ কৰি তেওঁ লগতে কয়, ‘আমি বঞ্চিত হৈ আছো।’
শিল্পী জুবিন গাৰ্গৰ ৰহস্যজনক মৃত্যুৰ তদন্তৰ প্ৰসংগ উত্থাপন কৰিও গগৈয়ে মুখ্যমন্ত্ৰীক পুনৰ তীব্ৰ ভাষাৰে সমালোচনা কৰে। মুখ্যমন্ত্ৰীৰ ৰাজনীতি কেনেকুৱা সেয়া ভালদৰে চিনি পায় বুলি উল্লেখ কৰি তেওঁ লগতে কয়, ‘আজি জুবিনদাৰ অনুপস্থিতিত অসমৰ ৰাইজে জুবিনদাই কৈ যোৱা বৰ অসমৰ কথা মনত পেলাইছে। ‘কা’ আইনৰ বিৰুদ্ধে কৈ যোৱা কথাবোৰ মনত পেলাইছে। জুবিনদাই বিজেপি দল সম্পর্কত কৈ যোৱা কথাবোৰ মনত পেলাইছে। জুবিনদাই কৈ যোৱা এনে কথাবোৰ চৰ্চাত বাধা দিবলৈকে মুখ্যমন্ত্রী ড° শর্মাই জুবিনদাৰ চৰিত্ৰ হনন কৰি বাকী কথাবোৰ তলত পৰি ৰোৱাকৈ ৰণকৌশল যুগুত কৰিছে।’
জুবিন গাৰ্গৰ চৰিত্ৰ হনন কৰিবলৈ মুখ্যমন্ত্ৰীয়ে যিকোনো পর্যায়লৈ যাব পাৰে বুলি দোহাৰি গগৈয়ে আৰু কয় যে জুবিনৰ অনুৰাগীসকলক গ্ৰেপ্তাৰ কৰাৰ লগতে জুবিনদাৰ পৰিয়ালৰ লোকসকলকো ৰাজনৈতিকভাৱে হেঁচা দিবলৈকো মুখ্যমন্ত্রী ড° শৰ্মাই কুণ্ঠাবোধ নকৰে। জুবিনৰ ন্যায় বিচৰা বাবেই অজয় ফুকন, ভিক্টৰ দাসক কাৰাগাৰলৈ নিক্ষেপ কৰিলে বুলিও প্রদেশ কংগ্ৰেছৰ সভাপতিজনে অভিযোগ উত্থাপন কৰে। প্ৰশ্ন কৰা বাবেই সাংবাদিককো কাৰাগাৰলৈ পঠিয়াইছে, কেমেৰাৰ সম্মুখতে ‘চাকৰি খাই দিম’ বুলি সাংবাদিকক ভাবুকি দিছে বুলিও মন্তব্য কৰি তেওঁ লগতে ছিংগাপুৰৰ আছাম এছ’চিয়েছনত থকা মুখ্যমন্ত্রী ড° শৰ্মাৰ নিৰ্দিষ্ট ঘনিষ্ঠ লোকসকলক কিয় তদন্তৰ আওতালৈ অনা হোৱা নাই বুলিও প্রশ্ন উত্থাপন কৰে। জুবিন গাৰ্গৰ ৰহস্যজনক মৃত্যুৰ অন্যতম অভিযুক্ত শ্যামকানু মহন্ত নেতৃত্বাধীন সংস্থাক বিদেশত অনুষ্ঠান পাতিবলৈ চৰকাৰে কিয় ধন দিছে বুলি প্রশ্ন কৰিলে সাংস্কৃতিক মন্ত্রণালয়, বিদেশ মন্ত্রণালয়কে ধৰি সকলো মন্ত্রণালয় নিমাত হৈ পৰে বুলিও তেওঁ কয়।
মোদীৰ বৈদেশিক নীতিৰ ভুলৰ বাবেই বাংলাদেশত ভাৰত বিৰোধী শক্তিয়ে মূৰ দাঙি উঠিছে!
বাংলাদেশৰ শেহতীয়া ৰাজনৈতিক পৰিৱেশক লৈও আজি প্রতিক্রিয়া প্রকাশ কৰে লোকসভাৰ বিৰোধী দলৰ উপ-দলপতিয়ে। বাংলাদেশত এজন হিন্দু যুৱকক মৰিয়াই মাৰি জ্বলাই দি হত্যা কৰা ঘটনাক তীব্র ভাষাৰে গৰিহণা দিয়ে গগৈয়ে। মোদী চৰকাৰৰ বৈদেশিক নীতিৰ ভুলৰ বাবে এসময়ৰ বন্ধু ৰাষ্ট্ৰখনত পুনৰ ভাৰত বিৰোধী শক্তিয়ে মূৰ দাঙি উঠিবলৈ পালে বুলিও অভিযোগ কৰে প্রদেশ কংগ্ৰেছৰ সভাপতিজনে। ‘আজি বৈদেশিক নীতিৰ জৰিয়তে আমি সমগ্র বিশ্বৰ বাবে গণতন্ত্ৰৰ প্ৰতি, মানৱাধিকাৰৰ প্ৰতি এক আদর্শ সৃষ্টি কৰিব পাৰিব লাগিছিল; কিন্তু আমি তেনে একো পৰিৱেশ দেখাই নাই। ভূটান হওক, ম্যানমাৰ হওক, নেপাল হওক, মালদ্বীপ হওক বা শ্রীলংকাই হওক চুবুৰীয়া সকলো ৰাষ্ট্ৰই আমাৰ ওচৰৰ পৰা আঁতৰি গৈছে। এই দেশবোৰৰ ওপৰত আগতে ভাৰতৰ প্ৰভাৱ আছিল। আজি এই দেশবোৰৰ ওপৰত ভাৰতৰ একো প্ৰভাৱেই নাই।’ গগৈয়ে কয়।
ইপিনে, আগন্তুক বিধানসভা নির্বাচন সন্দৰ্ভত গগৈয়ে কয় যে ৰাইজক মজা দিয়াসকলক এইবাৰ ৰাইজে মজা দিব। সেইবাবে কংগ্ৰেছ দল ৰাইজৰ সুখ-দুখৰ উমান ল’বলৈ ‘ৰাইজৰ পদূলিত ৰাইজৰ কংগ্ৰেছ’ কাৰ্যসূচীৰ জৰিয়তে ৰাইজৰ মাজলৈ আহিছে বুলিও কয় গগৈয়ে। লগতে তেওঁ কয়, ‘অসমৰ নতুন প্ৰজন্মই বিচৰাৰ দৰে উচ্চ শিক্ষা, গাঁৱৰ মহিলাসকলে বিচৰাৰ দৰে ভাল আদর্শ পৰিৱেশ,
গাঁওবোৰত মদৰ দোকান নাথাকিব, ড্ৰাগছৰ বেহা নাথাকিব। খেলুৱৈসকলে বিচৰাৰ দৰে খেলপথাৰ থাকিব। ৰাইজে বিচৰা এনেকুৱা এখন আদর্শ অসম গঢ়িবলৈ আমি কাম কৰিবলৈ প্ৰতিজ্ঞাৱদ্ধ হৈছো।’ মাজুলীৰ খহনীয়াৰ বিষয়ে সাংবাদিকে সোধা প্রশ্নৰ উত্তৰত গগৈয়ে কয় যে এই বিষয়টোত প্রধানমন্ত্রীয়ে চকু দিয়া উচিত। তেওঁ কয়, ‘মনোমহন সিঙৰ যেতিয়া চৰকাৰ আছিল, তেতিয়া বিভিন্ন আন্তঃগাঁথনিৰ ক্ষেত্ৰত অসমক যথেষ্ট সহায় কৰিলে। বগীবিল দলং নিৰ্মাণৰ দৰে এটা বৃহৎ প্রকল্পক ৰাষ্ট্ৰীয় প্ৰকল্পৰ মৰ্যাদা প্রদান কৰি নিৰ্মাণ সম্পূর্ণ কৰিবলৈ আর্থিক সহায় কৰিলে। শিলচৰ-লামডিং ৰেলপথ সম্প্ৰসাৰণকো ৰাষ্ট্ৰীয় প্ৰকল্পৰ মৰ্যাদা প্রদান কৰিলে। আজিৰ তাৰিখত নতুনকৈ কেন্দ্ৰ চৰকাৰে কি কৰিছে? বানপানী-খহনীয়াৰ বাবে পাবলগীয়া ধনবোৰো সময়মতে মোকলাই নিদিয়া হৈছে।’ বর্তমানৰ কেন্দ্ৰ চৰকাৰে অসমৰ বান-খহনীয়া সমস্যা ৰোধৰ বাবে কিমান টকা মোকলাই দিছে আৰু বাকী ৰাজ্যবোৰক কিমান ধন মোকলাই দিছে সেই লৈ এখন শ্বেতপত্র প্রকাশ কৰিবলৈকো দাবী জনায় প্রদেশ কংগ্ৰেছৰ সভাপতিজনে। ইফালে, জল জীৱন আঁচনিত হোৱা দুর্নীতিৰ বিৰুদ্ধে আজিও ৰাজ্যজুৰি অসম প্ৰদেশ কংগ্ৰেছ কমিটীয়ে প্রতিবাদ অব্যাহত ৰাখিছে। প্রদেশ কংগ্ৰেছৰ সভাপতি গগৈৰ নেতৃত্বত মাজুলী ব্লক কংগ্রেছে ‘নল আছে জল নাই’ শ্ল’গানৰে মাজুলীত প্রতিবাদ সাব্যস্ত কৰে। আন আন জিলাতো অসম প্রদেশ কংগ্ৰেছ কমিটীৰ ব্লক কংগ্ৰেছ কমিটীসমূহে প্রতিবাদ অব্যাহত ৰাখিছে। জাগীৰোডতো এই লৈ প্রতিবাদী কাৰ্যসূচী ৰূপায়ণ কৰে।