Raghav Chadha:
দৈনিক অগ্ৰদূত ডিজিটেল ডেক্স:দেশৰ সৰ্বসাধাৰণ নাগৰিকৰ কেতবোৰ সমস্যা সংসদত উপস্থাপন কৰি সকলোৰে আকৰ্ষণৰ কেন্দ্ৰবিন্দু হৈ পৰা ৰাজ্যসভাৰ সাংসদ ৰাঘৱ চাড্ডাক হঠাতে আপৰ নেতৃত্বই উপ- দলপতি পদৰ পৰা অপসাৰণ কৰি পাঞ্জাৱৰ সাংসদ অশোক মিট্টালক দায়িত্ব দিয়া হয় ৷ দলটোৰ এনে সিদ্ধান্তক লৈ দেশজুৰি তীব্ৰ চৰ্চা লাভ কৰিছে ৷ এনে কি পৰিস্থিতি আহিল যে ৰাঘৱ চাড্ডা অপসাৰিত কৰিবলগীয়া হ’ল ৷ সচেতন মহলৰ মতে ৰাঘৱ চাড্ডাৰ অতুলনীয় জনপ্ৰিয়তাক লৈ ঈৰ্ষাপৰায়ণ হৈছে দলৰ শীৰ্ষ নেতৃত্ব ৷ আনহাতে
এই সিদ্ধান্তক লৈ নিজৰ মৌনতা ভংগ কৰি চাড্ডাই ভিডিঅ’ বাৰ্তাযোগে দলৰ নেতৃত্বক পোনপটীয়াকৈ প্ৰশ্ন কৰে। আৱেগিক আৰু তিক্ত সুৰত তেওঁ কয় যে যেতিয়াই সংসদত ভাষণ দিয়াৰ সুযোগ পায় তেতিয়াই তেওঁ সদায় মৌলিক ৰাজহুৱা বিষয় উত্থাপন কৰে যিবোৰ সদনত প্ৰায়ে আওকাণ কৰা হয়। সাধাৰণ মানুহৰ মাত উঠাটো অপৰাধ নেকি বুলি প্ৰশ্ন উত্থাপন কৰে চাধাই। তেওঁ আশ্চৰ্য্য প্ৰকাশ কৰি প্ৰশ্ন কৰে যে তেওঁৰ ভাষণে দেশৰ সাধাৰণ নাগৰিকক কিয় উপকৃত কৰিছে৷ কিন্তু সংসদ সচিবালয়ৰ দ্বাৰা আম আদমী পাৰ্টিৰ ক্ষতি কিয় হৈছে, সেয়ে তেওঁক ভাষণ দিবলৈ বাধা দিয়া হৈছে।
ছ’চিয়েল মিডিয়া প্লেটফৰ্ম এক্সত ৰাঘৱ চাড্ডা আন এক বিশদ ভিডিঅ’ শ্বেয়াৰ কৰে য’ত তেওঁ এতিয়ালৈকে সংসদত থকা কাৰ্যকালৰ ৰিপ’ৰ্ট কাৰ্ড দাখিল কৰে। এই ভিডিঅ’টোত কেইবাটাও ভাষণ আৰু বিষয় সংকলিত কৰা হৈছে য’ত তেওঁ চৰকাৰৰ দৃষ্টি আকৰ্ষণ কৰিছিল যেনে বৰ্ধিত কৰ বোজা, মোবাইল ডাটাৰ মূল্য, পিতৃত্বৰ ছুটীৰ প্ৰয়োজনীয়তা, বেংকে আৰোপ কৰা অত্যধিক চাৰ্জ, খাদ্যৰ মিশ্ৰণ, আৰু অহা কলৰ সংযোগ বিচ্ছিন্ন হোৱা আদি বিষয়বোৰলৈ। তদুপৰি ২৮ দিনৰ ৰিচাৰ্জৰ বৈধতা, বিমানবন্দৰৰ যাত্ৰীৰ অসুবিধা, কাগজ লিক, বায়ু প্ৰদূষণ, স্বাস্থ্য বীমা, কৃষকৰ সংকটৰ দৰে বিষয়সমূহো তেওঁ কঠোৰভাৱে আলোচনা কৰে।
বিভিন্ন ৰাজনৈতিক মহলত ৰাঘৱ চাড্ডাৰ স্থিতিৰ ব্যাখ্যা কৰা হৈছে। বিশেষজ্ঞসকলৰ মতে নিজৰ দলৰ বিৰুদ্ধে এনে ৰাজহুৱা প্ৰশ্ন উত্থাপন কৰাটোৱে চাড্ডাৰ গভীৰ ক্ষোভৰ প্ৰতিফলন ঘটায়। আম আদমী পাৰ্টিৰ পৰা আনুষ্ঠানিকভাৱে কোনো স্পষ্টীকৰণ পোৱা নাই যদিও ভৱিষ্যতৰ কোনো পৰিকল্পনাৰ ইংগিতো ৰাঘৱে দিয়া নাই যদিও দলৰ নেতৃত্বক যি ধৰণে সমালোচনা কৰিছে৷ সেইটোৱে স্পষ্টভাৱে ইংগিত দিয়ে যে আপৰ ভিতৰৰ আভ্যন্তৰীণ পৰিস্থিতি স্বাভাৱিক নহয়। বিশ্লেষকসকলে কয় যে উপ-নেতা পদৰ পৰা অপসাৰণ আৰু তাৰ পিছত সাংসদগৰাকীৰ ইমান চোকা প্ৰতিক্ৰিয়া দিল্লীৰ ৰাজনীতিত কিছু বৃহৎ পৰিৱৰ্তনৰ ইংগিত বহন কৰিছে ৷
আনহাতে দিল্লী বিধানভাৰ বিৰোধী দলপতি তথা প্ৰাক্তন মুখ্যমন্ত্ৰী আতিশী মাৰ্লেনাও ৰাঘৱ চাড্ডাৰ বিৰুদ্ধে সৰৱ হৈ পৰে ৷ ছ’চিয়েল মেডিয়াৰ এক ভিডিঅ’ত চাড্ডাক উদ্দেশ্য কৰি কয়,দিল্লী সুৰা নীতি গোচৰত দলৰ মুৰব্বী অৰবিন্দ কেজৰিয়াল দোষমুক্ত হোৱাৰ পিছত দলে উলিওৱা শোভাযাত্ৰাত নাছিল চাড্ডা। তেতিয়া তেওঁ আছিল গৈ লণ্ডনত ৷ মধ্য প্ৰাচ্য যুদ্ধ কেন্দ্ৰীক বিষয়ক লৈ যেতিয়া বিৰোধী দল সমূহ প্ৰধানমন্ত্ৰীৰ বিৰুদ্ধে সৰৱ আছিল সেই সময়ত চাড্ডা কাৰ্যত: মৌন হৈ আছিল ৷ এনেবোৰ কাৰ্য কি সুচায় ৷ দলৰ দৃষ্টিভংগী আৰু নীতিৰ পৰা ফালৰি কাটি ব্যক্তিগত সুনাম অৰ্জন কৰি বা:বা:লোৱাৰ যি অভিপ্ৰায় ৷ সেয়াই তেওঁৰ আচল ৰূপটো উদঙাই দিয়ে বুলি তিৰ্যক মন্তব্য দিয়ে আতিশীয়ে ৷
একেদৰে আপৰ মিডিয়া বিভাগৰ মুৰব্বী অনুৰাগ ধাণ্ডাই স্পষ্টীকৰণ দি কয় যে প্রধানমন্ত্রী নৰেন্দ্ৰ মোদীৰ বিৰুদ্ধে মুখ খুলিবলৈ ৰাঘরে ভয় কৰিছিল আৰু সেয়েহে তেওঁক উপ-দলপতি পদৰ পৰা অব্যাহতি দিয়া হ’ল।
নানাকাৰণত বিগত সময়ছোৱাত ৰাঘৱৰ স’তে দলৰ দূৰত্ব বৃদ্ধি পাইছিল আৰু অৱশেষত আপে বৃহস্পতিবাৰে ৰাঘৱক দলৰ উপ-দলপতি পদৰ পৰা আঁতৰ কৰিছিল। কালি আপে উপ-দলপতি পদৰ পৰা বাঘৱক অব্যাহতি দিয়াৰ কথা ঘোষণা কৰিছিল যদিও কোনো কাৰণ প্ৰদৰ্শন কৰা নাছিল। শুকু্ৰবাৰে আপে কাৰণ প্ৰদৰ্শন কৰি কয় যে প্রধানমন্ত্রী মোদীৰ বিৰুদ্ধে ৰাঘৱ সৰৱ নোহোৱাত তেওঁক পদৰ পৰা অব্যাহতি দিয়া হ’ল।
