HistoryNews :দৈনিক অগ্ৰদূত ডিজিটেল ডেস্ক : আজিৰ পৰা হেজাৰ বছৰৰ পূৰ্বে কৃত্রিম গৰ্ভনিৰোধকৰ আৱিষ্কাৰ হোৱা নাছিল। অৱশ্যে গৰ্ভনিৰোধকৰ প্রয়োজনীয়তা তেতিয়াৰ সমাজতো আছিল। সেই সময়ত অন্যান্য যিকোনো শাৰীৰিক সমস্যা দূৰ কৰাৰ দৰেই এই কামতো মানুহে নির্দিষ্ট কেতবোৰ ভেষজৰ শৰণাপন্ন হৈছিল।
প্রায় দুহেজাৰ বছৰৰ পূৰ্বে প্রাচীন গ্রীক আৰু ৰোমান সভ্যতাত এই কামত ব্যৱহাৰ কৰা হৈছিল ছিলফিয়াম বা ছিলফায়ন নামৰ এবিধ গছ। যাক যাদুকৰী গছ বুলিও সেই সময়ত অভিহিত কৰা হৈছিল।
বৰ্তমানৰ লিবিয়াৰ ছাইৰেনাইকা অঞ্চলত এইবিধ গছ পোৱা গৈছিল বুলি ঐতিহাসিক নথিত উল্লেখ আছে। গছজোপাৰ কাণ্ড, মূল আৰু শিপা ৰান্ধি খোৱা হৈছিল। মাছ বা মাংসৰ লগত এই গছৰ অংশৰে ছ্যুপ তৈয়াৰ কৰিও খোৱা হৈছিল। সবাতোকৈ মূল্যবান আছিল গছজোপাৰ কাণ্ডৰ পৰা নির্গত হোৱা ৰস বা আঠা।
সেই আঠা শুকুৱাই মছলাৰ দৰে ৰন্ধনত ব্যৱহাৰ কৰা হৈছিল।তৎকালীন সময়ত ছিলফিয়াম ইমানেই গুৰুত্বপূৰ্ণ হৈ পৰিছিল যে ইয়াৰ ৰস বা আঠাৰ দাম প্রায় ৰূপৰ দামৰ সমান বুলি প্রাচীন লেখাত দাবী কৰা হৈছে।
অৱশ্যে এই ব্যৱহাৰ কিমান কাৰ্যকৰী বা নিৰাপদ আছিল, সেয়া আধুনিক চিকিৎসা বিজ্ঞানৰ মানদণ্ডত প্রমাণিত নহয়। গছজোপাৰ আশ্চৰ্যকৰ গুণাৱলীৰ বাবে অনেকে ইয়াক অলৌকিক গছ বুলিও অভিহিত কৰিছিল।
অৱশ্যে বজাৰত ছিলফিয়ামৰ চাহিদা অস্বাভাবিকভাবে বৃদ্ধি পোৱাত খ্রীষ্টাব্দৰ প্ৰথম শতিকাৰ ভিতৰতে বিলুপ্ত হৈ পৰে বুলি গৱেষকসকলে ধাৰণা কৰে। কালৰ নিয়মত লোকচৰ্চাৰ আঁৰলৈ গুচি গৈছিল এইবিধ গছ।
অৱশ্যে শেহতীয়াকৈ এই গছজোপাৰ কথা আকৌ এবাৰ খবৰৰ শিৰোনামলৈ উঠি আহিছে।সেই হেৰাই যোৱা ছিলফিয়াম গছৰ পুনৰ সন্ধান পোৱা গৈছে নেকি বুলিও চর্চা হৈছে।
ইষ্টানবুল বিশ্ববিদ্যালয়ৰ অধ্যাপক মাহমুত মিছকিয়ে তুর্কীৰ মধ্য আনাটোলিয়া অঞ্চলত হাছান পৰ্বতৰ সমীপত এবিধ বিৰল উদ্ভিদক লৈ দীর্ঘদিনৰ পৰা গৱেষণা চলাই আছিল। এই উদ্ভিদৰ বৈজ্ঞানিক নাম ‘ফেৰুলা ডুডেয়ানা’।
গৱেষণাৰ এটা পৰ্যায়ত তেওঁ অনুভৱ কৰে যে ইয়াৰ হালধীয়া ফুল, কাণ্ডৰ গঠন আৰু শিপাৰ পৰা পোৱা সুগন্ধি আদি একাধিক বৈশিষ্ট্য প্রাচীন ছিলফিয়ামৰ বৰ্ণনাৰ স’তে মিলি যায়।
গৱেষক মিছকিৰ মতে, প্রাচীন গ্রীক জনগোষ্ঠীয়েই হয়তো কোনো এক সময়ত লিবিয়াৰ পৰা এই উদ্ভিদ তুর্কীলৈ লৈ আনিছিল।ফলত এই সময়ত তুর্কীত সেই গছ জীয়াই থকাৰ সম্ভাৱনাও সম্পূৰ্ণৰূপে ওলাই কৰিব নোৱাৰি।
অৱশ্যে ফেৰুলা ডুডেয়ানাই যে প্ৰাচীনকালৰ ছিলফিয়াম, সেয়া এতিয়াই নিশ্চিতভাৱে ক’ব পৰা হোৱা নাই। ছিলফিয়ামৰ কোনো নমুনা সংৰক্ষিত নাই, ভৰসা কেৱল সংৰক্ষিত নথিসমূহ। সঁচাকৈয়ে যদি এই উদ্ভিদেই প্রাচীন ছিলফিয়াম, তেন্তে আধুনিক চিকিৎসা বিজ্ঞানত এইবিধ গছে এক গুৰুত্বপূৰ্ণ ভূমিকা পালন কৰিব।
হয়তো একেবাৰে ভিন্ন ধৰণৰ এবিধ আয়ুর্বেদিক গৰ্ভনিৰোধক প্ৰস্তুত কৰাতো সম্ভৱ হ’ব, যি মানুহৰ শাৰীৰিক ক্ষতি নকৰাকৈ কার্যসিদ্ধি কৰিব।
