দৈনিক অগ্ৰদূত ডিজিটেল ডেস্ক : দেশ স্বাধীন হোৱাৰ সুদীর্ঘ ৭৯ বছৰৰ পাছতো যাতায়াত ব্যৱস্থাৰ কোনো উন্নয়ন নহ’ল নগাঁও জিলাৰ ধিং সমষ্টিৰ কেতবোৰ অঞ্চলৰ। সমষ্টিটোত এনে কিছু অঞ্চল আছে য’ত পকী দলঙতো দূৰৈৰ কথা এখন কাঠৰ দলঙৰ বাবেও ৰাইজে চৰকাৰক কাকুতি-মিনতি কৰি থাকিবলগীয়া হৈছে। এখন দলঙেই তচনচ্ কৰিছে ধিঙৰ বিভিন্ন চৰৰ ছাত্ৰ-ছাত্ৰীৰ সপোন। নগাঁও জিলাৰ ধিং চহৰৰ পৰা প্রায় পাঁচ কিলোমিটাৰ উত্তৰ-পূবে অৱস্থিত এখন ঠাই দুই নম্বৰ কান্ধুলিমাৰী। ইয়াৰ পৰাই একাধিক সুঁতিৰ ওপৰৰ বাঁহৰ সাঁকো পাৰ হৈ জিলাখনৰ কমলসুঁতি, কাতিমাৰী, কালাটাপো, ৰাণীটাপো পশ্চিম, পশ্চিম মাইছবালি, দুই নম্বৰ কান্ধুলিমাৰী চৰ, কুট্টামাৰী, তিনতিকীয়া, ৰাণী টাপো, পূব বিদ্ৰে, মুছলিম টাপো প্রমুখ্যে বিভিন্ন চৰৰ ছাত্র-ছাত্রীয়ে ধিঙৰ বিভিন্ন হাইস্কুল, উচ্চতৰ মাধ্যমিক বিদ্যালয়, মহাবিদ্যালয়ত অধ্যয়ন কৰিবলৈ আহে।
ঠিক একেদৰে, ধিঙৰ পৰাও চৰৰ বিভিন্ন প্রাথমিক বিদ্যালয়ত শিক্ষকতা কৰিবলৈ নিতৌ বহু শিক্ষকে এই সুঁতিৰ ওপৰৰ বাঁহৰ সাঁকো পাৰ হৈ যাৱ লাগে। কমলসুঁতি চৰলৈ যোৱা পথৰ দুটাকৈ সুঁতিৰ ওপৰত স্থানীয় ৰাইজে গাঁঠিৰ ধন খৰচ কৰি বাঁহেৰে নিৰ্মাণ কৰি লৈছে দুখনকৈ বাঁহৰ সাঁকো। এখন সাঁকো আছে দুই নম্বৰ কান্ধুলিমাৰীত আৰু আনখন নতুন কমলসুঁতিত।
এই বাঁহৰ সাঁকোৰেই এতিয়া ছাত্র-ছাত্রী, শিক্ষক-শিক্ষয়িত্রী আহ-যাহ কৰি থাকিবলগীয়া হৈছে। তদুপৰি এই দুৰ্বল বাঁহৰ সাঁকোৰ ওপৰেদি নিতৌ চৰৰ কৃষকে কুইন্টলে কুইন্টলে পাচলি ধিং, মৈৰাবাৰী, ডুমডুমীয়া আদি বজাবলৈ সৰবৰাহ কৰি থকা পৰিলক্ষিত হৈছে। দুই নম্বৰ কান্ধুলিমাৰীত থকা বাঁহৰ সাঁকোখন স্থানীয় ৰাইজে টকা পইছা তুলি বাঁহ কিনি নিৰ্মাণ কৰি লৈছে। ইয়াৰ ওপৰেৰে আহ-যাহ কৰোতে কোনো ধৰণৰ ধন আদায় দিব নালাগে।
কিন্তু নতুন কমলসুঁতিত থকা বাঁহৰ সাঁকোখন দুজনমান লোকে ব্যৱসায়িক ভিত্তিত নিৰ্মাণ কৰি তাৰ ওপৰেৰে আহ-যাহ কৰা প্ৰতিজন লোকৰ পৰাই ধন সংগ্ৰহ কৰি আহিছে। খৰালি কালত দুই নম্বৰ কান্ধুলিমাৰীৰ সুঁতিটো শুকাই যোৱাত এই শিক্ষকসকলৰ লগতে ছাত্ৰ-ছাত্ৰী, ৰাইজে বাঁহৰ সাঁকোখনৰ তলেদিয়েই আহ-যাহ কৰে।
চৰৰ ছাত্ৰ-ছাত্ৰীৰ লগতে চৰত শিক্ষকতা কৰা শিক্ষকসকল, কৃষকসকলৰ যাতায়াতী সুবিধাৰ বাবেই দুই নম্বৰ কান্ধুলিমাৰীৰ সুঁতিৰ ওপৰত থকা বাঁহৰ সাঁকোখনৰ ঠাইত আৰু নতুন কমলসুঁতিত থকা বাঁহৰ সাঁকোখনৰ ঠাইত একোখনকৈ কাঠৰ দলং নিৰ্মাণ কৰি দিবলৈ ৰাইজে সংশ্লিষ্ট বিভাগক দাবী জনাইছে।
দুই নম্বৰ কান্ধুলিমাৰী, কমলসুঁতি আৰু ইয়াৰ আশে-পাশে থকা অঞ্চলৰ ৰাইজে অতি আক্ষেপেৰে কয়, ‘আমাৰ ইয়াৰ ল’ৰা ন্যায়াধীশ হৈছে, বিডিঅ’ হৈছে, ডাক্তৰ হৈছে কিন্তু আমি এখন বাঁহৰ সাঁকোৰেই এতিয়াও আহ-যাহ কৰি থাকিবলগীয়া হৈছো। আমাক একো নালাগে, এখন দলং লাগে।’ উল্লেখ্য যে কালি ধিং সমষ্টিৰ বিধায়ক মেহবুব মোক্তাৰে লহকৰ জিলা পৰিষদ সমষ্টিৰ সদস্য বাবুল আলীক লগত লৈ দুই নম্বৰ কান্ধুলিমাৰী আৰু নতুন কমলসুঁতিত থকা বাঁহৰ সাঁকো দুখন পৰিদৰ্শন কৰে।
লগতে স্থানীয় ৰাইজৰ স’তে বাৰ্তালাপ কৰে। বিধায়ক মোক্তাৰে ৰাইজক কয় যে যাতায়াতৰ ক্ষেত্ৰত ৰাইজে ভোগ কৰি অহা দুর্ভোগৰ অন্ত পেলোৱাৰ বাবে অচিৰেই কাৰ্য ব্যৱস্থা গ্রহণ কৰা হ’ব।
