Nepal :দৈনিক অগ্ৰদূত ডিজিটেল ডেস্ক : মাথোঁ এক ছেকেণ্ড! চকুৰ এটা পলকতকৈও কম সময়তে কে’বা মিটাৰ উচ্চতাৰ পানীয়ে অগ্ৰসৰ হৈ সামৰি লৈছিল সম্মুখৰ অনেক দূৰত্বৰ ঠাই।ফলত কি হৈছে টলকিব পৰাৰ পূৰ্বেই পানীৰ প্রবল সোঁতত উটি যায়। যোৱা ২৬ আগষ্টত এনেদৰে নেপালত ভোটেকোশী নৈৰ আকস্মিক বানে তাণ্ডৱ চলায়।
ফলত মুহূৰ্তৰ ভিতৰতে দেশখনৰ উত্তৰাঞ্চল ধ্বংসস্তূপত পৰিণত হোৱাৰ লগতে ছয় শতাধিক লোকৰ প্ৰাণহানি ঘটে। তদুপৰি এই সংহাৰী বানত আন কে’বা সহস্র লোক সন্ধানহীন হৈ আছে। এই বান ৫,১২৭ মিটাৰ উচ্চতাৰ এটা হিমবাহৰ একাংশ ভাঙি পৰাত সৃষ্টি হয় বুলি উল্লেখ কৰি চীনৰ এজন ভূতত্ত্ববিদে এই আকস্মিক বানৰ ধ্বংসলীলা ইমান কিয় বৃহৎ হ’ল তাৰ কাৰণো ব্যাখ্যা কৰিছে।
গুয়ো জাওচেং নামৰ চীন চৰকাৰৰ এই ভূতত্ত্ববিদজনৰ মতে এই বানৰ পানীয়ে বিস্তৰ বোকা আৰু শিলো কঢ়িয়াই আনে। এই বোকা আৰু শিলে ধ্বংসৰ মাত্রা বৃদ্ধি কৰে। বহু ঠাই বোকাই পুতি বকৰণিলৈ পর্যবসিত কৰে। মাথোঁ কেইমিনিটমানৰ ভিতৰতে প্রায় ২০ কিলোমিটাৰ অঞ্চল আগুৰি এই বানে ধ্বংসলীলা সাধন কৰে। আনহাতে, কৃত্রিম উপগ্রহই তোলা ফটোত দেখা গৈছে হিমবাহটো ফাটি সৃষ্টি হোৱা পানী তিব্বতৰ একাধিক নৈত পৰে। এই নৈসমূহে নেপালত প্ৰৱেশ কৰা ভোটেকোশী নৈৰ সৃষ্টি কৰিছে। ইয়াৰে এখন নদী হ’ল লিন্ডেখোলা নৈ। এই নৈ নেপাল আৰু চীনৰ সীমান্তৰে বৈ গৈছে।
এই নৈৰ বাঢ়নী পানীয়ে তিব্বতৰ গিৰং বন্দৰ ধ্বংসস্তূপত পৰিণত কৰে। পানীৰ স’তে উটি অহা বোকাই বন্দৰটো পুতি পেলায়। তদুপৰি প্ৰৱল সোঁতৰ বানৰ পানীয়ে ঘৰ-দুৱাৰ, বাট-পথ, জলবিদ্যুৎ কেন্দ্ৰ আদি চূৰমাৰ কৰে। ভূতত্ত্ববিদসকলৰ মতে বোকা মিহলি বানৰ পানী ৪৫শ মিটাৰ তলৰে প্ৰৱাহিত হোৱাত ধ্বংসৰ মাত্রা অকল্পনীয় হয়। উল্লেখ্য যে যিটো হিমবাহ ফাটি এই বানৰ সৃষ্টি হয় সেই হিমবাহ নেপালৰ তিমুৰে চহৰৰ পৰা মাথোঁ ২৩ কিলোমিটাৰ নিলগত অৱস্থিত। এই চহৰৰ নিকটৱৰ্তী স্থানত ভোটেকোশী নৈ আৰু ত্রিশূলী নদীৰ মিলন ঘটিছে।
ইয়াৰ নিকটৱৰ্তী হাকুবেচিত বানৰ ধ্বংসলীলা সর্বাধিক হয়। এই অঞ্চলত গছ-বনো বানৰ পানীয়ে উভালি পেলায়। ফলত অঞ্চলটোৰ চৌদিশে ধ্বংসস্তূপে পাহাৰ সদৃশ অৱস্থাৰ সৃষ্টি কৰে। লক্ষ্যণীয়ভাবে শিল আৰু বোকা কঢ়িয়াই অনাৰ পাছতো বানৰ পানীৰ সোঁত হ্রাস পোৱা নাছিল। বৰঞ্চ তীব্র বেগেৰে পানী প্ৰৱাহিত হৈছিল। এই তীব্রবেগী পানীয়ে ত্রিশূলী বজাৰ মুহূৰ্তৰ ভিতৰতে ধ্বংসস্তূপত পৰিণত কৰে।
আনহাতে, স্থানীয় ৰাইজৰ আকস্মিক বান সম্পর্কে কোনো ধাৰণাই নাছিল। গতিকে টলকিব পৰা পূর্বেই শ শ লোক বানত উটি যায়। তদুপৰি বহুতে দৌৰি পলায়নৰ চেষ্টা চলায়ো বানৰ পৰা ৰক্ষা নাপালে। এই তীব্ৰবেগী বানৰ পানীয়ে দেবীঘাটতো বিস্তৰ ক্ষতিসাধন কৰে। অৱশ্যে তেতিয়ালৈ বানৰ পানীৰ সোঁত বহু পৰিমাণে হ্রাস পায়। আনহাতে, বিশেষজ্ঞসকলৰ মাজত এই আকস্মিক বান সৃষ্টিৰ কাৰণ উদ্ঘাটনৰ চেষ্টা অব্যাহত আছে। একাংশ বিশেষজ্ঞৰ মতে জলবায়ু পৰিৱৰ্তনৰ ফলত এই ভয়াৱহ আকস্মিক বানৰ সৃষ্টি হয়। হিমবাহটো ফাটি যোৱাৰ কাৰণো জলবায়ু পৰিৱৰ্তন বুলি এইসকল বিশেষজ্ঞই ব্যাখ্যা কৰিছে।
হিমবাহ ফটাৰ ভয়ংকৰ দৃশ্য বন্দী হ’ল চীনা পৰ্যটকৰ কেমেৰাত
তিব্বতৰ যিটো হিমবাহ ফাটি নেপালত শেহতীয়া জলপ্ৰলয়ৰ সৃষ্টি কৰে সেই হিমবাহ ফটাৰ ভয়ংকৰ দৃশ্য এজন চীনা পৰ্যটকৰ কেমেৰাত বন্দী হ’ল। পর্যটকজনে নিজৰ অজানিতে এই ভয়ংকৰ দৃশ্যৰ ভিডিঅ’ তোলে। তেতিয়া তেওঁ হিমবাহটোৰ আৰু ইয়াৰ ওচৰ-পাঁজৰৰ নৈসর্গিক দৃশ্যৰ ভিডিঅ’ কৰি আছিল। তেনে অৱস্থাতে হিমবাহটো ফাটি পৰাত সেই দৃশ্যও তেওঁৰ কেমেৰাত বন্দী হয়। সম্প্রতি চীনৰ ইনষ্টিটিউট অৱ মাউন্টেইন হেজাৰ্ডছ এণ্ড এনভাইৰনমেণ্ট শীর্ষক সংস্থাই এই ভিডিঅ’ পৰীক্ষা কৰি আছে। আনহাতে এই ভিডিঅ’ত দেখা গৈছে হিমবাহটো ভঙাৰ ফলত ধোঁৱাৰ কুন্দলীও সৃষ্টি হৈছিল। ৫,১২৭ মিটাৰ উচ্চতাত অৱস্থিত এই হিমবাহৰ পৰা প্ৰৱল বেগেৰে পানী বৈ আহি নামনিৰ নৈসমূহত পৰে।
