HimantaBiswaSarma : দৈনিক অগ্ৰদূত ডিজিটেল ডেস্ক : ড° হিমন্ত বিশ্ব শর্মা নেতৃত্বাধীন এনডিএ চৰকাৰৰ দ্বিতীয়টো কাৰ্যকালৰ প্ৰথম চাৰি মাহতে ৭,৭৫০ কোটি টকাৰ ঋণ লৈছে বুলি সৰৱ হৈ উঠিছে প্ৰদেশ কংগ্ৰেছৰ সভাপতি গৌৰৱ গগৈ। এনেদৰে চৰকাৰখনে দ্বিতীয় কাৰ্যকালৰ প্ৰথম এশটা দিনত কেৱল ঋণৰ বোজাৰ মাইলৰ খুঁটিহে পুতিছে বুলি কালি মৰিগাঁৱত এখন সংবাদমেলত কটাক্ষ কৰে গগৈয়ে।
উল্লেখ্য যে অহা পহিলা ছেপ্টেম্বৰত চৰকাৰে পুনৰ এহেজাৰ কোটি টকাৰ ঋণ ল’ব। ইয়াকে ধৰিলে চৰকাৰখনে দ্বিতীয় কার্যকালৰ মাত্ৰ চাৰি মাহতে মুঠ ৭,৭৫০ কোটি টকাৰ ঋণ ল’ব বুলি গগৈয়ে মন্তব্য কৰে। এই বুজন অংকৰ ধনৰ ঋণ বছৰি ৭.৫৬ শতাংশ সুতত ৰাজ্য চৰকাৰে লৈছে বুলিও তেওঁ আক্ষেপ প্রকাশ কৰে।
ড° শৰ্মা চৰকাৰে কেনেদৰে ঋণৰ বানপানীৰ সৃষ্টি কৰিছে তাৰ তথ্য দাঙি ধৰি লোকসভাৰো বিৰোধী উপ-দলপতিৰূপে কাৰ্যনিৰ্বাহ কৰি থকা কংগ্ৰেছ নেতাজনে কয়, ‘যোৱা ১২ মে’ত এহেজাৰ কোটি, ২৬ মে’ত ৭৫০ কোটি, ১৬ জুনত এহেজাৰ কোটি, ৩০ জুনত এহেজাৰ কোটি, ২১ জুলাইত এহেজাৰ কোটি, চাৰি আগষ্টত এহেজাৰ কোটি আৰু ১৮ আগষ্টত এহেজাৰ কোটি টকাৰ ঋণ ল’লে। আকৌ অহা পহিলা ছেপ্টেম্বৰত এহেজাৰ কোটি ঋণ ল’বলৈ প্ৰস্তুতি চলাইছে।’
পূব অসমৰ শেহতীয়া বিধ্বংসী বানত ক্ষতিগ্রস্তসকলক ড° শৰ্মা চৰকাৰে নিম্নমানৰ সামগ্ৰী আৰু খোৱাৰ অনুপযোগী খাদ্য বিতৰণ কৰা বুলিও গগৈয়ে সংবাদমেলত অভিযোগ উত্থাপন কৰে।
তেওঁ কয়, ‘ৰাইজৰ কষ্টোপার্জিত ধনৰে কিনা এই সামগ্ৰীসমূহ ক্ৰয়ৰ ক্ষেত্ৰত বিভাগীয় মন্ত্রী আৰু ঠিকাদাৰৰ মাজত বৃহৎ অনিয়ম সংঘটিত হৈছে। আমি ইয়াৰ তদন্ত দাবী কৰিছো।’ গগৈয়ে লগতে অভিযোগ উত্থাপন কৰে যে মথাউৰি মেৰামতিৰ দায়িত্বত থকা সকলৰ গাফিলতিৰ বাবে বানত গাঁৱৰ পাছত গাঁও বুৰ গ’ল। এনে দুর্নীতি পৰায়ণসকলক শাসকীয় মন্ত্ৰী-বিধায়কে সুৰক্ষা প্ৰদান কৰি অহা বুলিও তেওঁ অভিযোগ উত্থাপন কৰে।
আনহাতে আগন্তুক লোকসভাৰ উপ-নিৰ্বাচনৰ প্ৰসংগ উল্লেখ কৰি গগৈয়ে এজন কৰ্তব্যৰত আইএএছ বিষয়াক কঠোৰ ভাষাৰে সমালোচনা কৰে। সম্প্ৰতি জিলা আয়ুক্তৰূপে কাৰ্যনিৰ্বাহ কৰি থকা বিষয়াজনে বিজেপিৰ প্ৰাৰ্থী আৰু কৰ্মীৰ স’তে ৰাজনৈতিক বৈঠকত অংশ লোৱাৰ অভিযোগ উত্থাপন কৰি তেওঁক তাৎক্ষণিকভাবে নিলম্বন বা বদলি কৰিবলৈ গগৈয়ে দাবী জনায়।
কাজিৰঙাৰ শেহতীয়া পৰিৱেশ সংবেনশীল মণ্ডল হ্ৰাসৰ প্ৰস্তাৱক লৈয়ো প্রতিক্রিয়া প্রকাশ কৰি গগৈয়ে অভিযোগ উত্থাপন কৰে যে ব্যক্তিগত কোম্পানীক সুবিধা কৰি দিবলৈ ড° শৰ্মা চৰকাৰে এই প্ৰস্তাৱ গ্ৰহণ কৰিছে।
