A23AIceberg : দৈনিক অগ্ৰদূত ডিজিটেল ডেস্ক : এক হিমবাহ ভাঙি পৰাৰ ফলত নেপালে দেখা পালে মহাপ্রলয়। দেশখনৰ এক বৃহৎ অংশ ধ্বংসস্তূপত পৰিণত হৈছে। কি আছিল আৰু কি হ’ল, সেই পার্থক্য সকলোৱে প্ৰত্যক্ষ কৰিছে। নেপালৰ এই সতেজ ক্ষতৰ মাজতে হিমবাহক কেন্দ্ৰ কৰি আশংকাৰ কথা জনাইছে একাংশ বিশেষজ্ঞই।
প্রাপ্ত তথ্য অনুসৰি, বিশ্বৰ সবাতোকৈ ডাঙৰ হিমবাহ ‘এ২৩এ’ বিগত ৪০ বছৰ ধৰি লাহে লাহে গলি গলি একেবাৰে অদৃশ্য হৈ পৰিছে। এন্টার্কটিকা আৰু ইয়াৰ সংলগ্ন দক্ষিণ মহাসাগৰৰ যি অংশজুৰি হিমবাহ আছিল, সেয়া গলি পানীত পৰিণত হৈছে। ইয়াৰ কেনে প্রভার মেৰুপ্ৰদেশ আৰু সংলগ্ন ইউৰোপ মহাদেশত পৰিব, তাৰ কল্পনাই কৰিব নোৱাৰি।
আহলে-বহলে বালি দ্বীপৰ আয়তনৰ সমান, প্রায় দুহেজাৰ বৰ্গ মাইল অঞ্চল। ইমানেই বিশাল আছিল ‘এ২৩এ’ নামৰ হিমবাহটোৰ আকাৰ। বৰফাবৃত এন্টার্কটিকাৰ ‘ফিলচনাৰ আইচ ছেল্ফ’ৰ পৰা ১৯৮৬ত পৃথক হৈ পৰিছিল এটা ডাঙৰ অংশ। পাছত ১৯৯১৩ ভূবিজ্ঞানীসকলে চিহ্নিত কৰে যে ‘এ২৩এ’ হৈছে পৃথিৱীৰ সৰ্ববৃহৎ হিমবাহ। পৰৱৰ্তী বছৰসমূহত হিমবাহটোৰ পৰিস্থিতি তেওঁলোকে নিৰীক্ষণত ৰাখিছিল। বিশেষ পৰিৱৰ্তন চকুত পৰা নাছিল।
হঠাতে ২০২০ত অষ্ট্ৰেলিয়াৰ বতৰ বিভাগৰ দৃষ্টিগোচৰ হয় যে ই ক্ৰমাৎ গতিশীল হৈ পৰিছে। তেতিয়াই অশনি সংকেত দেখা গৈছিল।
বিজ্ঞানীসকলে সতর্কবাতা দিছিল, ‘সাৱধান! এ২৩এই কিন্তু লৰচৰ আৰম্ভ কৰিছে।’ ২০২৩ৰ শেষৰ ফালে অর্থাৎ মাত্র তিনি বছৰৰ ভিতৰতে দেখা গ’ল যে হিমবাহৰ বৰফ গলি সাগৰৰ পানীত মিহলি হৈ পৰিছে। সেয়া আছিল ডাঙৰ বিপদৰ সংকেত।
ইয়াৰ পাছতে দেখা গ’ল এ২৩এৰ আচৰণত এক অদ্ভুত পৰিৱৰ্তন। উত্তৰমুখী গতিৰ পৰিৱৰ্তে সাগৰৰ সোঁতৰ মাজত আবদ্ধ হৈ পৰে ইয়াৰ ভাঙি পৰা অংশ। অর্থাৎ সাগৰৰ মাজত থিয় দি আছিল বৰফৰ এটা খণ্ড। প্রায় এনে লাগিছিল যেন সাগৰৰ মাজত এক পাহাৰৰ অৱস্থান। ২০২৪ত ইয়াৰ নামকৰণ হয় ‘টেইলৰ কলাম’।
ইয়াত সাগৰৰ স্বাভাৱিক সোঁত, গতি ব্যাহত হয়। লাহে লাহে টেইলৰ কলামৰ বৰফ গলি গলি উষ্ণ সাগৰ সোঁতৰ স’তে মিহলি হৈ থাকে আৰু গলন ত্বৰান্বিত হয়। ২০২৫ৰ মাৰ্চত আকৌ ছাউথ জর্জিয়াৰ কাষত প্রায় ৭০ বর্গ মাইল অঞ্চলত এ২৩এৰ এটা খণ্ড আবদ্ধ হৈ পৰে।
হিমবাহটোৰ গতিবিধিৰ প্ৰতি দৃষ্টি ৰখা বিজ্ঞানী জেৰম বুভিয়েৰে কয়, ‘এখন শক্তিশালী প্ৰাচীৰ সৃষ্টি হয়। লগত কিছু গুহামুখ অর্থাৎ বৰফখণ্ডৰ মাজে মাজে গাঁতৰ সৃষ্টি হৈছে। লগতে ক্রমাগতভাৱে চূড়াৰ দৰে বৰফ সৰি সৰি পৰিছে।’ ইয়াৰ পাছতে সবাতোকৈ ডাঙৰ হিমবাহৰ আখ্যা হেৰুৱালে ‘এ২৩এ’ই।
এনে সময়তে সাগৰ তলিত ভিডিঅ’গ্ৰাফী কৰিবলৈ যাওঁতে সৰু সৰু পেংগুইন, তিমি, চৰাই, মাছৰ দৰে জলজ প্রাণী ধৰা পৰে। ডুবাৰুসকলে নিজৰ অভিজ্ঞতা ভাগ কৰি জনাইছে যে এনে লাগিছিল যে এটুকুৰা এন্টার্কটিকাই ইয়ালৈ উঠি আহিছে। যদিও বাস্তৱত বেগতিক পৰিস্থিতিক লৈ প্রমাদ গণিছে বিজ্ঞানীসকলে। চলিত বর্ষত সেয়াই প্রমাণিত হ’ল। এতিয়া ‘এ২৩এ’ৰ প্ৰায় অস্তিত্বই নাই। যিখিনি বৰফ বাচি আছে, তাত গোট মাৰিছে ক্লোৰোফিল। হিমবাহৰ চৰিত্ৰ সম্পূৰ্ণৰূপে নষ্ট হৈ পৰিছে। পৃথিৱীৰ সেই প্ৰান্তত আন এক জলপ্ৰলয়ৰ আশংকা কৰিছে একাংশ বিশেষজ্ঞই।
