CourtJudgement : দৈনিক অগ্ৰদূত ডিজিটেল ডেস্ক : ৰাজ্যৰ ন্যায়িক ইতিহাসত এক বিৰল অধ্যায়ৰ সংযোজন কৰি একেদিনাই ডিব্ৰুগড়ৰ অতিৰিক্ত জিলা আৰু সত্ৰ ন্যায়াধীশৰ আদালতে ছটাকৈ হত্যাকাণ্ডৰ গোচৰ নিষ্পত্তি কৰিলে। ইয়াৰ লগে লগে গোচৰকেইটাৰ অভিযুক্তসকলক শাস্তিৰ বিধান দিলে আদালতে।
সাধাৰণতে এখন আদালতে এদিনত এনে বৃহৎ সংখ্যক হত্যাৰ দৰে অপৰাধৰ গোচৰৰ বিচাৰ সম্পূৰ্ণ কৰি ৰায়দান কৰাৰ ঘটনা অত্যন্ত বিৰল। গতিকে এই খবৰে আইনী জগতত ব্যাপক চর্চা অৰ্জন কৰিছে। এই সম্পর্কত জ্যেষ্ঠ অধিবক্তা নীলোৎপল ফুকনে কয়, ‘এয়া আমাৰ বাবে এটা ঐতিহাসিক দিন। সাধাৰণ ৰাইজৰ মনত এই ধৰণৰ ৰায়দানসমূহে আস্থা আৰু বিশ্বাস পুনৰ গঢ়ি তুলিব। অপৰাধীৰ প্ৰতি এটা বার্তা যাব যে আদালতে বেয়া কাম সহ্য নকৰে।’
আনহাতে, আদালতৰ এই ঐতিহাসিক ৰায় অনুসৰি বিচাৰাধীন উক্ত ছয় গোচৰৰ পাঁচটাত অভিযুক্তসকলক ভাৰতীয় দণ্ড বিধিৰ ৩০২ ধাৰাৰ অধীনত দোষী সাব্যস্ত কৰি শাস্তিৰূপে আজীৱন কাৰাদণ্ড আৰু প্ৰতিজন দোষীকে ১০ হেজাৰ টকাকৈ জৰিমনা বিহা হয়। জৰিমনা অনাদায়ে অতিৰিক্ত তিনিমাহ সশ্রম কাৰাবাস ঘাটিব লাগিব।
ইয়াৰে প্ৰথমটো গোচৰ লাহোৱাল আৰক্ষী থানা (নম্বৰ ৪৩/১৯, সত্ৰ আদালতৰ গোচৰ নম্বৰঃ ১৩১/১৯)ত শুক্রাম মূৰা নামৰ এজন লোকক দোষী সাব্যস্ত কৰা হয়। দ্বিতীয়টো গোচৰ ডিব্ৰুগড় সদৰ আৰক্ষী থানাৰ (নম্বৰ ২২৩৯/২১, সত্ৰ আদালতৰ গোচৰ নম্বৰঃ ২২৭/২২) আছিল। এই গোচৰ দুজনক একেলগে হত্যাৰ গোচৰ আছিল।
গোচৰটোত ৰাজীৱ চুক্ৰাং নামৰ এজন লোকক দোষী সাব্যস্ত কৰে আদালতে। ২০২২ত চুক্রাঙে এজন লোকৰ স’তে পত্নীক আপত্তিজনক অৱস্থাত উদ্ধাৰ কৰি হত্যা কৰি পলায়ন কৰিছিল। তৃতীয়টো গোচৰত বিকি চেতিয়া নামৰ এজন আৰক্ষী কনিষ্টবলক দোষী সাব্যস্ত কৰে আদালতে।
কৰ্মৰত অৱস্থাতে বিকিয়ে ছার্ভিচ কাৰ্বাইনেৰে গুলীয়াই হত্যা কৰে। আনহাতে, চতুৰ্থটো গোচৰত ৰাজু চুতীয়া নামৰ এজন লোকক দোষী সাব্যস্ত কৰা হয়। এই গোচৰ মৰাণ আৰক্ষী থানা (নম্বৰঃ ৪৩/২৩, সত্ৰ আদালতৰ গোচৰ নম্বৰ: ২৫৯/২৩) আছিল।
পঞ্চমটো গোচৰত ডিপু মেচ নামৰ এজন লোকক দোষী সাব্যস্ত কৰা হয়। অৱশ্যে ষষ্ঠ গোচৰটোটো হত্যাৰ ধাৰা সন্নিবিষ্ট আছিল যদিও আদালতে কিছু শিথিলতা প্রত্যক্ষ কৰি ঘটনাটো অনিচ্ছাকৃত হত্যাৰূপে গণ্য কৰি দোষীক চাৰি বছৰৰ কাৰাদণ্ড আৰু এহেজাৰ টকাৰ জৰিমনা বিহে।
জৰিমনা অনাদায়ে দোষীয়ে সাত দিনৰ অতিৰিক্ত কাৰাবাস খাটিব লাগিব। এই ৰায়দান সম্পর্কে অধিবক্তা ফুকনে লগতে কয় যে এই ছয় গোচৰৰ তদন্তকাৰী বিষয়াসকলে নিখুঁতভাবে তদন্ত প্রক্রিয়া সম্পন্ন কৰাত বিচাৰ প্ৰক্ৰিয়া কম দিনৰ ভিতৰতে সম্পন্ন হয় আৰু আদালতে ৰায়দান কৰে।
