Tezpur : দৈনিক অগ্ৰদূত ডিজিটেল ডেস্ক: প্রায় এপষেক পূৰ্বে তেজপুৰৰ তল কলিবাৰীত হঠাতে হোৱা ব্ৰহ্মপুত্ৰৰ গৰাখহনীয়া প্ৰতিৰোধৰ বাবে চৰকাৰীভাৱে কিছু অস্থায়ী ব্যৱস্থা গ্ৰহণ কৰাৰ পাছত বর্তমান সেই স্থানত গৰাখহনীয়া প্ৰতিৰোধ হৈছে। কিন্তু বর্তমান যোৱা পাঁচটা দিনত কলিবাৰীৰ অংগনৱাড়ী কেন্দ্র তথা প্রাথমিক বিদ্যালয় অৱস্থিত অঞ্চলত ব্ৰহ্মপুত্ৰৰ খহনীয়া অব্যাহত আছে।
জনবহুল অঞ্চলটোৰ কাষেৰে বৈ যোৱা ব্ৰহ্মপুত্ৰৰ এই খহনীয়াকলৈ স্থানীয় ৰাইজ শংকিত হৈ পৰিছে। উল্লেখ্য যে তেজপুৰ চহৰৰ কাষৰে এই অঞ্চলটো ব্ৰহ্মপুত্ৰৰ পাৰত অৱস্থিত। তল কলিবাৰী হিচাপে পৰিচিত এক ঐতিহাসিক আৰু জনবসতিপূর্ণ এই অঞ্চল। বিগত কিছুদিন ধৰি হোৱা বৰষুণ আৰু ব্ৰহ্মপুত্ৰৰ পানীৰ তীব্ৰ সোঁতৰ ফলত এই অঞ্চলটোত গৰাখহনীয়াৰ সৃষ্টি হৈছে যাৰ বাবে বৃহত্তৰ অঞ্চলটোৰ আবাসীসকল এতিয়া শংকিত হৈ পৰিছে।
উল্লেখ্য যে আগষ্টৰ আৰম্ভণিৰে পৰা ব্ৰহ্মপুত্ৰ নদীৰ জলস্তৰ হঠাতে বৃদ্ধি পোৱাৰ লগে লগে কলিবাৰী অঞ্চলত বুঢ়ালুইতৰ পানী ফেনেফোটোকাৰে বৃদ্ধি পায়। ব্রহ্মপুত্ৰৰ প্ৰবল সোঁতৰ বাবে পাৰৰ বৃহৎ বৃহৎ চপৰা খহি পৰিছে আৰু জনবসতিপূর্ণ অঞ্চলৰ কাষৰে মাটি নদীৰ বুকুত বিলীন হৈছে। বর্তমান তল কলিবাৰীৰ অংগনৱাড়ী কেন্দ্ৰটো আৰু প্রাথমিক বিদ্যালয়খনলৈ এই খহনীয়াই তীব্র ভাবুকিৰ সৃষ্টি কৰিছে।
উল্লেখ্য যে ব্ৰহ্মপুত্র নদৰ স্থানীয় ৰাইজৰ স’তে আছে পুৰণা সম্পর্ক। অঞ্চলটোৰ কৃষি তথা অর্থনীতি এটা সময়ত নিৰ্ভৰ কৰিছিল এই ব্ৰহ্মপুত্ৰৰ ওপৰতেই। এতিয়া অঞ্চলটোৰ পৰিৱেশ যথেষ্ট সলনি হ’ল যদিও বর্তমানেও বহু লোক নিৰ্ভৰশীল এইখন বুঢ়া লুইতৰ ওপৰতে। কিন্তু যোৱা কে’বা বছৰো ধৰি ক্ৰমান্বয়ে বহু মাটি ব্রহ্মপুত্রই এই অঞ্চলত খহাই নিছে। আনকি বৃহত্তৰ অঞ্চলটোত হোৱা খহনীয়াই ঐতিহাসিক ভৈৰৱী দেৱালয়ৰ কাষৰীয়া অঞ্চলতো প্রভাৱ পেলাইছে।
থলুৱা তথা খিলঞ্জীয়া লোকৰ বসতিপ্রধান এই অঞ্চলটোত দীর্ঘকালৰ পৰা অব্যাহত খহনীয়া আৰু বৰ্তমান পুনৰ ইয়াত আৰম্ভ হোৱা খহনীয়াৰ বাবে শংকিত ৰাইজে সেয়ে চৰকাৰক ইয়াত এক খহনীয়া প্ৰতিৰোধী স্থায়ী ব্যৱস্থা ৰূপায়ণ কৰি ব্ৰহ্মপুত্ৰৰ পাৰৰ বৃহত্তৰ কলিবাৰী অঞ্চলক সুৰক্ষিত কৰাৰ ব্যৱস্থা গ্রহণ কৰিবলৈ আহ্বান জনাইছে।
