দৈনিক অগ্ৰদূত ডিজিটেল ডেস্ক: ৰাইজৰ দলৰ স’তে থকা সকলো ধৰণৰ আনুষ্ঠানিক মিত্ৰতা ভংগ কৰাৰ কথা ঘোষণা কৰিলে অসম প্ৰদেশ কংগ্ৰেছে। বৃহস্পতিবাৰে গুৱাহাটীৰ ৰাজীৱ ভৱনত অনুষ্ঠিত এক গুৰুত্বপূৰ্ণ সংবাদমেলত ধুবুৰী লোকসভা সমষ্টিৰ সাংসদ ৰকিবুল হুছেইন, প্ৰাক্তন সাংসদ তথা প্ৰাক্তন প্ৰদেশ কংগ্ৰেছ সভাপতি ৰিপুণ বৰা আৰু অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰে ৰাইজৰ দলৰ সভাপতি তথা বিধায়ক অখিল গগৈৰ ভূমিকা, ৰাজ্যৰ বান পৰিস্থিতি, মূল্যবৃদ্ধি আৰু নগাঁও উপ-নিৰ্বাচনৰ প্ৰশাসনিক পক্ষপাতিত্বক লৈ শাসকীয় বিজেপি আৰু মুখ্যমন্ত্ৰী ড° হিমন্ত বিশ্ব শৰ্মাক তীব্ৰ সমালোচনা কৰে।
সংবাদমেলত দলৰ সাধাৰণ সম্পাদক ইমদাদ হুছেইন আৰু ছ’চিয়েল মিডিয়া বিভাগৰ অধ্যক্ষ ঋতুপৰ্ণ কোঁৱৰো উপস্থিত থাকে। সাংসদ ৰকিবুল হুছেইনে কয় যে যোৱা সাধাৰণ নিৰ্বাচনৰ সময়ত ৰাইজ আৰু বুদ্ধিজীৱীসকলৰ আহ্বানৰ প্ৰতি লক্ষ্য ৰাখি কংগ্ৰেছে বিজেপি আৰু এআইইউডিএফক বাদ দি কেইবাটাও বিৰোধী দলৰ স’তে মিত্ৰতা কৰিছিল। কিন্তু শেহতীয়াকৈ ৰাইজৰ দল আৰু বিশেষকৈ অখিল গগৈয়ে কংগ্ৰেছ দল তথা প্ৰদেশ কংগ্ৰেছৰ সভাপতি গৌৰৱ গগৈক ব্যক্তিগতভাৱে আক্ৰমণ কৰি অহা বুলি তেওঁ অভিযোগ কৰে।
হুছেইনে অভিযোগ কৰে যে মুখ্যমন্ত্ৰী ড° হিমন্ত বিশ্ব শৰ্মা আৰু তেওঁৰ সহযোগীসকলে কংগ্ৰেছক লৈ যি মন্তব্য কৰে, তাৰ কিছুদিন পাছতে একেটা সুৰতে অখিল গগৈয়েও কংগ্ৰেছক আক্ৰমণ কৰে। সেয়েহে অন্যান্য সতীৰ্থ দলসমূহৰ স’তে আলোচনা কৰি ৰাইজৰ দল আৰু অখিল গগৈৰ সৈতে থকা মিত্ৰতা আনুষ্ঠানিকভাৱে প্ৰত্যাহাৰ কৰা হৈছে বুলি তেওঁ স্পষ্ট কৰে।
অখিল গগৈ আঁতৰি গ’লে উপ-নিৰ্বাচনত কংগ্ৰেছৰ লোকচান হ’ব নেকি বুলি সোধা প্ৰশ্নৰ উত্তৰত হুছেইনে কয় যে কংগ্ৰেছৰ লোকচান হ’লে লাভ বিজেপি অথবা এআইইউডিএফৰ হ’ব। ধুবুৰীত অখিল গগৈয়ে কংগ্ৰেছক জয়ী কৰাইছিল বুলি কৰা দাবীকো তেওঁ প্ৰত্যাহ্বান জনায়। হুছেইনৰ মতে, ধুবুৰীত ৰাইজৰ দলে দুখন আসনত ফ্ৰেণ্ডলী কনটেষ্ট বিচাৰিছিল আৰু কংগ্ৰেছে সেয়া মানি লৈছিল। কিন্তু অখিল গগৈয়ে প্ৰচাৰ চলোৱাৰ পাছতো গোৱালপাৰা আৰু গৌৰীপুৰত তেওঁৰ প্ৰাৰ্থীয়ে চতুৰ্থ আৰু পঞ্চম স্থানহে লাভ কৰিছিল।
বান পৰিস্থিতিক লৈও চৰকাৰক আক্ৰমণ
ৰাজ্যৰ বান পৰিস্থিতি আৰু মুখ্যমন্ত্ৰীৰ ভূমিকাক লৈও ৰকিবুল হুছেইনে ক্ষোভ প্ৰকাশ কৰে। তেওঁ কয় যে বানৰ সময়ত মানুহৰ অৱস্থা অবৰ্ণনীয় হৈ পৰিছে। এগৰাকী মাতৃয়ে নিজৰ মৃত সন্তানৰ সলনি গাৰু এটা সাবতি কান্দিবলগীয়া হোৱা ঘটনাৰ কথাও তেওঁ উল্লেখ কৰে।
হুছেইনে অভিযোগ কৰে যে ইমান ভয়ংকৰ বানপানীৰ পাছতো প্ৰধানমন্ত্ৰী অথবা গৃহমন্ত্ৰীৰ অসমলৈ আহিবলৈ সময় নহ’ল, অথচ নিৰ্বাচনৰ সময়ত তেওঁলোকে নিশাটো অসমতে কটায়।
অখিল গগৈৰ ভূমিকাক সমালোচনা কৰি হুছেইনে কয় যে বিধানসভাত টেবুলত উঠাৰ দৰে মুখ্যমন্ত্ৰীৰ টেবুলতো জঁপিয়াব বুলি নাটক কৰিছিল আৰু বানপানীক মানৱসৃষ্ট আখ্যা দি মন্ত্ৰীসকলৰ নাম লৈছিল। কিন্তু মুখ্যমন্ত্ৰীক সাক্ষাৎ কৰি ওলাই অহাৰ পাছতে অখিল গগৈয়ে বানপানীৰ কথা পাহৰি নগাঁও উপ-নিৰ্বাচনৰ কথাহে ক’বলৈ ধৰিলে বুলি তেওঁ অভিযোগ কৰে।
ইফালে মুখ্যমন্ত্ৰীয়ে উৰণীয়া সেতু আৰু তথাকথিত বিকাশৰ কথা কৈ ঢাক-ঢোল বজাইছে যদিও ফ্লাইঅভাৰৰ তলৰ ব্যৱসায়ী আৰু সাধাৰণ পৰিয়ালবোৰ ধ্বংস হৈছে বুলি হুছেইনে মন্তব্য কৰে। মূল্যবৃদ্ধিয়েও সাধাৰণ মানুহক কোঙা কৰি পেলোৱা বুলি তেওঁ কয়।
নগাঁও উপ-নিৰ্বাচনত জিলা আয়ুক্তৰ বিৰুদ্ধে পক্ষপাতিত্বৰ অভিযোগ
নগাঁও লোকসভা সমষ্টিৰ অন্তৰ্গত চামগুৰি তথা আগন্তুক উপ-নিৰ্বাচন সন্দৰ্ভতো ৰকিবুল হুছেইনে গুৰুত্বপূৰ্ণ অভিযোগ উত্থাপন কৰে। নগাঁৱৰ জিলা আয়ুক্ত তথা জিলা নিৰ্বাচন বিষয়াগৰাকীয়ে ৰাজনৈতিক পক্ষপাতিত্বৰে শাসকীয় বিজেপিৰ হৈ কাম কৰি থকা বুলি তেওঁ অভিযোগ কৰে।
তেওঁৰ মতে, বিষয়াগৰাকী ভৱিষ্যতে বিজেপিৰ প্ৰাৰ্থী হোৱাৰ দিশে আগবাঢ়িছে। এই সন্দৰ্ভত যোৱা ২৬ আগষ্টত কংগ্ৰেছে ভাৰতীয় নিৰ্বাচন আয়োগৰ ওচৰত আনুষ্ঠানিক অভিযোগ পত্ৰ দাখিল কৰা বুলি হুছেইনে জনায়।
আয়োগে অভিযোগ পত্ৰ গ্ৰহণ কৰি প্ৰয়োজনীয় তথ্য বিচাৰিছে আৰু তৎকালীনভাৱে ব্যৱস্থা গ্ৰহণৰ আশ্বাস দিছে বুলি তেওঁ কয়। নগাঁৱৰ জিলা আয়ুক্তগৰাকীক অনতিপলমে নিলম্বন কৰি সমগ্ৰ ঘটনাৰ নিৰপেক্ষ তদন্ত কৰাৰ দাবী জনায় হুছেইনে।
‘অখিল গগৈ আমাৰ বাবে ডাঙৰ বোজা আছিল’: ৰিপুণ বৰা
সংবাদমেলত প্ৰাক্তন প্ৰদেশ কংগ্ৰেছ সভাপতি তথা প্ৰাক্তন সাংসদ ৰিপুণ বৰাই ৰাইজৰ দলৰ সৈতে মিত্ৰতা ভংগৰ সিদ্ধান্তক কংগ্ৰেছৰ বাবে এক ডাঙৰ সকাহ বুলি অভিহিত কৰে।
তেওঁ কয় যে অখিল গগৈ কংগ্ৰেছৰ বাবে এটা ডাঙৰ বোজা আৰু লায়েবিলিটি আছিল। সেই বোজা আঁতৰি গ’ল আৰু দল তথা হাইকমাণ্ডে সময়োপযোগী আৰু সঠিক সিদ্ধান্ত গ্ৰহণ কৰিছে বুলি বৰাই মন্তব্য কৰে।
বিহুগীতৰ এফাঁকি উদ্ধৃতি দি ৰিপুণ বৰাই অখিল গগৈক আক্ৰমণ কৰি কয় যে মানুহক দেখুৱাই মুখ্যমন্ত্ৰীৰ বিৰুদ্ধে চিঞৰি থাকিলেও ভিতৰি তেওঁ মুখ্যমন্ত্ৰীৰ পকেটত সোমাই আছে।
অখিল গগৈয়ে গৌৰৱ গগৈ আৰু মুখ্যমন্ত্ৰীক পদত্যাগ কৰি শিৱসাগৰত নিৰ্বাচনী যুঁজত অৱতীৰ্ণ হ’বলৈ দিয়া প্ৰত্যাহ্বানকো ‘ল’ৰা ধেমালি’ বুলি অভিহিত কৰে বৰাই।
তেওঁ অখিল গগৈক কংগ্ৰেছৰ সমৰ্থন অবিহনে নিজৰ শক্তিত পুনৰ জিকি দেখুৱাবলৈ প্ৰত্যাহ্বান জনায়। কংগ্ৰেছৰ সমৰ্থন অবিহনে অখিল গগৈয়ে ভৱিষ্যতে কোনো নিৰ্বাচনতে জিকিব নোৱাৰিব বুলিও বৰাই দাবী কৰে।
‘মিত্ৰতা ভংগত কংগ্ৰেছৰ তৃণমূল কৰ্মী আনন্দিত’: মীৰা বৰঠাকুৰ
অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰে কয় যে ৰাইজৰ দলৰ সৈতে সম্পৰ্ক ছেদ হোৱাত কংগ্ৰেছৰ হাজাৰ হাজাৰ তৃণমূল কৰ্মী আনন্দিত আৰু উৎসাহিত হৈছে।
এতিয়াৰ পৰা কংগ্ৰেছে অখিল গগৈৰ সৈতে কথা কটাকটি কৰি সময় নষ্ট নকৰে বুলি স্পষ্ট কৰি বৰঠাকুৰে কয় যে কংগ্ৰেছৰ একমাত্ৰ লক্ষ্য আৰু প্ৰত্যক্ষ যুঁজ হ’ব মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে।
উজনিৰ কৃত্ৰিম বানপানীৰ বাবে মন্ত্ৰী পীযুষ হাজৰিকা, সুশান্ত বৰগোহাঁই আৰু বিধায়ক ধৰ্মেশ্বৰ কোঁৱৰৰ নেতৃত্বত চলা ছিণ্ডিকেট দায়ী বুলি অখিল গগৈয়ে কৰা অভিযোগৰ চিবিআই তদন্ত মুখ্যমন্ত্ৰীয়ে দিবনে বুলিও তেওঁ প্ৰশ্ন কৰে।
লগতে বানপীড়িত ৰাইজে ঘোষণা কৰা ১৫ হাজাৰ টকাকৈ সাহায্য লাভ কৰিলে নে নাই আৰু পিএম ফাণ্ড তথা চিএম ফাণ্ডৰ ধন ক’লৈ গ’ল, তাৰ হিচাপো বিচাৰে বৰঠাকুৰে।
চৰকাৰক বিভিন্ন বিষয়ত সমালোচনা
কাজিৰঙাৰ ইক’-ছেনচিটিভ জ’ন সংকুচিত কৰি ব্যক্তিগত হোটেল ব্যৱসায়ীৰ স্বাৰ্থত কাৰ সৈতে গোপন চুক্তি কৰা হৈছে, সেয়া চৰকাৰে ৰাজহুৱা কৰিব লাগে বুলি মীৰা বৰঠাকুৰে দাবী কৰে।
তেওঁ কয়, “অসমখন হিমন্ত বিশ্ব শৰ্মাৰ পৈতৃক সম্পত্তি নহয়, অসমখন অসমৰ ৰাইজৰ।”
ইয়াৰ উপৰি পথত প্রকাণ্ড গাঁত থকাৰ পাছতো টোলগেট বহুৱাই ৰাইজৰ ধন লুণ্ঠন কৰা, গুৱাহাটীক অপৰিকল্পিত নিৰ্মাণেৰে কৃত্ৰিম বানৰ ‘পাৰ্পল চিটি’লৈ ৰূপান্তৰ কৰা আৰু যোৰহাটৰ কেন্দুগুৰিৰ পৰা টীয়কলৈ নখন উৰণীয়া সেতু নিৰ্মাণ কৰি নগৰখন পানীত ডুবাই পেলোৱা বুলি তেওঁ চৰকাৰক সমালোচনা কৰে।
সমগ্ৰ অসমক ড্ৰাগছৰ বিষবাষ্পই ধ্বংস কৰা বুলিও অভিযোগ কৰে বৰঠাকুৰে। চৰকাৰে এবছৰত তিনি-চাৰিখনকৈ উৰণীয়া সেতু নিৰ্মাণ কৰিব পাৰে যদিও শিল্পী জুবিন গাৰ্গৰ ‘জুবিন ক্ষেত্ৰ’ৰ চাৰিসীমাৰ দেৱাল এবছৰতো নিৰ্মাণ কৰিব নোৱাৰিলে বুলি তেওঁ মন্তব্য কৰে।
সংবাদমেলৰ শেষত কংগ্ৰেছ নেতৃবৃন্দই কয় যে বিৰোধী ঐক্যৰ অচলাৱস্থা দূৰ কৰি কংগ্ৰেছে নিজা শক্তিত ৰাইজৰ জলন্ত সমস্যাসমূহক লৈ চৰকাৰৰ বিৰুদ্ধে তীব্ৰ আন্দোলন গঢ়ি তুলিব।
