অবিশ্বাস্য! পৃথিৱীৰে উচ্চতম শৃংগ মাউন্ট এভাৰেষ্টৰ এটা হিমবাহ গলাই নিশ্ছিন্ন কৰিলে মানুহৰ মূত্ৰই। মাউন্ট এভাৰেষ্ট আৰোহণকাৰীৰ সংখ্যা বৃদ্ধি পোৱাৰ ফলত এই অবিশ্বাস্য ঘটনা সংঘটিত হোৱা বুলি শেহতীয়া এক অধ্যয়নত পোহৰলৈ আহিছে।
এক অধ্যয়নত আঙুলিয়াই দিয়া হৈছে যে প্রতি বছৰে মাউন্ট এভাৰেষ্টত উপস্থিত হোৱা পৰ্বতাৰোহীসকলে বৰ্জন কৰা মূত্ৰই কে’বা টনো বৰফ গলায়। ফলত এটা হিমবাহেই নিশ্ছিন্ন হ’ল। উল্লেখ্য যে এভাৰেষ্ট বেছ কেম্পো খুম্বু হিমবাহৰ ওপৰত অৱস্থিত।
গতিকে বছৰি এই হিমবাহত অনেক পৰ্বতাৰোহী উপস্থিত হয়। ফলত বছৰি এই হিমবাহত কমেও ১৬০০ টম্বু স্থাপন কৰা হয়। স্বাভাৱিকতে এই টম্বুসমূহত ৰন্ধনশালা, শ্বাৱাৰ, জেনেৰেটৰ, ৱাই-ফাই আদিৰ ব্যৱস্থা কৰা হয়।
ফলত চৌপাশৰ পৰিৱেশ উষ্ণ হ’বলৈ ধৰিছে। ইয়ে ক্রমে হিমালয়ক মৃত্যুৰ দিশে ঠেলি লৈ গৈছে বুলি এই অধ্যয়নত আঙুলিয়াই দিয়া হৈছে। একাংশ নেপালী আৰু আমেৰিকান বিজ্ঞানীৰ এটা দলে সম্পন্ন কৰা এই অধ্যয়নৰ গৱেষণাপত্র প্রকাশ পাইছে ‘ৰিজ’নেল এনভাইৰণমেন্টেল চেঞ্জ’ শীর্ষক এক পত্রিকাত।
এই গৱেষণাপত্ৰত কোৱা হৈছে মানুহৰ কাম-কাজে কেনেদৰে হিমবাহ গলাত ভূমিকা পালন কৰিছে। ইয়ে এক দুর্যোগ আসন্ন কৰি তোলা বুলিও গৱেষণাপত্ৰখনত উদ্বেগ প্রকাশ কৰা হৈছে।
এই দুর্যোগ নেপালৰ শেহতীয়া জলপ্রলয় সদৃশ হোৱাৰ আশংকা কৰিছে একাংশই। উল্লেখ্য যে এটা হিমবাহ ফাটি নেপালৰ শেহতীয়া জলপ্ৰলয়ৰ সৃষ্টি হয় বুলি একাংশই দোহাৰি আহিছে।
আনহাতে, মানুহৰ মূত্ৰই কেনেদৰে এটা হিমবাহ গলালে তাৰ কাৰণো উক্ত গৱেষণাপত্ৰত ব্যাখ্যা কৰা হৈছে।
গৱেষণাপত্ৰখনৰ মতে মানুহৰ মূত্ৰৰ উষ্ণতাই হিমবাহটোৰ বৰফ গলাত ভূমিকা পালন কৰে।
তদুপৰি এই ক্ষেত্ৰত গোলকীয় উষ্ণতা বৃদ্ধি আৰু পেট্ৰ’লিয়ামজাত ইন্ধনৰ ব্যৱহাৰ বৃদ্ধিয়েও ভূমিকা পালন কৰে বুলি কোৱা হৈছে। উল্লেখ্য যে পৰ্বতাৰোহীসকলে অধিক উচ্চতালৈ গতি কৰিলে অধিক পৰিমাণৰ পানী পাণ কৰিবলগীয়া হয়।
ফলত তেওঁলোকে সঘনে মূত্র বিসর্জন কৰিবলগীয়া হয়। গতিকে বৰফৰ ওপৰত অধিক তাপৰ সৃষ্টি হয়।এই তাপে বৰফ গলাই এনেদৰে এটা হিমবাহেই গলি নিশ্ছিন্ন হ’ল।
উক্ত গৱেষণাৰ মুৰব্বী খিম লাল গৌতমে কয় যে মূত্রই প্ৰচুৰ পৰিমাণৰ তাপ কঢ়িয়ায় আৰু এটা হিমবাহ গলাবলৈ এই তাপ যথেষ্ট।
মাথোঁ এটা পৰ্বতাৰোহণ ঋতুতে মাউন্ট এভাৰেষ্টৰ হিমবাহটোৱে ১৫৪ টন বৰফ হেৰুৱালে বুলিও তেওঁ আঙুলিয়াই দিছে। কাৰণ মানুহৰ মূত্ৰই হিমবাহটোৰ বৰফৰ ওপৰত ৩৭ ডিগ্রী চেলচিয়াছ তাপৰ সৃষ্টি কৰে। এনে পৰিস্থিতিতে বিজ্ঞানীসকলে সতর্ক কৰি দিছে যে বিশ্বৰ আন অঞ্চলসমূহতকৈ হিমালয় অঞ্চল অধিক গৰম হ’বলৈ ধৰিছে।
আনকি দুহেজাৰৰ পৰা ২০ বছৰত হিমালয়ে পূৰ্বৰ ২০ বছৰৰ তুলনাত দুগুণ বৰফ হেৰুৱালে। এনেদৰে হিমালয়ো ধীৰে ধীৰে মৃত্যুৰ মুখে গতি কৰিছে। স্বাভাৱিকতে ইয়াৰ পৰিণতি অতি ভয়ানক হোৱাৰ আশংকা আছে।
