SocialMediaRegulation:দৈনিক অগ্ৰদূত ডিজিটেল ডেস্ক: অস্ট্রেলিয়া চৰকাৰে নতুন আইন প্ৰৱৰ্তন কৰিবলৈ ওলাইছে, যাৰ অধীনত প্লেটফৰ্মৰ এলগৰিদমে আৰু সিদ্ধান্ত ল’ব নোৱাৰিব যে ছ’চিয়েল মিডিয়াত কি দেখা যাব।
ব্যৱহাৰকাৰীসকলে এলগৰিদমিকভাৱে নিৰ্বাচিত বিষয়বস্তু চাব বিচাৰে নে তেওঁলোকে নিজে অনুসৰণ কৰা একাউণ্টৰ পৰা কেৱল পোষ্ট চাব বিচাৰে সেইটো নিৰ্বাচন কৰাৰ অধিকাৰ থাকিব।
প্রধানমন্ত্রী এন্টনি আলবানিজে মঙলবাৰে সংসদ ভৱনত এই প্ৰস্তাৱিত আইনৰ কথা ঘোষণা কৰে। চৰকাৰে কয় যে ছ’চিয়েল মিডিয়া ব্যৱহাৰকাৰীসকলক তেওঁলোকৰ অনলাইন ফিডৰ ওপৰত অধিক নিয়ন্ত্রণ দিয়াৰ লক্ষ্য লোৱা হৈছে।
প্রস্তাবিত ডিজিটেল ডিউটি অৱ কেয়াৰ আইন অনুসৰি ১৬ বছৰৰ ওপৰৰ ব্যৱহাৰকাৰীয়ে সহজেই এলগৰিদম ভিত্তিক ফিডসমূহ বন্ধ বা অন কৰিব পাৰিব। যদি কোনো ব্যৱহাৰকাৰীয়ে এলগৰিদমৰ পৰা আঁতৰি যায়, তেন্তে তেওঁক মূলতঃ তেওঁ অনুসৰণ কৰা একাউণ্টসমূহৰ পৰা বিষয়বস্তু দেখুওৱা হ’ব।
চৰকাৰৰ মতে ইয়াৰ ফলত ব্যৱহাৰকাৰীৰ পছন্দ আৰু আচৰণৰ ওপৰত ভিত্তি কৰি ছ’চিয়েল মিডিয়া কোম্পানীসমূহে অহৰহ কন্টেন্ট প্ৰচাৰ কৰা ব্যৱস্থাটোৰ ওপৰত ব্যৱহাৰকাৰীৰ নিয়ন্ত্রণ বৃদ্ধি পাব। নতুন প্রস্তাৱত ১৮ বছৰৰ তলৰ ব্যৱহাৰকাৰীক সুৰক্ষা প্ৰদানৰ বাবে প্লেটফৰ্মত অধিক দায়িত্ব লোৱাৰ আহ্বান জনোৱা হৈছে।
চৰকাৰৰ মতে ছ’চিয়েল মিডিয়া কোম্পানীসমূহে শিশুসকলক খাদ্যাভ্যাসৰ বিকাৰ, ঘৃণা বা মহিলাৰ বিৰুদ্ধে অপৰাধৰ প্ৰচাৰ আৰু মহিমামণ্ডিত কৰা বিষয়বস্তুৰ পৰা ৰক্ষা কৰাৰ বাবে পদক্ষেপ ল’ব লাগিব।
প্রস্তাবিত নিয়ম উলংঘা কৰা ছ’চিয়েল মিডিয়া কোম্পানীসমূহক ১০ কোটি অস্ট্রেলিয়ান ডলাৰ পৰ্যন্ত জৰিমনা বিহা হ’ব পাৰে। এই ধনৰাশি প্রায় ৭.২ কোটি মার্কিন ডলাৰৰ সমান বুলি কোৱা হয়। প্রধানমন্ত্রী আলবানিছে কয় যে চৰকাৰৰ লক্ষ্য ইণ্টাৰনেটত মানুহৰ পছন্দ কাঢ়ি লোৱা নহয়, বৰঞ্চ তেওঁলোকক নিজৰ পছন্দৰ ক্ষমতা দিয়াহে।