VehicleOwnership : দৈনিক অগ্ৰদূত ডিজিটেল ডেস্ক : এতিয়াৰে পৰা তিনি বছৰ পুৰণি চাৰি অথবা অধিক চকাৰ যিকোনো বাহন কিনা-বেচা কৰিলে ‘সেউজ উপকৰ’ আদায় দিব লাগিব। এই কৰৰ পৰিমাণ ন্যূনতম তিনি হেজাৰ টকা হ’ব বুলি কালি জনতা ভৱনত অনুষ্ঠিত অসম চৰকাৰৰ কেবিনেট বৈঠকত সিদ্ধান্ত গ্রহণ কৰা হয়।
বৈঠকৰ পাছত এক সংবাদমেলত মুখ্যমন্ত্রী ড° হিমন্ত বিশ্ব শর্মাই কয় যে এই উপকৰৰ পৰা সংগৃহীত ধন সম্পূৰ্ণৰূপে বন আৰু পাৰিপার্শ্বিক শিতানত ব্যৱহাৰ কৰা হ’ব। ইয়াৰ লগতে দেওবাৰে কেবিনেটত চৰকাৰৰ বিভিন্ন বিভাগৰ কে’বাটাও সিদ্ধান্ত গ্রহণ কৰা হয়।
মুখ্যমন্ত্ৰীয়ে সদৰী কৰা অনুসৰি, ডালমিয়া ভাৰত কোম্পানীক অসমত ১০,২০০ কোটি টকা বিনিয়োগেৰে উদ্যোগ স্থাপনৰ প্ৰস্তাৱত কেবিনেটে কালি অনুমোদন জনায়। কোম্পানীটোরে লংকা আৰু উমৰাংছ’ত ইয়াৰ উৎপাদন গোট আৰু অন্যান্য কাৰখানা স্থাপন কৰিব।
কেন্দ্ৰীয় চৰকাৰৰ অগ্নিবীৰ আঁচনিত কৰ্মৰত জোৱানসকলৰ বাবে অসম চৰকাৰে দেওবাৰে অসম আৰক্ষী, কাৰাগাৰ বিভাগ, অগ্নিনির্বাপক বাহিনী, বন বিভাগ, এছডিআৰএফ, আবকাৰী বিভাগ আদিৰ কনিষ্টবল পদৰ ১২ শতাংশ পদ সংৰক্ষিত কৰাৰ এক সিদ্ধান্ত কেবিনেটত গ্ৰহণ কৰে।
এই সন্দর্ভত মুখ্যমন্ত্রীয়ে কয় যে অসমৰ স্থায়ী নাগৰিক অগ্নিবীৰসকলৰ বাবে এই সংৰক্ষণ ব্যৱস্থা থাকিব। কেবিনেটত ৰাজ্যৰ তিনিখন স্বায়ত্তশাসিত পৰিষদৰ অন্তৰ্গত অঞ্চলত জল জীৱন মিছনৰ অধীনত পানী যোগান আঁচনিৰ ৰূপায়ণৰো সিদ্ধান্ত গ্রহণ কৰা হয়।
এই তিনিখন পৰিষদ হ’ল বিটিচি, ডিমা হাছাও আৰু কার্বি আংলং স্বায়ত্তশাসিত পৰিষদ। মুখ্যমন্ত্ৰীয়ে সদৰী কৰা আন এক সিদ্ধান্ত অনুসৰি, কোচ বিহাৰত থকা মধুপুৰ সত্ৰক দৈনন্দিন কাম-কাজ চলাব পৰাকৈ প্রতি মাহে অসম চৰকাৰে এক লাখ টকাকৈ আগবঢ়াব। কাৰণ দান বৰঙণি আদিৰ পৰিমাণ কেতিয়াবা যথেষ্ট কম হোৱাত সত্ৰখনৰ নিয়মীয়াকৈ চাকি-বন্তি জ্বলোৱাত অসুবিধা হয় বুলি ভকতসকলে জনাইছিল।
অসম চৰকাৰে আছাম ৰেজিমেন্টেল চেণ্টাৰৰ আন্তঃগাঁথনি উন্নয়নৰ বাবে ১০ কোটি টকা অনুমোদন আজিৰ কেবিনেটত জনায়।গুৱাহাটীত ব্ৰহ্মপুত্ৰৰ সৌন্দৰ্য উপভোগৰ পৰিসৰ বৃদ্ধিৰো পৰিকল্পনা কৰা হৈছে।
কালি কেবিনেটত এই বিষয়ে আলোচনা কৰা হয়। সেই আলোচনাৰ ভিত্তিত উজান বজাৰৰ পৰা ৰাজভৱনৰ সমীপলৈ যি গুৱাহাটী ৰিভাৰফ্ৰণ্ট নিৰ্মাণ কৰা হৈছে তাৰ পৰিসৰ কাছাৰী বজাৰৰ পৰা নীলাচল পাহাৰৰ পাদদেশলৈ সম্প্ৰসাৰিত কৰাৰ সিদ্ধান্ত গ্ৰহণ কৰা হয়। ইয়াৰ বাবে টাটা ইনষ্টিটিউট অৱ ছ’চিয়েল ছাইন্স প্রকল্প প্রতিবেদন প্রস্তুতৰ দায়িত্ব অর্পণৰ সিদ্ধান্ত কেবিনেটে গ্রহণ কৰে।
ইপিনে, পথ আন্তঃগাঁথনি প্রকল্পসমূহত উন্নত ব্যৱস্থাপনাৰ বাবে লোক নির্মাণ (পথ) বিভাগলৈ পৃথক কৰাত কেবিনেটে অনুমোদন জনায়। ইয়াৰ পূৰ্বে এই পথ শাখাটো লোকনির্মাণ (ভৱন আৰু ৰাষ্ট্ৰীয় ঘাইপথ) বুলি পৰিচিত আছিল।
কোকৰাঝাৰ জিলাৰ অন্তৰ্গত পাটগাঁও প্রস্তাবিত সংৰক্ষিত বনাঞ্চলৰ বিপৰীতে এতিয়াৰে পৰা ৰাজহ গাঁও হ’ব বুলিও কেবিনেটে সিদ্ধান্ত গ্ৰহণৰ কথা মুখ্যমন্ত্রী ড° শৰ্মাই সদৰী কৰে। তেওঁ কয়, ‘হল্টুগাঁও সংৰক্ষিত বনাঞ্চলৰ অন্তৰ্গত পাটগাঁও প্ৰস্তাৱিত সংৰক্ষিত বনাঞ্চলখনত এতিয়া গছ-গছনি তেনেকৈ নাই। বিভিন্ন জনগোষ্ঠীৰ লোকে তাত বাস কৰি আহিছে। পাটগাঁৱক ৰাজহ গাঁৱলৈ পৰিৱৰ্তন কৰিব লাগে বুলি বিটিচি প্ৰশাসনৰ পৰা অসম চৰকাৰক অৱগত কৰিছিল। সেই অনুসৰি কালি এই সিদ্ধান্ত লোৱা হয়।
অসমত চিজেপি নাই ৰাইজে বিজেপিক ভাল পায়
কে’বাটাও গুৰুতৰ বিষয়ত সংস্কাৰৰ দাবী দেশজুৰি প্ৰৱল জনমত গঠনৰ দৌৰত অৱতীৰ্ণ হৈছে ক’কৰচ জনতা পার্টি (চিজেপি)। অলপতে অসমতো চিজেপিয়ে নিজৰ সক্ৰিয়তা প্রদর্শন কৰে। কেবিনেটৰ সংবাদমেলখনতে সাংবাদিকে এই সন্দৰ্ভত কৰা এক প্রশ্নত মুখ্যমন্ত্রীয়ে কয়, ‘অসমত চিজেপি নাই। অসমত এইবিলাকৰ একো লাভ নাই। অসমত বিজেপিক ৰাইজে বেয়া নাপায়। আমাৰ জনপ্রিয়তা বাঢ়িহে আছে। অসমৰ বদনাম কৰিবলৈহে চিজেপিয়ে একপক্ষীয়ভাৱে শিক্ষানুষ্ঠানক লৈ অপপ্ৰচাৰ চলাইছে।
মুখ্যমন্ত্ৰীয়ে কয়, ‘তেওঁলোকে পলাশবাৰীলৈ গৈ অসম শিক্ষানুষ্ঠানৰ প্ৰস্ৰাৱগাৰৰ নলা বন্ধ হৈ থকাটো দেখুৱাইছে। মুখ্যমন্ত্ৰীৰ উত্তৰ বিচাৰিছে। মুখ্যমন্ত্ৰীয়ে নলা কিয় বন্ধ হৈ আছে তাৰ উত্তৰ দিব লাগিব নেকি? বিদ্যালয় পৰিচালনা সমিতি, মাক-দেউতাক সকলোৱে মিলি বিদ্যালয়খন চাফ চিকুণ কৰি ৰাখিব লাগে। চিজেপিয়ে এই কথা কোৱা নাই যে ল’ৰা-ছোৱালীক পঢ়াবলৈ অসম চৰকাৰে কিমান সুবিধা দিছে। তেওঁলোকে আজাৰা, জালুকবাৰীৰ শিক্ষানুষ্ঠান চাব লাগিছিল। তেওঁলোকে গোপাল বড়ো হাইস্কুল চাব লাগিছিল। এইবোৰ শিক্ষানুষ্ঠান ৰাস্তাত এৰি পলাশবাৰীৰ এখন বিদ্যালয়হে বিচাৰি পালে। চিজেপি বোলা বস্তুটো অসমত ক’ত আছে? বিজেপিকহে ৰাইজে ভাল পায়।
ৰাজনৈতিক দলৰ কথাত চৰকাৰে কিয় কাম কৰিব?
পূব অসমৰ প্ৰলয়ংকৰী বানত ক্ষতিগ্রস্তক ক্ষতিপূৰণ প্ৰদানৰ দাবীত বিধায়ক অখিল গগৈয়ে বিধানসভা ভৱনত একমাত্র সফলতা দাবীৰ সুযোগ বিচাৰিহে ধৰ্মঘট কৰি থকা বুলি আজি মুখ্যমন্ত্ৰীয়ে মন্তব্য কৰে। সংবাদমেলত মুখ্যমন্ত্রীয়ে কয়, ‘সাতদিন আগতে অখিল গগৈৰ লগত ফোনত মোৰ দীঘলীয়া কথা-বতৰা হৈছিল। মই বুৰ্বকৰ দৰে মানুহবোৰক কিদৰে আৰু কেনেকৈ সাহায্য দিম এই গোটেই কথাবোৰ কৈছিলো। মই কৈছিলো যে প্রধানমন্ত্রীয়ে আমাক ১২শ কোটি টকা দিব। ৫৫ হেজাৰ পৰিয়ালক আমি ক্ষতিপূৰণ দিম। সেই কথা শুনাৰ পাছতে তেওঁ এতিয়া ধৰ্মঘটত বহিছে। কাৰণ তেওঁ ক’ব লাগিব যে তেওঁৰ বাবেহে চৰকাৰে মানুহক সাহায্য দিছে। গতিকে তেওঁ যেতিয়া ধর্মঘটত বহিছে আমি অলপ পলম কৰিব লাগিব। তেওঁ যেতিয়া ৰাজনীতি কৰিছে, ময়ো বিজেপিক চাব লাগিব। ৰাজনৈতিক দলৰ কথা মতে আমি কিয় কাম কৰিম। তেওঁ মোক লগ কৰাৰ কথা কৈছে, সময় এটা ল’লে লগ কৰিম। তাৰ বাবে ইমান নাটক কিহৰ?’
অখিল গগৈৰ আন্দোলন প্রসংগতে মুখ্যমন্ত্রীয়ে নাম উল্লেখ নকৰাকৈ দুগৰাকী যুব নেত্রীকো কটাক্ষ কৰে। মুখ্যমন্ত্রীয়ে কয়, ‘কোন কি দলত আছে একো ধৰিবই নোৱাৰি। এটা পৰিয়ালৰ মাক-দেউতাক, জীয়েকক কিবা এটা বনাবলৈ উবুৰি খাই পৰিছে। দিল্লীলৈ গৈও জীয়েক আটক হৈছে। আন এগৰাকীয়ে বান সাহায্যৰ বাবে প্রতিবাদ কৰিছে আৰু পলাশবাৰীলৈ গৈ বিদ্যালয়ৰ প্ৰস্তাৱগাৰো দেখুৱাইছে।’
