দৈনিক অগ্ৰদূত ডিজিটেল ডেস্ক : ৰাইজৰ ধনেৰে লাহ-বিলাসৰ সুযোগ লাভ কৰাৰ বাহিৰে অসমৰ ৰাজ্যসভাৰ অধিকাংশ সদস্যৰে কৰিবলৈ যেন একোৱেই নাই! ৰাজ্যবাসীৰ মাজত চলি অহা এই চর্চা যে অমূলক নহয় সেয়াও নিজৰ কৰ্মৰে প্ৰমাণ কৰিছে এইসকল সাংসদে। ৰাজ্যসভাৰ এজন সাংসদ নির্বাচিত হ’বলৈ সাধাৰণতে যি ধৰণৰ অৰ্হতাৰ প্ৰয়োজন হয়, তাক গৌণ কৰি গোটেই প্রক্রিয়াটো দলীয় ৰাজনৈতিক হিচাপ-নিকাচৰহে অংশ কৰি লৈছে দলবোৰে।
ৰাজ্যসভাক ৰাজনৈতিক সংস্থাপনৰ আহিলা কৰি লোৱাত সংসদৰ উচ্চ সদনৰ উদ্দেশ্যতে ব্যাঘাত জন্মিছে। তাৰেই পৰিণাম ভুগিছে সাধাৰণ জনতাই। অসমৰ ৰাজ্যসভাৰ সাংসদসকলৰ সাংসদ উন্নয়ন পুঁজিৰে ৰূপায়িত কামৰ মতি-গতিয়েই ইয়াৰ উদাহৰণ হৈ পৰিছে।
অসম চৰকাৰৰ শেহতীয়া এক পৰিসংখ্যা অনুসৰি অসমক যিসকল সাংসদে ৰাজ্যসভাত প্রতিনিধিত্ব কৰি আছে তেওলোকে সাংসদ পুঁজিৰ ধনেৰে মাত্ৰ আঠ শতাংশ উন্নয়নমূলক কামহে কৰিবলৈ সক্ষম হৈছে।
ৰাজ্যসভাৰ সাংসদ এজনে সংসদ উন্নয়ন পুঁজিৰ জৰিয়তে বছৰি পাঁচ কোটিকৈ টকা লাভ কৰে। তেওঁলোকে যিখন ৰাজ্যৰ ৰাজ্যসভাৰ আসনৰ পৰা দেশৰ উচ্চ সদনলৈ নির্বাচিত হয় সেইখনৰ চাৰিসীমাৰ ভিতৰৰ যিকোনো স্থানৰ আন্তঃগাঁথনি উন্নয়ন শিতানত এই পুঁজি ব্যয় কৰিব পাৰে।
সাংসদজন পুঁজি ব্যয়ত প্রত্যক্ষভাবে জড়িত নহয়, কিন্তু তেওঁ অনুমোদন দিয়া কামৰ জৰিয়তে পুঁজিৰ সঠিক ব্যৱহাৰ হৈছেনে হোৱা নাই সেই ক্ষেত্রত দায়বদ্ধ থাকে। অসমৰ অধিকাংশ সাংসদ যে এইক্ষেত্রত দায়বদ্ধহীন সেয়া তেওঁলোকে অনুমোদন জনোৱা কামৰ অগ্ৰগতিৰ তথ্যয়েই প্রমাণ।
সাংসদ এজনে অনুমোদন জনোৱা কাম এটাই আৱণ্টন লাভ কৰাৰ পাছত ৰাজ্য চৰকাৰৰ প্ৰতিনিধি আৰু কামটো ৰূপায়িত হ’বলগীয়া জিলাখনৰ প্ৰশাসনক অন্তর্ভুক্ত কৰি এখন নির্মাণ সমিতি গঠন কৰা হয়। এটা উন্নয়নমূলক কাম সম্পূর্ণ হৈ নুঠালৈকৈ সংশ্লিষ্ট সমিতিখনো সম্পূর্ণ দায়ৱদ্ধ হৈ থাকে।
ৰাজ্যসভাত অসমৰ সাংসদৰ সংখ্যা হ’ল সাতজন। বর্তমান কার্যনির্বাহ কৰি থকা সাতজনৰ তিনিজন কেইমাহমান পূর্বেহে নির্বাচিত হৈছে। ইয়াৰ বিপৰীতে অসমত এনে সাংসদ একাধিক আছে যিয়ে আসনখনত যেন খুঁটি পুতিহে লৈছে, অথচ উপেক্ষিত হৈ ৰৈছে ৰাইজৰ স্বার্থ।
যোৱা মাৰ্চত নির্বাচিত অসমৰ তিনিজন সাংসদ হ’ল যোগেন মহন, তেৰচ গোৱালা আৰু প্রমোদ বড়ো। যোগেন মহনে যোৱা পাঁচ মাহত ৩.২৭ কোটি টকাৰ ২৫ টা কামত অনুমোদন জনায়। ইয়াৰে তিনিটা কামৰ পুঁজি মোকলাই দিয়া হৈছে।
অৱশ্যে ইয়াৰে এটাও কাম সম্পূর্ণ হোৱা নাই। প্রমোদ বড়োই অনুমোদন দিয়া কামৰ সংখ্যা হ’ল ১৮ টা। ইয়াৰে এটাও কামৰ পুঁজি আৱণ্টন হোৱা নাই। ইয়াৰ বিপৰীতে তেৰচ গোৱালাই এতিয়ালৈকে এটাও কামত অনুমোদনেই জনোৱা নাই।
অর্থাৎ সাংসদজনৰ পুঁজিৰে কোনো উন্নয়নমূলক কামৰ আৰম্ভণি কৰাটো বাদেই, তেনে কামত গোৱালাই হাতেই দিয়া নাই।
অসমক ৰাজ্যসভাত প্রতিনিধিত্ব কৰা এজন সাংসদ হ’ল ৰণগৌৰা নাৰ্জাৰী। ইতিমধ্যে ৰাজ্যসভাৰ সাংসদৰ ছবছৰীয়া কার্যকালৰ প্ৰায় তিনি বছৰ সম্পূৰ্ণ কৰা সাংসদজনে যোৱা ছেপ্টেম্বৰলৈ ২০.৩৯ কোটি টকাৰ ১৬৬ টা আন্তঃগাঁথনি উন্নয়ন কামত অনুমোদন জনাইছে। ইয়াৰে ১৫.১৬ কোটি টকাৰ ১২৬ টা কামৰ পুঁজিয়ে আৱণ্টন লাভ কৰিছে। ইয়াৰে ১৭ টা কাম সম্পূর্ণ হৈছে।
সাংসদ তথা কেন্দ্ৰীয় ৰাজ্যিক বৈদেশিক পৰিক্ৰমা বিভাগৰ মন্ত্রী পবিত্ৰ মাৰ্ঘেৰিটায়ো তিনিবছৰীয়া কাৰ্যকালত যোৱা ছেপ্টেম্বৰলৈ ২১০ টা কামত অনুমোদন জনায়। অনুমোদিত কামৰ বিপৰীতে ধাৰ্য পুঁজিৰ পৰিমাণ হ’ল ১৭.০১ কোটি টকা। ইয়াৰে ১০৩ টা কামৰ বিপৰীতে ১১.৫৬ কোটি টকাৰ আৱন্টন লাভ কৰিছে। এই কামবোৰৰ মাত্র পাঁচটাহে সম্পূর্ণ হৈছে।
এতিয়ালৈকে দুবছৰ সম্পূৰ্ণ কৰা তথা ৰাজ্যসভালৈ কে’বাবাৰো নিৰ্বাচিত হোৱা বীৰেন্দ্ৰ প্ৰসাদ বৈশ্যই নিজৰ সাংসদ উন্নয়ন পুঁজিৰে এতিয়ালৈকে ৭.৭৫ কোটি টকাৰ ৪৫ টা কামত অনুমোদন জনাইছে। ইয়াৰে ২৬ টা কামৰ বাবে পুঁজি আৱণ্টন লাভ কৰিছে। এই পুঁজিৰ পৰিমাণ হ’ল ৪.৮৬ কোটি টকা। আৱণ্টিত কামৰ মাত্র এটাহে এতিয়ালৈকে সম্পূর্ণ হৈছে।
দুবছৰ কাৰ্যকাল সম্পূৰ্ণ কৰা আন এজন সাংসদ হ’ল কনাদ পুৰকায়স্থ। সাংসদজনে এতিয়ালৈকে ৬.৫ কোটি টকাৰ ৫০ টা উন্নয়নমূলক কামত অনুমোদন জনাইছে। ইয়াৰে আৱণ্টন লাভ কৰা কামৰ সংখ্যা হ’ল ৩১ টা। আৱণ্টিত পুঁজিৰ পৰিমাণ হ’ল ৪.৩৫ কোটি টকা। দুর্ভাগ্যজনক ভাবে ইয়াৰে এটা কামো আজিলৈকে সম্পূর্ণ নহ’ল।
