106 years old freedom fighter Khageshwar Gogoi:
অহা ১০ জানুৱাৰীত ১০৬ বছৰত পদাৰ্পন কৰিব যোৰহাটৰ তাম্ৰপত্ৰ প্ৰাপক মুক্তিযোদ্ধা খগেশ্বৰ গগৈয়ে। এই উপলক্ষে যোৰহাট জিলা মুক্তি যুঁজাৰু সন্মিলনৰ উদ্যোগত আৰু পৰিয়ালৰ সহযোগত ১০ জানুৱাৰীত দহাবৰা ৰ’ডৰ নিজা বাসগৃহত ওলগ অনুষ্ঠান উদযাপনৰ আয়োজন কৰা হৈছে।
দিনৰ ১২-৩০ বজাৰ পৰা হ’ব লগীয়া কাৰ্যসূচীত শুভাকাঙ্খী সকলৰ উপস্থিতি মুক্তি যুঁজাৰু সন্মিলন আৰু পৰিয়ালে কামনা কৰিছে। উল্লেখ্য, মুক্তিযোদ্ধাজনৰ জন্ম দিনৰ ওলগ অনুষ্ঠান বিগত ১৩ বছৰ ধৰি ৰাজহুৱা ভাবে উদযাপন কৰি অহা হৈছে। আজীৱন মহাত্মা গান্ধীৰ আদৰ্শৰে খদ্দৰ- ধুতি-পাঞ্জাবী পৰিধান কৰি সৰল জীৱন যাপন কৰা মুক্তিযোদ্ধাজনৰ বৰ্তমান স্বাস্থ্যৰ অৱনতি ঘটিছে যদিও স্মৃতি শক্তি প্ৰখৰ হৈ আছে।
আজীৱন সমাজ ব্ৰতী মুক্তিযোদ্ধাজনক যোৰহাট মুক্তি যুঁজাৰু সন্মিলনে এক বিভুষাৰে বিভূষিত কৰিব বুলি জানিব পৰা গৈছে। হৰিনাৰায়ণ বৰুৱাই প্ৰতিষ্ঠা কৰা অসম গাওঁৰক্ষী বাহিনীৰ অন্যতম সংগঠক খগেশ্বৰ গগৈক শতাধিক সংগঠনৰ লগতে জিলা প্ৰশাসনৰ ফালৰ পৰাও বিভিন্ন সময়ত সন্মান যচা হৈছে। মুক্তিযোদ্ধা জনৰ স্বাস্থ্যৰ তত্বাৱধান লোৱাৰ ক্ষেত্ৰত চৰকাৰে ব্যৱস্থা গ্ৰহণ কৰাটো কামনা কৰিছে ৰাইজে |
